A Kedrai Vola Na Dauveilewai 1 - AI VOLA TABU（FIJ1864）

A WASE I. —A nodrai vala ko ira na Juta, ko ira talega na Simioni, 1-15. A ka era kitaka na veiyavusa e so, 16-36.

1IA ni sa mate oti ko Josua, era sa tarogi Jiova ko ira na luve i Isireli, ka kaya, O cei vei keimami me lako cake eliu kivei ira na kai Kenani, me veivala kei ira?

2A sa kaya ko Jiova, Me lako cake ko ira na Juta: raica, au sa solia na vanua ki na ligadra.

3A ra sa kaya na Juta vei ira na Simioni na wekadra, Me da lako cake ki na neimami votavota, me da veivala kei ira na kai Kenani; ia eda na qai lako talega kei kemudou ki na nomudoui votavota. A sa lako kei ira ko ira na Simioni.

4A ra sa lako cake na Juta, ka sa soli ira na kai Kenani kei ira na lewe ni Veikoro lalai ki na ligadra ko Jiova; a ra sa mokuti ira mai Peseki e lewe tini na udolu na tamata.

5A ra sa kunei Etoni-Peseki mai Peseki: ka ra veivala kaya, ka mokuti ira na kai Kenani kei ira na lewe ni Veikoro lalai:

6ia sa dro ko Etoni-Peseki, a ra sa vakasavi koya, ka taura, ka muduka nai qaqalo levu ni ligana kei na yavana:

7a sa kaya ko Etoni-Peseki, Era a tomitomi e ruku ni noqui kanakana e lewe vitusagavulu na tui sa mudu nai qaqalo levu ni ligadra kei na yavadra: me vaka na ka kaʼu a kitaka, sa saumi au vakakina na Kalou. A ra sa kauti koya ki Jerusalemi, ka sa mate maikina ko koya.

8Ia sa veivala ko ira na luve i Juta kei Jerusalemi, ka rawata, ka mokuta e na bati ni seleiwau, ka vakama na koro.

9A sa oti, era sa qai lako sobu ko ira na luve i Juta, me veivala kei ira na kai Kenani, era sa tiko e na ulu-ni-vanua, kei na mata ni ceva, kei na cecelevu.

10Sa lako talega ko ira na Juta vei ira na kai Kenani era sa tiko mai Epironi: (ia na yaca i Epironi eliu ko Kiriaci-aripa:) a ra sa mokuti Sesei, kei Eiimani, kei Talimei.

11A ra sa lako tani maikea vei ira na kai Tipira: (ia na yaca i Tipira eliu ko Kiriaci-seferi.)

12A sa kaya ko Kalepi, O koya sa mokuti Kiriaci-seferi, ka rawata, vei koya kaʼu na soli Akisa na luvequ alewa me watina.

13A sa rawata ko Ocinieli na luve i Kinasi, na taci i Kalepi: a sa solia vua ko koya na luvena alewa ko Akisa me watina:

14ia, ni sa lako mai na alewa, sa vakauqeta na watina me kerea e dua na tiki ni vanua maivei vugona: a sa sobu mai na asa na alewa, a sa kaya vua ko Kalepi,

0sa vakaevei?

15A sa kaya vua ko koya, Mo solia vei au na ka meʼu kalougata kina; ni ko sa solia oti vei au e dua na vanua ki na mata ni ceva; mo solia talega vei au e so na mata ni wai. A sa solia vua ko Kalepi na mata ni wai ecake, kei na mata ni wai era.

16Ia ko ira na luve ni tamata Kenai, na vugo i Mosese, era lako cake kei ira na luve i Juta mai na koro ni veibalabala ki na lekutu nei Juta, a ya mai na mata ni ceva sa donui Arati; ka ra sa lako ka tiko e na kedra maliwa na tamata.

17Era sa qai lako na Juta kei ira na Simioni na wekadra, ka ra mokuti ira na kai Kenani era tiko mai Sifaci, ka vakarusa sara. (A sa vakatokai na yaca ni koro ko Orima).

18Era sa rawai Kesa talega kei na kena vanua ko ira na Juta, kei Asikiloni kei na kena vanua, kei Ekironi kei na kena vanua.

19A sa tiko kei ira na Juta ko Jiova, a ra sa taukena na ulu-ni-vanua; a sa sega ni vakasevi ira rawa era tiko e na cecelevu, e na vuku ni sa so vei ira na vale-vodoki kaukamea.

20A ra sa soli Epironi vei Kalepi, me vaka ka kaya ko Mosese: a sa vakasevi iratou yani maikina na luve i Anaki eratou lewe tolu ko koya.

21Ia ko ira na luve i Penijamini, era sa sega ni vakasevi ira yani na kai Jepusa era sa tiko mai Jerusalemi; ia sa tiko vata ga e Jerusalemi ko ira na kai Jepusa kei ira na luve i Penijamini, ka yacova na siga o qo.

22Ia na mataqali i Josefa, era sa lako cake talega ki Peceli; a sa tiko kei ira ko Jiova.

23A ra sa tala e so ko ira na mataqali i Josefa me yamatai Peceli: (ia na yaca ni koro eliu ko Lusa.)

24Ia ko ira sa lawa era sa kunea e dua na tamata ni sa lako mai na koro, a ra sa kaya vua, Mo vakaraitaka mada vei keitou nai curucuru ki na koro, ia keitou na lomani iko.

25Ia ni sa vakaraitaka vei ira ko koya nai curucuru ki na koro, era sa qai mokuta na koro e na bati ni seleiwau: ia era sa laiva me lako na tamata ko ya kei ira kecega na kai nona.

26A sa lako na tamata ko ya ki na nodra vanua na luve i Eci, ka tara kina e dua na koro, ka vakayacana ko Lusa; a ya sa yacana ka yacova na gauna o qo.

27O ira talega na Manase, era sa sega ni taukeni Peci-siani kei na koro lalai sa volita, se Teenaki kei na koro lalai sa volita, so na kai Tori kei na koro lalai sa volita, se na kai Ipiliami kei na koro lalai sa volita, so na kai Mekito kei na koro lalai sa volita: ia era sa gu na kai Kenani mo tiko e na vanua ko ya.

28Ia ni sa kaukauwa mai ko ira na Isireli, era sa kitaki ira na kai Kenani me ra qali, ka sega ni vakasevi ira tani sara.

29O ira talega na Ifireimi, era sa sega ni vakasevi ira tani na kai Kenani era a tiko mai Keseri; ia era tiko vata ga kei ira mai Keseri ko ira na kai Kenani.

30O ira na Sepuloni, era sa sega ni vakasevi ira tani na kai Kitironi, sei ira na kai Neeloli; ka sa tiko vata ga kei ira ko ira na kai Kenani, ka ra mai qali.

31O ira na Aseri, era sa sega ni vakasevi ira tani na kai Ako, sei ira na kai Saitoni, se mai Alapi, so mai Ekisipi, se Elipa, se Efiki, se Riopi:

32ia era sa tiko vata na luve i Aseri kei ira na kai Kenani, nai taukei ni vanua, ni ra sa sega ni vakasevi ira tani.

33O ira na Nafitali, era sa sega ni vakasevi ira tani na kai Peci-semesi, sei ira na kai Peci-anaci; ka sa tiko ko ira e na kedra maliwa na kai Kenani, nai taukei ni vanua: ia ka sa qali vei ira ko ira na kai Peci-semesi kei ira na kai Peci-anaci.

34Ia ko ira na luve i Amori, era sa va-kayalani ira na luve i Tani ki na ulu-ni-vanua, ni ra sa sega ni laivi ira me ra lako sobu ki na cecelevu:

35ia era sa gu na luve i Amori me tiko e na ulu-ni-vanua ko Eresi mai Eiyaloni, ka mai Seelipimi: ia ka sa gumatua na ligadra na mataqali i Josefa, era sa mai qali kina.

36Ia sa vakatekivu na nodrai yalayala na luve i Amori mai nai cabecabe ki Akirapimi, mai na vatu levu, ka lako cake.