Ai Vola Kei Josua 24 - AI VOLA TABU（FIJ1864）

Sa vakasoqona vata na veiyavusa ki Sikemi ko Josua, 1. Sa tukuna vei ira ko Josua na cakacaka loloma ni Kalou rei ira, mai na gauna i Eparaama ka yaco ki na nona gauna, 2-13; a sa vunauci ira matua ko Josua me ra qaravi Jiova ga, ka sa veiyalayalati kei ira e na siga ko ya mai Sikemi, 14-28. Sa ciba ko Josua, 29, 30. Era sa qaravi Jiova ko ira na Isireli, 31. Sa bulu na suina ko Josefa, 32. Sa ciba ko Eliasari, 33.

1A SA vakasoqona vata ko Josua na nodra veiyavusa kecega na Isireli ki Sikemi, ka kacivi ira mai na nodra qase na Isireli, kei ira na nodra turaga, kei ira na nodra dauveilewai, kei ira na nodra turaga lalai; a ra sa mai vakaraitaki ira e na mata ni Kalou.

2A sa kaya ko Josua kivei ira na tamata kecega, Sa vosa vakaoqo ko Jiova na Kalou nei Isireli, Sa ra tiko na nomudou qase eliu mai tai kadua ni Uciwai, io ko Tera, na tama i Eparaama, kei na tama i Nakori: ia era a qarava na kalou tani e so:

3ia kaʼu a kauti Eparaama na tamamudou mai tai kadua ni Uciwai, ka kauti koya voli e na vanua ko Kenani taucoko, ka vakalewevuqataka na nona kawa, ka soli Aisake vua:

4ia kaʼu a soli Jekope kei Iso vei Aisake, ia kaʼu a solia vei Iso na ulu-ni-vanua ko Seira, me taukena: ia era a lako sobu ki Ijipita ko Jekope kei iratou na luvena:

5ia kaʼu a talai Mosese kei Eroni, ia kaʼu a vakararawataki Ijipita, me vaka na ka kaʼu a cakava e na kedra maliwa, ka sa oti kaʼu a qai kauti kemudou maikina:

6ia kaʼu a kauti ira na nomudou qase mai Ijipita: ia dou a lako mai ki na waitui; a ra sa vakasavi ira na nomudou qase ko ira na kai Ijipita, e na veivale-vodoki, kei ira na tamata vakaose, ka yaco ki na Wasa Damudamu:

7ia ni ra sa tagi vei Jiova, sa qai viritaka ko koya na butobuto e na nomudou maliwa kei ira na kai Ijipita, a sa vakayacora na wasawasa vei ira, ka ubi ira, ka sa raica na matamudou na ka kaʼu a kitaka vei ira na kai Ijipita: ia dou a tiko vakadede mai na lekutu:

8ia kaʼu a kauti kemudou ki na nodra vanua na luve i Amori, a ya ka tiko mai tai kadua ni Joritani; a ra sa veivala kei kemudou: ia kaʼu a soli ira ki na ligamudou, mo dou taukena kina na nodra vanua; ia kaʼu a vakarusai ira mai na matamudou.

9Sa qai tu cake ko Palaki na luve i Sipori, na tui Moapi, ka veivala kei ira na Isireli, ka sa talaki me kacivi Palami na luve i Piori me rukaki kemudou:

10ia kaʼu a bese ni rogoci Palami; ka sa vosavakalougatataki kemudou tikoga ko koya: ia kaʼu a vakabulai kemudou mai na ligana.

11Ia dou a lako-kosova na Joritani, ka lako mai ki Jeriko, a ra veivala kei kemudou na taukei kei Jeriko, ko ira na luve i Amori, kei na lewe ni veikoro lalai, kei na kai Kenani, kei ira na luve i Eci, kei na Kerekesa, ko ira na luve i Evi, kei na kai Jepusa; ia kaʼu a soli ira ki na ligamudou.

12Ia kaʼu a vakatala e dua na ka rerevaki e na matamudou, a ya sa vakasevi rau mai na matamudou, na nodra tui e rua na luve i Amori: sa sega e na nomui seleiwau se na nomu dakai.

13Ia kaʼu sa solia vei kemudou e dua na vanua dou a sega ni oca kina, kei na koro e so dou a sega ni tara, ka dou sa tiko ga kina; dou sa kana mai na veivaini kei na veiolive dou a sega ni tea.

14Ia o qo, mo dou rerevaki Jiova, ka qaravi koya e na yalododonu ka vakaidina: ka biuta tani na veikalou era qarava na nomudou qase mai tai kadua ni Uciwai, mai Ijipita talega; ia mo dou qaravi Jiova.

15Ia kevaka sa ca vei kemudou me qaravi Jiova, dou digitaki koya edaidai dou na qarava; se na veikalou ka ra qarava na nomudou qase mai tai kadua ni Uciwai, se na nodra veikalou na luve i Amori, na nodra vanua dou sa tiko kina: ia koi au ga kei na noqu lewe-ni-vale, keitou na qaravi Jiova.

16A ra sa vosa mai na tamata, ka kaya, Me yawa sara vei keimami me keimami laivi Jiova me qarava na kalou tani e so;

17ni sa ko Jiova ga na noda Kalou, ko koya ga ka kauti keda cake kei ira na noda qase mai na vanua ko Ijipita, mai na vale ni bobula, a sa kitaka nai vakatakilakila levu o qori e na matada, ka maroroi keda e na sala kecega eda a lako kina, e na kedra maliwa talega na lewe ni veivanua eda a lako kina:

18ka sa vakaseva ko Jiova na tamata kecega mai na matada, na luve i Amori era a tiko e na vanua: koi keimami talega, keimami na qaravi Jiova; ni sa neimami Kalou ko koya.

19A sa kaya ko Josua vei ira na tamata, Dou sa sega ni qaravi Jiova rawa: ni sa Kalou yalosavasava ko koya; sa Kalou vuvu ko koya; ena cudruva na nomudou talaidredre, kei na nomudoui valavala ca:

20kevaka dou na laivi Jiova, ka qarava na veikalou ni kai tani, ena qai vuki ko koya ka vakacacani kemudou, ka vakarusai kemudou, ni sa caka vinaka oti vei kemudou.

21A sa kaya vei Josua ko ira na tamata, E segai; keimami na qaravi Jiova ga.

22A sa kaya ko Josua vei ira na tamata, Dou sa tukuni kemudou edaidai ni dou sa digitaki Jiova, mo dou qaravi koya.

A ra sa kaya, Sa vakakina.

23Ia o qo, mo dou biuta tani na veikalou ni kai tani sa tu vei kemudou, ka vagolea na lomamudou vei Jiova na Kalou nei Isireli.

24A ra sa kaya na tamata vei Josua, Keimami na qaravi Jiova na noda Kalou, ia keimami na vakarorogo ki na domona.

25A sa ia e dua na veiyalayalati vei ira ko Josua e na siga ko ya, a sa solia vei ira e dua na vunau kei nai lesilesi mai Sikemi.

26A sa vola na vosa o qo e nai vola ni vunau ni Kalou ko Josua, ka sa kauta e dua na vatu levu, ka vakatura cake e ruku ni oki, a ya sa tu mai na vale tabu i Jiova.

27A sa kaya ko Josua vei ira na tamata kecega, Raica, na vatu o qo ena vakananumi keda: ni sa rogoca na vosa kecega i Jiova, a ya sa vosataka ko koya vei keda: ia ena vakananumi kemudou, do dou sa cakitaka na nomudou Kalou.

28A sa vakatalai ira ko Josua na tamata, na tamata yadua ki na nonai votavota.

29IA ni sa oti na veika o qo, sa ciba ko Josua na luve i Nuni, nai talatala i Jiova, ni sa dua na drau ka mani tini na nona yabaki:

30ka ra sa buluta e nai yalayala ni nonai votavota mai Timinaci-sera, a ya mai na ulu-ni-vanua ko Ifireimi, e na yasa ni ulu-ni-vanua cecere ko Keasi kivaka ki na tokalau.

31A sa qaravi Jiova ko ira na Isireli e na gauna kecega i Josua, kei na nodra gauna kecega na qase era bula ni sa mate ko Josua, era a kila talega na cakacaka kecega i Jiova, a ya ka kitaka e na vukudra na Isireli.

32Ia na suina ko Josefa, a ya era a kauta cake mai Ijipita na luve i Isireli, era sa buluta mai Sikemi, e na tiki ni vanua sa volia ko Jekope, e na dua na drau na tiki ni siliva, vei ira na luve i Emori na tama i Sikemi: a sa yaco mei votavota vei ira na luve i Josefa.

33A sa ciba ko Eliasari na luve i Eroni; a ra sa buluta e na vanua cecere nei Piniasi na luvena, a ya ka soli vei koya mai na ulu-ni-vanua ko Ifireimi.