Ai Vola Kei Josua 23 - AI VOLA TABU（FIJ1864）

Sa vakasoqoni ira vata na Isireli ko Josua, ka tukuna na ka sa cakava vei ira ko Jiova, 1-4; a sa kaya me ra gumatua me vakabauta na vosa ni Kalou, me ra vinaka kina, 5-11: kevaka era sega ni muri Jiova, era na ca kina, 12-16.

1IA ni sa vakacegutaki ira oti na Isireli vakadede ko Jiova mai na nodra meca kecega sa vakavolivoliti ira, sa qai qase mai ko Josua; sa vuqa na nona yabaki:

2a sa kacivi ira kecega na Isireli ko Josua, kei ira na nodra qase, kei ira na nodrai turaga, kei ira na nodra dauveilewai, kei ira na nodra turaga lalai, a sa kaya vei ira, Au sa qase mai; sa vuqa na noqu yabaki:

3ia dou sa raica na ka kecega ka cakava ko Jiova na nomudou Kalou kivei ira na matanitu kecega o qo e na vukumudou; ni sa ko Jiova na nomudou Kalou sa totaki kemudou.

4Raica, au sa vota oti vei kemudou na veimatanitu o qo sa vo, me nodrai votavota na nomudou veiyavusa, sa tekivu mai Joritani, kei na veimatanitu kecega kaʼu sa vakarusataka, ka yaco ki na wasa levu, mai nai dromudromu ni siga.

5Ia ko Jiova na nomudou Kalou, ena vakasevi ira e na matamudou, ka vakuai ira e na vukumudou; ia dou na taukena na nodra vanua, me vaka ka kaya vei kemudou ko Jiova na nomudou Kalou.

6Ia dou kaukauwa sara me vakabauta ka kitaka na ka kecega sa volai e nai vola ni vunau i Mosese, mo dou kakua ni vuki tani maikina ki nai matau sei mawi;

7mo dou kakua kina ni laʼki tiko e na kedra maliwa na veimatanitu o qo, ko ira sa vo kei kemudou; mo dou kakua talega ni cavuta na yaca ni nodra veikalou, se cakava kina na vosavavakini, se qaravi ira, se cuva vei ira:

8ia dou kabiti Jiova ga na nomudou Kalou, me vaka dou sa kitaka ka yacova na siga o qo.

9Ni sa vakaseva tani oti ko Jiova mai na matamudou e so na matanitu levu ka kaukau wa: ia koi kemudou, sa sega e dua na tamata ka tu rawa e na matamudou ka yacova na siga o qo.

10Ena vakaseva na lewe udolu e lewe dua vei kemudou: ni sa ko Jiova ga na nomudou Kalou sa totaki kemudou, me vaka ka kaya vei kemudou ko koya.

11Dou qarauni kemudou vinaka, mo dou lomani Jiova na nomudou Kalou.

12Ia kevaka dou na vuki, ka kabita na vo ni veimatanitu o qo, io ko ira sa vo kei kemudou, ka ia na vakawati kei ira, ka laʼki tiko e na kedra maliwa, a ra lako mai vei kemudou:

13dou kila vakaidina ni na sega ni vakasevi ira tiko mai na matamudou na veimatanitu o qo ko Jiova na nomudou Kalou; era na lawa ga, kei nai cori, kei na kuita ki na sarisarimudou, kei na voto ni kau e na matamudou, vei kemudou, ia dou na oti kina mai na dela ni vanua vinaka o qo, a ya sa solia vei kemudou ko Jiova na nomudou Kalou.

14Ia, raica, kaʼu sa lako e na gauna o qo e na sala era lako kina na kai vuravura kecega, ia dou sa kila e na lomamudou taucoko kei na yalomudou taucoko, ni sa sega ni lutu e dua na ka e na ka vinaka kecega sa vosataka e na vukumudou ko Jiova na nomudou Kalou; sa yaco kecega vei kemudou; sa sega ni lutu e dua na ka o qori.

15Ia me vaka sa yaco vei kemudou na ka vinaka kecega ka vosataka vei kemudou ko Jiova na nomudou Kalou; ena vakayacora vakakina na ka ca kecega ko Jiova, me vakarusataki kemudou mada kina mai na dela ni vanua vinaka o qo, a ya sa solia vei kemudou ko Jiova na nomudou Kalou.

16Ni dou sa vakacataka na veiyalayalati i Jiova na nomudou Kalou, a ya sa vunautaka vei kemudou, ka laʼki qarava na kalou tani e so, ka cuva vei ira, ena qai waqawaqa mai na cudru i Jiova vei kemudou, ia dou na vakarusai tani vakasauri mai na vanua vinaka sa solia vei kemudou ko koya.