Ai Vola Kei Josua 14 - AI VOLA TABU（FIJ1864）

Ai valavala ni veivota vanua, 1-5. Sa nei Kalepi ko Epironi, 6-15.

1IA o qo era sa taukena na luve i Isireli mai na vanua ko Kenani, a ya sa solia ko Eliasari na bete, kei Josua na luve i Nuni, kei iratou na qase ni nodra veiyavusa na luve i Isireli, mei votavota vei ira:

2ai votavota e nai vola ni veidigidigi, me nodra na yavusa e ciwa, kei na dua na wase ni yavusa, me vaka ka vunautaka ko Jiova e na gusu i Mosese:

3ni sa solia oti ko Mosese na nodra tikina na yavusa e rua, kei na dua na wase ni yavusa, mai tai kadua ni Joritani: ia ka sa sega ni solia ko koya e dua nai votavota vei ira na luve i Levi e na kedra maliwa.

4(Ni sa rua na yavusa, na Manase kei na Ifireimi, koi rau na luve i Josefa,) ia era sega kina ni solia e dua na tikina vei ira na luve i Levi e na vanua, na Veikoro ga me ra tiko kina, vata kei na veivanua sa volita, ki na nodra manumanu e yavai va kei na nodra yau.

5Me vaka sa vunautaka vei Mosese ko Jiova, era kitaka vakakina na luve i Isireli, ka ra sa vota na vanua.

6Era qai lako mai vei Josua na luve i Juta e Kilikali: a sa kaya vua ko Kalepi na luve i Yifune, na luve i Kinasi, O sa kila na vosa ka kaya vei Mosese, na tamata ni Kalou, ko Jiova, e na vukudaru, mai Ketesa-parinea.

7Sa vasagavulu na noqu yabaki ni sa talai au mai Ketesa-parinea ko Mosese, nai talatala ni Kalou, meʼu laʼki rai vanua; ia kaʼu a kauta tale vua na vosa sa tu e lomaqu.

8Ia ko iratou na wekaqu keitou a lako kaya, eratou vakadatuvutaka na yalodra na tamata: ia koi au ga, kaʼu a muri Jiova sara ga na noqu Kalou:

9a sa vosavavakini e na siga ko ya ko Mosese, ka kaya, Ena nomu tikina vakaidina ga na vanua sa butuka na yavamu, kei na nodra na nomu kawa ka tawa mudu, e na vuku ni ko sa muri Jiova sara ga na noqu Kalou.

10Ia o qo, raica, sa vakabulai au tikoga ko Jiova, e na yabaki e vasagavulu ka lima o qo, ni ra sa veilakoyaki tikoga na Isireli mai na lekutu, me vaka ka kaya ko koya, io mai na siga ka vosataka kina na vosa o qo ko Jiova vei Mosese; io o qo, raica, sa qai walusagavulu ka lima na noqu yabaki edaidai:

11au sa kaukauwa tiko edaidai, sa vaka e na siga ka talai au kina ko Mosese: sa vaka na noqu kaukauwa e na siga ko ya na noqu kaukauwa edaidai, me laʼki valu, me lako yani, ka me lesu mai.

12Ia o qo, mo solia mai kina vei au na ulu-ni-vanua o qo, a ya ka vosa kina ko Jiova e na siga ko ya; ni ko a rogoca e na siga ko ya ni ra sa tiko kina na luve i Anaki, ka sa lelevu ka vakabai na veikoro: ena tiko beka kei au ko Jiova, kaʼu na qai vakasevi ira rawa, me vaka ka kaya ko Jiova.

13A sa vosavakalougataki koya ko Josua, ka soli Epironi vei Kalepi na luve i Yifune me taukena.

14O koya sa taukeni Epironi kina ko Kalepi na luve i Yifune, na luve i Kinasi, ka yacova na siga o qo, e na vuku ni sa muri Jiova sara ga, na Kalou nei Isireli, ko koya.

15Ia na yaca i Epironi eliu, Na koro i Aripa, o koya sa tamata rogo vei ira na luve i Anaki.

A sa cegu mai nai valu na vanua,