1A SA qase mai ko Josua, sa vuqa na nona yabaki; a sa kaya vua ko Jiova, O sa qase mai, sa vuqa na nomu yabaki, a sa vo e levu sara na tiki ni vanua me taukeni.
2O qo na vanua sa vo tu: Na nodra yasana kecega na kai Filisitia, kei Kesuri kecega,
3mai Siori, sa donui Ijipita, ka yaco ki nai yalayala kei Ekiloni mai na tokalau, sa kainaki e nodra na kai Kenani: e lima na nodra turaga na kai Filisitia: na kai Kasa, kei na kai Asitoci, na kai Asikiloni, na kai Kaca, kei na kai Ekironi: ko ira talega na Avi:
4mai na mata ni ceva, na nodra vanua kecega na kai Kenani, kei Miera, sa nodra na kai Saitoni, ka yaco ki Efeki, ka yaco ki na nodrai yalayala na luve i Amori:
5kei na nodra vanua na kai Kipali, kei Lipanoni taucoko, kivaka ki nai cadracadra ni siga, mai Peali-kata e ruku ni ulu-ni-vanua ko Erimoni, ka yacova na sala sa curu ki Emaci.
6A lewe ni ulu-ni-vanua kecega sa mai Lipanoni ka yaco ki Misirifoci-meimi, kei na kai Saitoni kecega, kaʼu na vakaseva yani e na matadra na luve i Isireli: ia mo vota ga vei ira na Isireli e nai vola ni veidigidigi, me ra taukena, me vaka kaʼu sa vakarota vei iko.
7Ia o qo, mo vota na vanua o qo me ra taukena na yavusa e ciwa, kei na dua na wase ni yavusa i Manase:
8era sa rawata vata kaya ko ira na luve i Rupeni kei na luve i Kata na nodrai votavota, a ya sa solia vei ira ko Mosese, mai tai kadua ni Joritani kivaka ki cake, me vaka sa solia vei ira ko Mosese nai talatala i Jiova;
9sa mai Aroeri mai na bati ni uciwai ko Arinoni, kei na koro sa toka e na maliwa ni uciwai, kei na buca kece mai Metipa ka yaco ki Tiponi;
10kei na Veikoro kecega i Sioni na nodra tui na luve i Amori, o koya ka lewa mai Esiponi, ka yaco ki na nodrai yalayala na luve i Amoni;
11kei Kiliati, kei na nodra yasana na kai Kesuri, kei na kai Meeka, kei na ulu-ni-vanua taucoko ko Erimoni, kei Pasani taucoko, ka yaco ki Salika;
12na matanitu taucoko nei Oki mai Pasani, o koya ka lewa mai Aseteroci kei Etirei, a ya na kedra vo ni tamata yagolevu: sa mokuti ira o qo ko Mosese, ka vakasevi ira tani.
13Ia ka sa sega ni vakasevi ira tani ko ira na Isireli na kai Kesuri, se na kai Meeka: a sa tiko e na kedra maliwa na luve i Isireli ko ira na kai Kesuri kei na kai Meeka, ka yacova na siga o qo.
14Ia ki na yavusa ga i Levi, sa sega ni solia kina ko koya e dua na kedrai votavota; sa kedrai votavota na veika sa cabori e na buka waqa vei Jiova na Kalou nei Isireli, me vaka ka kaya vei ira ko koya.
15A sa vota ko Mosese na yavusa ni luve i Rupeni me vaka na nodra veimataqali.
16Ia na nodra yasana sa mai Aroeri, a ya mai na bati ni uciwai ko Arinoni, kei na koro ko ya e na maliwa ni uciwai, kei na buca kece mai Metipa;
17ko Esiponi, kei na kena veikoro kece e na buca; ko Tiponi, kei Pamoci-peali, kei Peci-peali-mioni,
18kei Yasa, kei Kitemoci, kei Mefeaci,
19kei Kiriyaceimi, kei Sipima, kei Sereci-aseari e na ulu-ni-vanua mai na cecelevu,
20kei Peci-piori, kei Asitoci-pisika, kei Peci-yisimoci,
21kei na Veikoro kecega sa tu mai na buca, kei na matanitu taucoko nei Sioni na nodra tui na luve i Amori, o koya ka lewa mai Esiponi, o ira ka mokuta vata ko Mosese kei ira na turaga ni Mitiani, o Ivi, kei Rekemi, kei Suri, kei Uri, kei Repa, era turaga nei Sioni, sa tiko e na vanua.
22O Palami talega na luve i Piori, na rairai, era yavita ko ira na luve i Isireli e nai seleiwau vata kei ira sa yaviti.
23Ia na nodrai yalayala na luve i Rupeni ko na Joritani, kei na yasana ko ya. O qo na nodrai votavota na luve i Rupeni me vaka na nodra veimataqali, na Veikoro kei na kedra veikoro lalai.
24A sa vota ko Mosese ki na yavusa i Kata, io vei ira na luve i Kata, me vaka na nodra veimataqali.
25Ia sa nodra yasana ko Yaseri, kei na koro kecega mai Kiliati, ka dua na wase ni kedra vanua na luve i Amoni, ka yaco ki Aroeri, o qori sa donui Rapa;
26mai Esiponi talega ka yaco ki Rama i Misipe, kei Pitonimi; mai Meeneimi talega ka yaco ki nai yalayala ni Tipiri;
27ia e na buca, ko Peci-arami, kei Peci-nimira, kei Sukoci, kei Safoni, na kena vo ni matanitu nei Sioni, na tui Esiponi, o Joritani kei na yasana ko ya, ka yacova na bati ni waitui ko Kinereci, mai tai kadua ni Joritani kivaka ki cake.
28O qo na nodrai votavota na luve i Kata me vaka na nodra veimataqali, na veikoro kei na kedra veikoro lalai.
29A sa vota ko Mosese ki na dua na wase ni yavusa i Manase, sa qai nodra e dua na wase ni nodra yavusa na luve i Manase me vaka na nodra mataqali.
30Ia na nodra yasana sa vakatekivu mai Meeneimi, ko Pasani taucoko, na matanitu taucoko nei Oki na tui Pasani, kei na koro lalai kecega i Yairi, a ya mai Pasani, sa onosagavulu na koro:
31kei na dua na wase i Kiliati, kei Aseteroci, kei Etirei, na Veikoro e na matanitu nei Oki mai Pasani, na nodra na luve i Mekiri na luve i Manase, io na nodra e dua na wase ni luve i Mekiri me vaka na nodra mataqali.
32O qo ka solia ko Mosese mei votavota e na cecelevu nei Moapi, mai tai kadua ni Joritani, e na vanua mai cake, e donui Jeriko.
33Ia ka sa sega ni solia e dua nai votavota ko Mosese ki na yavusa i Levi: a kedrai votavota ko Jiova na Kalou nei Isireli, me vaka ka kaya vei ira ko koya.
Who We AreWhat We EelieveWhat We Do
2025 by iamachristian.org,Inc All rights reserved.
