Ai Vola Kei Josua 1 - AI VOLA TABU（FIJ1864）

A WASE I. —Sa lesi ko Josua me tarovi Mosese, 1-9. Ai vakaro i Josua vei ira na tamata, kei na nodra vosa, 10-18.

1IA ni sa mate oti ko Mosese nai talatala i Jiova, sa qai vosa ko Jiova vei Josua na luve i Nuni, o koya ka dauqaravi Mosese, ka kaya,

2Sa mate ko Mosese na noqui talatala; ia o qo, mo tu cake, mo lako-kosova na Joritani o qo, ko iko kei ira kecega na tamata o qo, ki na vanua kaʼu na solia vei ira, io vei ira na luve i Isireli.

3Na tikina kecega ena butuka na qeteqete ni yavamudou, au sa solia vei kemudou, me vaka kaʼu a kaya vei Mosese.

4Me vakatekivu mai na lekutu, mai na Lipanoni o qo talega, ka yacova na uciwai levu, na uciwai ko Uferetisi, na nodra vanua kecega na luve i Eci, ka yacova na wasawasa levu talega sa donuya nai dromudromu ni siga, nai yalayala ni nomudou vanua.

5Ena sega e dua me tu rawa e matamu e na veisiga kecega ko na bula kina: au na tiko kei iko, me vaka kaʼu a tiko kei Mosese: au na sega ni gu ca vei iko, se biuti iko.

6Mo kaukauwa ka qaqa: ni ko na vota vei ira na tamata o qo na vanua kaʼu a vosavavakini kina kivei ira na nodra qase me solia vei ira.

7Mo kaukauwa ka qaqa sara ga, mo vakabauta me cakava me vaka na vunau kecega sa vunautaka vei iko ko Mosese na noqui talatala: mo kakua ni suka tani ki nai matau se nai mawi, mo tamata yaco kina e na yasana kecega ko lako kina.

8Ai vola o qo ni vunau me kakua ni yali e na gusumu; ia mo vakanananu kina e na siga kei na bogi, mo vakabauta kina me cakava me vaka na ka kecega sa volai kina: ni ko na qai kalougata e na nomui valavala, ia ko na qai tamata yaco.

9Au sa vunauci iko oti, ne? mo kaukauwa ka qaqa; mo kakua ni rere, se yalolailai: ni sa tiko kei iko ko Jiova na nomu Kalou e na yasana kecega ko lako kina.

10Ia ko Josua, sa vakaroti ira na nodra turaga lalai na tamata, ka kaya,

11Dou lako yani e na maliwa ni tikotiko, ka vakaroti ira na tamata, ka kaya, Dou vakarautaka vei kemudou na oco; ia ni sa oti na bogi e tolu dou na laʼki kosova na Joritani o qo, me laʼki taukena na vanua sa solia vei kemudou ko Jiova na nomudou Kalou mo dou taukena.

12A sa vosa ko Josua vei ira na luve i Rupeni, kei na luve i Kata, kei na dua na wase ni yavusa i Manase, ka kaya,

13Dou vakananuma na vosa sa vunautaka vei kemudou ko Mosese nai talatala i Jiova, ni sa kaya, Sa cakavi kemudou ko Jiova, na nomudou Kalou, mo dou vakacegu, ka sa solia vei kemudou na vanua o qo.

14Ko ira na watimudou, ko ira na nomudou lalai, kei na nomudou manumanu e yavai va, era na tikoga e na vanua sa solia vei kemudou ko Mosese e na tai o qo ni Joritani; ia koi kemudou na tamatai valu qaqa kece, dou na vakarau tu ka liutaki ira na wekamudou, ka vukei ira;

15me cakavi ira oti mada ko Jiova na wekamudou me ra vakacegu, me vakai kemudou, ka taukena talega ko ira na vanua sa solia vei ira ko Jiova na nomudou Kalou: dou na qai lesu ki na vanua dou sai taukei kina, ka dou na taukena, a ya sa solia vei kemudou ko Mosese nai talatala i Jiova, e na tai o qo ni Joritani, sa qarava nai cadracadra ni siga.

16A ra sa vosa vei Josua, ka kaya, Na ka kecega ko sa vunautaka vei keimami keimami na kitaka, ia keimami na lako ki na yasana kecega ko na talai keimami kina:

17me vaka sara ni keimami a vakarorogo vei Mosese, keimami na vakarorogo vakakina vei iko: ia me tiko ga kei iko ko Jiova na nomu Kalou, me vaka ni ka tiko ko koya kei Mosese:

18ena vakamatei na tamata vakaaduaga sa talaidredre ki na nomu vunau, ka tawa vakarorogo ki na nomu vosa e na ka kece ko sa vakaroti koya kina: mo kaukauwa ka qaqa ga.