1IA ko Josua na luve i Nuni, sa tala e rua na tamata mai Sitimi, me rau yamata lo na vanua, ka sa kaya, Drau laʼki raica na vanua, kei Jeriko. A rau a lakani, ka curu ki na nona vale e dua na alewa dauyatagane, na yacana ko Reapi, ka rau a moce maikina.
2A sa tukuni vei tui Jeriko, ka vaka, Raica, sa lako mai kike e na bogi, e so na tamata vei ira na luve i Isireli, me raica vinaka na vanua.
3A sa talaki ko tui Jeriko vei Reapi, ka kaya, Kauti iratou mai kitautuba na tamata sa lako mai vei iko, eratou sa curu ki na nomu vale; ni ratou sa lako mai me raica vinaka na vanua taucoko.
4A sa kauti rau na tamata ko koya na alewa, ka vuni rau, ka kaya vakaoqo, Erau a lako mai vei au na tamata, ia kaʼu a tawa kila se rau maivei:
5ia ni sa vakarau me sogoti na matamata-ni-koro, ni sa butobuto mai, sa rau lakani na tamata, au sa sega ni kila se rau lako kivei na tamata: dou vakasavi rau kusakusa, ni dou na vauci rau.
6A sa kauti rau eliu ko koya ki na dela ni vale, ka vunitaki rau e na tidolu e so ni laino, ka virinoca oti ko koya e na dela ni vale.
7A sa muri rau e so na tamata e na sala kivaka ki na Joritani, ka yaco ki na yasana sa daulako-kosovi kina: ia ni ra sa curu oti kitautuba na tamata sa vakasavi rau, sa qai sogoti na matamata-ni-koro.
8Ia ni rau sa tawa davo, sa cabe cake vei rau ko koya na alewa ki na dela ni vale:
9a sa kaya vei rau na tamata, Au sa kila ni sa solia vei kemudou na vanua o qo ko Jiova, ka sa lutu vei keimami na rere levu e na vukumudou, a sa waicala kecega na lewe ni vanua e na vukumudou:
10ni keimami sa rogoca ni sa vakadiva na wai ni Wasa Damudamu ko Jiova e na vukumudou, ni dou a lako mai Ijipita; kei na ka dou a cakava vei rau na nodra tui na luve i Amori, mai na tai kadua ni Joritani, vei Sioni kei Oki, koi rau kemuni a vakarusa sara.
11Ia ni keimami a rogoca, sa qai waicala ga na yalo i keimami, a sa yali vei ira yadua na lomadei, e na vukumudou: ni sa Kalou ga ko Jiova na nomudou Kalou mai lomalagi ecake, e vuravura talega era.
12Ia o qo, e na vuku niʼu a lomani kemudrau, mo drau vosavavakini mada vei au ni drau cavuti Jiova, ni drau na lomani ira talega na lewe-ni-vale i tamaqu, ka cavuta vei au e dua nai vakatakilakila dina:
13ia dou na vakabula na tamaqu, kei tinaqu, kei iratou na ganequ, kei iratou na tuakaqu kei na taciqu, kei na nodra ka kecega, ia dou na vakabulai keitou mai na mate.
14A sa kaya vua koi rau na tamata, Keirau na mate mada e na vukumudou, kevaka dou na sega ni tukuna na neirau ka o qo: ia ni sa solia ko Jiova na vanua o qo vei keimami, keimami na lomani iko, ka cakava na ka dina vei iko.
15A sa vakatautukutaki rau sobu ko koya e na dali mai na katuba ecake, ni sa tu e na dela ni bai ni koro na nona vale, a sa dautiko ko koya e na dela ni bai.
16A sa kaya vei rau ko koya, Drau dro ki na ulu-ni-vanua, de sa veitavaki kei kemudrau ko ira era sa vakasavi kemudrau; ia drau vuni kemudrau maikea ka bogi tolu, me ra lesu tale mada mai ko ira era sa vakasavi kemudrau; ka sa oti, drau na qai lako yani e na nomudrau sala.
17A sa kaya vua koi rau na tamata, Keirau na tawa cala e na vuku ni nomu vosa vavakini o qo ko sa kitaki keirau kina me vosataka:
18raica, ni keimami sa lako mai ki na vanua, ko na vivia na dali ni vulovulo damudamu o qo, e na katuba ecake ko a vakatautukutaki keirau sobu kina: ia ko na vakasoqona vei iko ki na vale na tamamu kei na tinamu, kei iratou na ganemu, kei ira kecega na lewe-ni-vale i tamamu.
19Ia ko ira yadua sa lako yani kitautuba mai na nomu vale, ena cala ko koya ga e na vuku ni nona mate, ia koi keirau, keirau na tawa cala: ia ko ira yadua sa tiko kei iko e na vale, ena cala koi keirau e na vuku ni nona mate, kevaka sa tarai koya e dua na liga.
20Ia kevaka ko na tukuna na neirau ka o qo, keirau na qai tawa cala e na nomu vosa vavakini ko sa kitaki keirau kina me vosataka.
21A sa kaya ko koya, Me yaco ga me vaka na nomudrau vosa. A sa talai rau yani ko koya, ka rau sa lako: a sa vivia ko koya na vulovulo damudamu e na katuba ecake.
22A rau a lakani, ka yaco ki na ulu-ni-vanua, ka rau tiko kina ka bogi tolu, me ra lesu tale mada ko ira ka vakasavi rau: a sa vakasaqaqara ko ira ka vakasavi rau e na sala kecega ko ya, ka tawa kunei rau.
23A sa lesu tale koi rau na tamata, ka lako sobu mai na ulu-ni-vanua, ka lako ki tai kadua, ka yaco vei Josua na luve i Nuni, ka tukuna vua na ka kece ka yacovi rau.
24A rau a kaya vei Josua, Sa solia vakaidina ki na ligada na vanua kecega o qo ko Jiova; ia e na vukuda sa waicala ko ira kecega na lewe ni vanua.
Who We AreWhat We EelieveWhat We Do
2025 by iamachristian.org,Inc All rights reserved.
