1MO ni vakatu daliga, lomalagi, kaʼu na vosa; ia me vakarorogo ko vuravura, ki na vosa ni gusuqu.
2Ena tau na noqui vakavuvuli me vaka na uca, ena mirimiri na noqu vosa me vaka na tegu, me vaka na uca mirimiri ki na co malumalumu, ka vaka na uca tau bi ki na co:
3niʼu na tukuna na yaca i Jiova; dou vakalevu-levuya na noda Kalou.
4A Uluvatu! sa tawa cala na nona cakacaka: ni sa dodonu na nonai valavala kecega: a Kalou vosa dina, ka tawa ca, sa yalododonu ka daucaka dodonu ko koya.
5Era sa vakacacani ira vakai ira: era sa sega ni luve i koya e na vuku ni nodra ca: era kawa veve ka dauveivala.
6Kemuni sa saumi Jiova vakaoqo, ne, oi kemuni na tamata lialia ka tawa vuku? sa sega beka ni tamamu ko koya, na kemui taukei? sa buli iko, ka vakaukauwataki iko.
7Nanuma na gauna eliu sara, mo vakasama na yabaki ni tabatamata e vuqa: tarogi tamamu, ka na vakatakila vei iko ko koya; ko ira na nomu qase, ka na tukuna vei iko ko ira.
8Ni sa cakavi ira na veimatanitu ko Koya sa cecere sara mei taukei, ni sa wasewasei ira na luve i Atama ko koya, sa qai yalana na veiyalayala ni veimatanitu me ganita na kedrai wiliwili na luve i Isireli.
9Ni sa yau i Jiova ko ira na nona tamata; na Jekope nai votavota sa taukena ko koya.
10Sa kunei ira ko koya e na vanua lekutu, io, e na vanua lala sa vuqa kina na tagi, e na veikau; sa kauti ira voli, sa vakavulici ira, sa maroroi ira me vaka na loa ni matana.
11Me vaka na ikeli ni sa qisora na sova ni luvena, sa cakurobaroba e matadra na luvena, sa vakate taba, sa kauti ira, sa vukataka e na tabana;
12sa tuberi ira vakakina ko Jiova duadua, ka sa sega kaya na kalou tani.
13Sa vakavodoki ira me lako e na veiyasana cecere e vuravura, me kania ko ira na vua ni veiwere; a sa vakasucumi ira e na oni mai na Uluvatu, kei na waiwai mai na uluvatu qiwa;
14na uro ni wai-ni-sucu ni karavau, kei na wai-ni-sucu ni sipi, kei na uro ni lami kei na sipi tagane ni Pasani, kei na koti, kei na uto ni witi vinaka; ia ko a gunuva na waini, na dra ni vaini.
15A sa uro mai na Yisuruni, ka caqe: o sa uro mai, ko sa yagolevu, ko sa tabonaki e na uro; era sa qai biuta na Kalou sa cakavi ira, ka beci koya na Uluvatu sa bula kina ko ira.
16Era sa vakavu-vutaki koya e na ka tani e so, era sa vakacudrui koya e na ka vakasisila e so.
17Era cabocabo ki na tevoro e so, ka sega vua na Kalou; ki na kalou e so era a tawa kila, sa veika vou sa qai tubu voleka mai, ka tawa rerevaka ko ira na nomudou qase.
18O sa tawa nanumi koya na Uluvatu ko sa tubu maikina, a sa guilecava na Kalou sa buli iko.
19A sa raica ko Jiova, ka vakasisilataki ira, e na vuku ni nodra ka veivakacudrui na luvena tagane, kei na luvena alewa.
20A sa kaya ko koya, Au na vunia vei ira na mataqu, au na raica na kedrai otioti: ni ra sa kawa dauyalovakatani ko ira, na gone sa dau sega ni dina.
21Era sa vakavuvutaki au e na vuku ni ka sa sega ni Kalou; era sa vakacudrui au e na nodra veika vakailasu: ia kaʼu na vakavuvutaki ira e na vukudra era sega ni noqu tamata: au na vakacudrui ira e na matanitu se-sewa.
22Ni sa vakawaqaci na buka e na noqu cudru, ena kama talega me yaco va na ca-vuni era, ka kania na vuravura kei na vuana, ka vakamai ira na vu ni veiulu-ni-vanua.
23Au na binia vei ira na ka rarawa; au na vakaotia vei ira na noqu veigasau.
24Era na suivotu e na dausiga, ka kani e na katakata levu, kei na veivakamatei gaga: au na tala talega vei ira na bati ni manumanu tawa lasa, kei na weli gaga ni gata ni qele.
25Ai seleiwau etautuba, kei na rere levu eloma, ena vakamatea na cauravou kei na gonealewa, na gone sa sucu tiko, kei na tamata e sika na uluna.
26Au a kaya, Au na vakasevi ira ki na tikina vuni, au na muduki ira me ra kakua ni nanumi tale vei ira na tamata:
27kevaka kaʼu sa sega ni Rerevaka na cudru ni meca, de ra yalovakatani ko ira era vakasaurarataki ira, io de ra kaya, Sa cecere na ligada, a sa sega ni kitaka na ka o qo ko Jiova
28Ni ra sa matanitu sa yali vei ira na vuku, ka sa sega vei ira na yalomatua.
29Me ra vuku mada, me ra kila vinaka na ka o qo, me ra vakananumi ki na kedrai otioti!
30Ena vakaseva rawa vakaevei e dua na udolu e lewe dua vei ira, ka vakaseva e tini na udolu e lewe rua, kevaka sa sega ni volitaki ira ko koya na nodra Uluvatu, ka sogolati ira mai ko Jiova?
31Ia na nodra uluvatu sa sega ni tauvata kei na noda Uluvatu, io ni ra sa lewa ko ira na noda meca.
32Ni sa vaini ni Sotoma na nodra vaini, ka mai na vanua kei Komora: a nodra vua ni vaini sa vua ni vaini e vaka na mi, ka sa gaga na nodra yawa vaini:
33a nodra waini na weli gaga ni gata levu, kei na gaga katakata ni gata ca sara.
34Sa sega ni bini li vei au, ka dregati tu kei na noqu yau,
35me noqu na veicudruvaki, kei na veisaumi? ena yaco na gauna me tidara kina na yavadra: ni sa toro mai na siga me ra ca kina, a sa kusarawa mai na ka ena yacovi ira.
36Ena lewai ira na nona tamata ko Jiova, ka veivutuni e na vukudra na nonai talatala, ni sa raica ni sa oti na kaukauwa, ka sa sega e dua sa sogolati se dua sa lako voli.
37Ni sa kainaki, Evei na nodra veikalou, na uluvatu era sa dauvakararavi kina,
38sa daukania na uro ni nodrai soro, ka gunuva na waini ni nodrai madrali liviraki? me ra tu cake mada ka vukei kemudou, me ra vakarurugi kemudou.
39Dou raica mada ni sai koya koi au duaduaga, ka sega keirau kalou kaya: au sa ia na veivakamatei, kaʼu sa ia talega na veivakabulai; au sa ia na vei-yaviti, kaʼu sa ia na veivakabulai: ka sa sega e dua me Vakabula mai na ligaqu.
40Niʼu sa dodoka yani na ligaqu kivaka ki lomalagi, ka kaya, Oi au, kaʼu sa bula ka tawa mudu.
41Kevaka kaʼu sa va-gatara na noqui seleiwau e makumakua-liliva, a sa tara na lewa na ligaqu; au na qai cudruvaki au vei ira na noqu meca, ka sauma vei ira era cati au.
42Au na vagunuva na noqu veigasau me mateni e na dra, ena kania talega na lewe ni tamata na noqui seleiwau; e na dra ni moku kei na bobula, vei ira sa liu, ko ira na turaga ni meca.
43Dou reki vata, na veimatanitu, kei ira na nona tamata: ni na sauma ko koya na nodra dra na nonai talatala; ka cudruvaki koya vei ira na nona meca, ka vakadonuya nai bulubulu e na vuku ni nona vanua, io ko ira na nona tamata.
44A sa lako mai ko Mosese, ka cavuta kecega na vosa ni meke o qo e na daligadra na tamata, ko koya, kei Josua na luve i Nuni.
45Ia ni sa cavuta oti na vosa kecega o qo ko Mosese vei ira kecega na Isireli:
46sa qai kaya vei ira, Dou vaqara na lomamudou ki na vosa kecega kaʼu sa tukuna vei kemudou e na siga o qo, dou na vakaroti ira kina na luvemudou me ra vakabauta me cakava, na vosa kecega ni vunau o qo.
47Ni sa sega ni ka wale vei kemudou, sa ka ga mo dou bula kina: ia e na ka o qo ena balavu kina na nomudou bula e na vanua, dou sa lako-kosova kina na Joritani me taukena.
48A SA vosa vei Mosese ko Jiova e na siga dina ko ya, ka kaya,
49Mo cabeta na ulu-ni-vanua o qo ko Aparimi, io na ulu-ni-vanua ko Nipo, e na vanua ko Moapi, sa donui Jeriko; ka raica na vanua ko Kenani, kaʼu sa solia vei ira na luve i Isireli me ra taukena:
50ia ko na mate e na ulu-ni-vanua ko sa cabeta, ia ko na soqoni vata kei ira na kai nomu; me vaka sa mate ko Eroni na tuakamu mai na ulu-ni-vanua ko Ori, a sa soqoni vata kei ira na kai nona:
51e na vuku ni drau a talaidredre vei au e na kedra maliwa na luve i Isireli mai na wai ni Miripa-Ketesa, mai na lekutu ko Sini; e na vuku ni drau a tawa vakarokorokotaki au e na kedra maliwa na luve i Isireli.
52Ia ko na raica vakayawa ga na vanua; ia ko na sega ni lako yani kikeri, ki na vanua kaʼu sa solia vei ira na luve i Isireli.
Who We AreWhat We EelieveWhat We Do
2025 by iamachristian.org,Inc All rights reserved.
