Nai Vakarua 31 - AI VOLA TABU（FIJ1864）

Sa vosavaqaqataki ira na tamata ko Mosese, 1-6, kei Josua, 7, 8. Sa solia na vunau vei ira na bete, 9-13, 24-27. A vunau vei Josua, 14, 15, 23. Me vakavulici na meke i Mosese vei ira na tamata, 16-22. Sa kaya ko Mosese me ra soqoni vata me rogoca na nona meke, ni sa voleka na nona mate, 28-30.

1A SA lako ko Mosese ka tukuna na vosa o qo vei ira kecega na Isireli.

2A sa kaya vei ira, Sa dua na drau ka ruasagavulu na noqu yabaki e na siga o qo; sa dredre meʼu daucuru yani tiko ka daucuru mai: a sa kaya vei au ko Jiova, O na sega ni lako-kosova na Joritani o qo.

3O Jiova na nomu Kalou, ena liutaki iko ko koya, ena vakaoti ira ko koya na veimatanitu o qo e matamu, ia ko na ra-wati ira: ko Josua, ena liutaki iko ko koya, me vaka sa kaya ko Jiova.

4Ia ena cakava vei ira ko Jiova me vaka ka cakava vei Sioni kei Oki, na nodra tui na luve i Amori, ka ki na nodrau vanua, koi rau sa vakarusa ko koya.

5Ia ena soli ira e na matamudou ko Jiova, mo dou kitaka kina vei ira me vaka nai vakaro kecega kaʼu sa vakarota vei kemudou.

6Dou kaukauwa ka qaqa, kakua ni rere se sautaninini e na vukudra: ni sa lako vata kei iko ko Jiova na nomu Kalou, ena sega ni gu ca vei iko, se biuti iko.

7A sa kacivi Josua ko Mosese, ka sa kaya vua e matadra kecega na Isireli, Mo kaukauwa ka qaqa: ni ko na lako kei ira na tamata o qo ki na vanua sa vosavavakini kina ko Jiova vei ira na nodra qase me solia vei ira; ia ko na cakava me ra taukena.

8Ia ko Jiova ga, ko koya sa liutaki iko, ena tiko vata kei iko ko koya, ena sega ni gu ca vei iko, se biuti iko: mo kakua ni rere, se yalolailai.

9A sa vola na vunau o qo ko Mosese, ka solia vei ira na bete na luve i Levi, era daucolata na kato ni veiyalayalati i Jiova, vei ira talega na qase kecega ni Isireli.

10A sa vakaroti ira ko Mosese, ka kaya, Ni sa oti na yabaki e vitu, e na gauna sa lokuci me yabaki ni vei-sereki, e na solevu ni vale taba ni kau,

11ni ra sa lako mai kecega na Isireli me rairai e na mata i Jiova na nomu Kalou e na yasana sa digitaka ko koya, mo wilika na vunau o qo e na matadra kecega na Isireli me ra rogoca.

12Mo vakasoqoni ira na tamata, na tagane, kei na alewa, kei na lalai, kei na nomu kai tani sa tiko e na nomu lomanibai, me ra rogoca, ka me ra vuli kina, ka rerevaki Jiova na nomuni Kalou, ka vakabauta me cakava na vosa kecega ni vunau o qo:

13ka me rogoca ko ira na luvedra era sa tawa kila eliu, ka me vuli me rerevaki Jiova na nomuni Kalou, e na gauna kecega kemuni na bula kina e na vanua kemuni sa lako-kosova kina na Joritani me taukena.

14A sa kaya vei Mosese ko Jiova, Raica, sa toro mai na nomu siga mo mate kina: kacivi Josua, ka laʼki vakaraitaki kemudrau e na vale gatu ni veitata, meʼu vakaroti koya. A rau a lako ko Mosese kei Josua, ka vakaraitaki rau e na vale gatu ni veitata.

15A sa rairai mai ko Jiova e na Vale gatu e na duru o: a sa tu na duru o ka donuya na katuba ni Vale gatu.

16A sa kaya vei Mosese ko Jiova, Raica, ko na moce vata kei ira na nomu qase: a ra na ia na tamata o qo, ka lako vakatani ni ra muria na veikalou ni kai tani era lewe ni vanua era lako kina ki na kedra maliwa, ia era na biuti au, ka vakacataka na noqu veiyalayalati kaʼu a kitaka kei ira.

17Ena qai waqa mai na noqu cudru vei ira e na siga ko ya, ia kaʼu na biuti ira, ka vunia vei ira na mataqu, a ra na kani, ia ena yacovi ira na ka ca e vuqa kei na rarawa; era na kaya kina e na siga ko ya, Sa sega li ni yacovi keda na ka ca kecega o qo, e na vuku ni sa sega ni tiko kei keda na noda Kalou?

18Ia kaʼu na vunia vakaidina na mataqu e na siga ko ya, e na vuku ni ka ca kecega era sa cakava, ni ra sa lesu tani ki na kalou tani e so.

19Ia o qo, mo dou vola vei kemudou na meke o qo, ka vakavulica vei ira na luve i Isireli: mo tauca ki na gusudra, me noqui tukutuku na meke o qo e vukudra na luve i Isireli.

20Niʼu sa kauti ira oti ki na vanua sa dave kina na wai-ni-sucu kei na oni, a ya kaʼu a vosavavakini kina ki na nodra qase; a ra sa kana ka mamau, ka uro mai; era na qai lesu tani ki na kalou tani e so, ka qaravi ira, ka beci au, ka vakacataka na noqu veiyalayalati.

21Ia ena yaco, ni sa yacovi ira na ka ca kei na ka rarawa e vuqa, ena qai tukuna e matadra na ka sa caka ko na meke o qo; ni na tawa guilecavi mai na gusu ni nodra kawa: niʼu sa kila na nodrai naki era sa veinanuyaka, io e na gauna o qo, niʼu sa sega ni kauti ira oti ki na vanua kaʼu a vosavavakini kina.

(

22A sa vola na meke o qo ko Mosese e na siga ko ya, ka vakavulica vei ira na luve i Isireli.)

23A sa vakaroti Josua na luve i Nuni, ka kaya, Mo kaukauwa ka qaqa: ni ko na kauti ira na luve i Isireli ki na vanua kaʼu a vosavavakini kina vei ira: ia kaʼu na tiko vata kei iko.

24A sa yaco, ni sa vola oti e nai vola na vosa ni vunau o qo ko Mosese, me oti sara,

25sa qai vakarota ko Mosese vei ira na luve i Levi era daucolata na kato ni veiyalayalati i Jiova, ka kaya,

26Dou taura nai vola o qo ni vunau, ka viria ki na sarisari ni kato ni veiyalayalati i Jiova na nomudou Kalou, me toka maikina me beitaki iko.

27Niʼu sa kila koi au na nomu talaidredre, kei na nomu domoqa: raica, niʼu sa bula tiko kei kemudou e na siga o qo, dou sa talaidredre ga vei Jiova; ia ena levu cake sara niʼu sa mate oti!

28Dou vakasoqoni ira vata vei au na qase kecega ni nomudou veiyavusa, kei ira na nomudou turaga lalai, meʼu tukuna kina na vosa o qo e daligadra, ka cavuti lomalagi kei vuravura me kilai ira ni ra ca.

29Niʼu sa kila, niʼu sa mate oti, kemudou na vakacacani kemudou sara, ka lesu tani mai na sala kaʼu sa vunautaka vei kemudou; ena yacovi kemudou talega na ca e na gauna maimuri; e na vuku ni dou na caka ca e na mata i Jiova, me vakacudrui koya e na cakacaka ni ligamudou.

30A sa cavuta na vosa ni meke o qo ko Mosese e na daligadra kecega nai vavakoso ni Isireli, me oti sara: