Nai Vakarua 30 - AI VOLA TABU（FIJ1864）

Ena lomani ira sa veivutuni ko Jiova, 1-10. Sa kilai rawarawa na vunau ni Kalou, 11-14. Sa tukuni vei ira na bula kei na mate, me ra digitaka e dua, 15-20.

1IA ni sa yacovi iko na ka kecega o qo, na vosa ni veivakalougatataki kei na vosa ni veivakarusai, o koya kaʼu sa tauca e matamu, ia ko na sa nanuma e loma ni matanitu kecega sa vakasevi iko tani kina ko Jiova na nomu Kalou,

2ka sa lesu mai kina vei Jiova na nomu Kalou, ka talairawarawa ki na domona, me vaka na ka kecega kaʼu sa vakarota vei iko edaidai, o iko kei ira na luvemu, e na lomamu taucoko, kei na yalomu taucoko;

3ena qai vukica na nomu vakabobulataki ko Jiova na nomu Kalou, ka lomani iko, ka lesu ka kumuni iko vata tale mai na matanitu kecega, sa dui vakasevi iko kina ko Jiova na nomu Kalou.

4Kevaka sa vakasevi tani e so na nomu ki nai yalayala kei lomalagi, ena kumuni iko vata maikina ko Jiova na nomu Kalou, ka kauti iko maikina:

5ka vakayacori iko ko Jiova na nomu Kalou ki na vanua ka ra taukena na nomu qase, ka ko na taukena; ka na caka vinaka vei iko ko koya, ka vakatuburi iko mo lewe vuqa, ka lewe lailai na nomu qase.

6Ena ciliva talega na yalomu ko Jiova na nomu Kalou, kei na yalodra na nomu kawa, me lomani kina ko Jiova na nomu Kalou e na lomamu taucoko, kei na yalomu taucoko, mo bula kina.

7Ena vakayacora talega ko Jiova na nomu Kalou na ruru kecega o qo vei ira na nomu meca, kei ira era sa cati iko, ka vakacacani iko.

8Ia ko na lesu ka vakarorogo ki na domo i Jiova, ka cakava na nona vunau kecega kaʼu sa vakarota vei iko edaidai.

9Ia ena vakavutuniyautaki iko ko Jiova na nomu Kalou e na cakacaka kecega ni ligamu, e na vua ni ketemu, kei na vua ni nomu manumanu e yavai va, kei na vua ni nomu vanua, mo vinaka kina: ni na qai rekitaki iko tale ko Jiova me caka vinaka, me vaka ka rekitaki ira na nomu qase:

10kevaka ko na vakarorogo ki na domo i Jiova na nomu Kalou, me vakabauta na nona vunau kei na nona veilesilesi sa volai e nai vola o qo ni vunau, kevaka ko sa lesu mai vei Jiova na nomu Kalou e na lomamu taucoko, kei na yalomu taucoko.

11Ni sa sega ni vuni vei iko na vunau o qo kaʼu sa vunautaka vei iko edaidai, ka sa sega talega ni vakayawa.

12Sa sega mai lomalagi, me kainaki kina, O cei me lako cake e na vukuda ki lomalagi, ka kauta mai vei keda, me da rogoca, ka cakava?

13A sa sega mai tai kadua ni Wasawasa, me kainaki kina, O cei me lako ki na tai kadua ni Wasawasa e na vukuda, ka kauta mai vei keda, me da rogoca, ka cakava?

14Ia ka sa voleka sara vei iko na vosa, e na gusumu, kei na lomamu, mo cakava rawa.

15Raica, kaʼu sa tauca e matamu edaidai na bula kei na ka vinaka, na mate talega kei na ca;

16niʼu sa vakaroti iko edaidai mo lomani Jiova na nomu Kalou, me lako e nona sala, ka me vakabauta na nona vunau kei na nona veilesilesi kei na nona lelewa, mo bula kina ka tubu me lewe vuqa: me vakalougatataki iko talega ko Jiova na nomu Kalou e na vanua ko sa lako kina mo taukena.

17Ia kevaka sa lesu tani na lomamu, mo bese kina ni vakarorogo, ka sa vecei tani ga, ka soro ki na kalou tani e so, ka qaravi ira;

18au sa tukuna vei kemuni e na siga o qo, kemuni na rusa vakaidina, ena sega ni balavu na nomuni bula e na vanua, ko sa lako-kosova kina na Joritani mo taukena.

19Au sa cavuti lomalagi kei vuravura edaidai me kila, niʼu sa tauca e matamu na bula kei na mate, na kalougata kei na cudru: ia mo digitaka mada na bula, mo dou bula kina, ko iko kei na nomu kawa:

20mo lomani Jiova kina na nomu Kalou, mo vakarorogo ki na domona, mo kabiti koya talega: ni sa nomu vu-ni-bula ko koya, kei koya sa vakabalavutaka na nomu bula: mo tiko kina e na vanua sa vosavavakini kina ko Jiova vei iratou na nomu qase, vei Eparaama, vei Aisake, kei Jekope, me solia vei iratou.