1SA vakaoqo na vosa ni veiyalayalati, sa vakarota vei Mosese ko Jiova me kitaka kei ira na luve i Isireli e na vanua ko Moapi, mei kuri ni veiyalayalati sa kitaka kei ira mai Orepi.
2A sa kacivi ira kecega na Isireli ko Mosese, ka kaya vei ira:
Kemuni sa kunea na ka kecega sa cakava ko Jiova e na matamuni e na vanua ko Ijipita kivei Fero, vei ira talega na nona tamata kecega, ki na nona vanua kece talega;
3na veivakatovolei sa kunea na matamu, na veivakatakilakila, kei na veika-mana lelevu o qori:
4ia ka sa sega ni solia vei kemuni ko Jiova na loma kila-ka, kei na mata rai, kei na daliga rogo, ka yacova na siga o qo.
5Ia sa vasagavulu na yabaki kaʼu sa tuberi kemuni voli mai na lekutu: a nomuni sulu kemuni sa vakaisulu kina sa sega ni madra mai, ka sa sega ni madra mai na nomui vava e na yavamu.
6Kemuni sa sega ni kana madrai, kemuni sa sega talega ni gunuva na waini se na yaqona kaukauwa: mo ni kila kina ni sa ko Jiova koi au na nomuni Kalou.
7Ia ni kemuni sa yaco ki na yasana o qo, sa lako mai me vala kei keda ko Sioni na tui Esiponi, kei Oki na tui Pasani, ia eda a yaviti rau;
8eda sa rawata talega na nodrau vanua, ka solia vei ira na luve i Rupeni me ra taukena, kei ira na luve i Kata, kei na wase e dua ni yavusa i Manase.
9Ia mo ni vakabauta na vosa ni veiyalayalati o qo ka cakava, mo ni vinaka kina e na ka kecega kemuni sa cakava.
10Kemuni sa tu kecega edaidai e na mata i Jiova na nomuni Kalou: na nomuni veituraga e na nomuni veiyavusa, na nomuni qase, kei na nomuni turaga lalai, na tamata kecega ni Isireli,
11na nomuni lalai, na watimuni, kei na vulagi sa tiko e na nomu koro, ko koya sa dauta buka kei koya sa dautaki wai:
12mo vauci kina e na veiyalayalati i Jiova na nomu Kalou, kei na nona vosa vavakini, a ya sa cakava vei iko edaidai ko Jiova na nomu Kalou:
13me vakataudeitaki iko edaidai ko koya mo nona matanitu, ka me nomu Kalou ko koya, me vaka ka kaya ko koya vei iko, me vaka talega na nona vosavavakini vei iratou na nomu qase, vei Eparaama, vei Aisake, kei Jekope.
14Ia ka sega vei kemudou walega kaʼu sa cakava na veiyalayalati o qo kei na vosa vavakini o qo;
15ia vei koya sa tu vata kei keda edaidai e na mata i Jiova na noda Kalou, vei koya talega sa sega ni tu vata kei keda e na siga o qo:
16(Ni dou sa kila na noda tiko mai Ijipita; kei na noda lako voli e loma ni veimatanitu dou a lako voli kina;
17ia dou a raica na nodra veika vakasisila kei na nodra veimatakau, na kau kei na vatu, na siliva kei na koula, sa tiko vei ira:)
18de dua na tagane vei kemuni, se na alewa, se na mataqali, se na yavusa, sa vuki tani edaidai na yalona vei Jiova na noda Kalou, me laʼki qaravi ira na kalou ni veimatanitu o qori; de dua vei kemudou na waka sa tubu maikina na gaga kei na gaga-duvaduva;
19ka sa yaco ni sa rogoca na vosa ni ruru o qo, ka sa vosavakalougatataki koya e na yalona, ka kaya, Au na sega ni tarovi mai na ka vinaka niʼu sa muria na ka sa nanuma na lomaqu; ka me kuria na viagunu e na mateni ko koya:
20ena bese ni vosoti koya ko Jiova, ia ena qai kubou mai na cudru i Jiova kei na nona vuvu ki na tamata ko ya, ia ena tauci koya na ruru kecega sa volai e nai vola o qo, ia ena bokoca laivi na yacana ko Jiova mai ruku ni lomalagi.
21Ia ena tawasei koya ki na ca ko Jiova, mai na matanitu kecega ni Isireli, me vaka na ruru kecega ni veiyalayalati sa volai e nai vola ni vunau o qo.
22Ia nai tabatamata e tubu era sa luvemuni era na muri kemuni, kei na kai tani sa lako mai na vanua vakayawa, era na kaya, ni ra sa raica na mate levu ni vanua ko ya, kei na rarawa sa vakayacora kina ko Jiova;
23ni sa sulifuri ka masima na vanua taucoko, sa kama, sa sega ni tei, ka sa tawa vuataka, se vakatubura na co, sa vaka ni sa vakarusai ko Sotoma kei Komora, ko Etima, kei Sepoimi, a ya sa vakarusa ko Jiova e nona cudru kei na nona lesa:
24ia era na kaya na veimatanitu kecega, A cava sa cakava kina ko Jiova na ka o qo ki na vanua o qo? sa vakaevei na katakata ni cudru levu o qo?
25Ena qai kainaki, E na vuku ni ra sa biuta na veiyalayalati kei Jiova na Kalou ni nodra qase, a ya sa kitaka kei ira ko koya ni sa kauti ira ko koya mai na vanua ko Ijipita:
26ni ra sa laʼki qarava na kalou tani e so, ka soro kina, na veikalou era tawa kila eliu, ka sa sega ni soli vei ira:
27a sa waqa mai na cudru i Jiova ki na vanua o qo, me vakayacora kina na ruru kecega sa volai e nai vola o qo:
28a sa cavuivuvutaki ira tani mai na nodra vanua ko Jiova, e na cudru, kei na lesa, kei na veilevaci levu, ka biuti ira ki na vanua tani, me vaka e na siga o qo.
29A ka sa vuni tu sa nei Jiova na noda Kalou; ia na ka sa tukuni mai sa noda kei na nodra na luveda ka tawa mudu, me da cakava kina na vosa kecega ni vunau o qo.
Who We AreWhat We EelieveWhat We Do
2025 by iamachristian.org,Inc All rights reserved.
