Nai Vakarua 28 - AI VOLA TABU（FIJ1864）

A ka ni veivakalougatataki vei ira sa talairawarawa, 1-14. A ka ni veivakarusai vei ira sa talaidredre, 15-68.

1IA ena yaco, kevaka ko na vakarorogo vakaidina ki na domo i Jiova na nomu Kalou, mo vakabauta me cakava na nona vunau kecega kaʼu sa vunautaka vei iko edaidai, ena qai laveti iko cake ko Jiova na nomu Kalou mo cecere vei ira kecega na matanitu e vuravura:

2ia ena yacovi iko na ka ni veivakalougatataki kecega o qo, ka vauci iko, kevaka ko na vakarorogo ki na domo i Jiova na nomu Kalou:

3O na kalougata e na koro, ko na kalougata talega e na veiwere.

4Ena kalougata na vua ni ketemu, kei na vua ni nomu vanua, kei na vua ni nomu manumanu e yavai va, na luve ni nomu karavau, kei na nomu qele ni sipi.

5Ena kalougata na nomu sova kei na nomu lololo.

6O na kalougata ni ko curu mai, ko na kalougata talega ni ko sa curu yani.

7A nomu meca era tu cake vei iko, ena soli ira ko Jiova me ra moku e matamu: era na lako mai e na sala e dua me tavaki iko, ka ka-boasese e matamu e na sala e vitu.

8Ena vakarota ko Jiova mo kalougata e na nomu lololo, kei na ka kecega sa dodo kina na ligamu; ia ena vakalougatataki iko: e na vanua sa solia vei iko ko Jiova na nomu Kalou.

9Ena vakataudeitaki iko ko Jiova mo nona matanitu tabu, me vaka ka vosavavakini vei iko ko koya, kevaka ko na vakabauta na vunau i Jiova na nomu Kalou, ka lako e na nona sala.

10A ra na raica na matanitu kecega e vuravura ni sa vakatokai vei iko na yaca i Jiova; a ra na rerevaki iko.

11Ia ena vakalevutaka na nomu yau ko Jiova, e na vua ni ketemu, kei na vua ni nomu manumanu e yavai va, kei na vua ni nomu vanua, e na vanua sa vosavavakini kina ko Jiova vei ira na nomu qase me solia vei iko.

12Ena dolava vei iko ko Jiova na nona lololo vinaka, na lomalagi, me vakatauca na uca ki na nomu vanua e na vula e dodonu, ka me vakalougatataka na cakacaka kecega ni ligamu: ka ko na solia-sarava ki na matanitu e vuqa, ia ko iko ko na sega ni sarava na ka.

13Ia ena cakavi iko ko Jiova mo uludra, ka sega ni buidra; ia ko na dauce-cere ka sega ni lolovira; kevaka ko na vakarorogo ki na vunau i Jiova na nomu Kalou, a ya kaʼu sa vakarota vei iko edaidai, mo vakabauta ka cakava:

14ka ko na sega ni lako tani mai na vosa e dua kaʼu sa vunautaka vei iko edaidai, ki nai matau, se nai mawi, me muria e so na kalou tani me qaravi ira.

15Ia ena yaco, kevaka ko na tawa vakarorogo ki na domo i Jiova na nomu Kalou, mo vakabauta me cakava na nona vunau kecega kei na nona veilesilesi kaʼu sa vakaroti iko kina edaidai; ena qai yacovi iko ka vauci iko na ka ca kecega o qo:

16O na cudruvi e na koro, ko na cudruvi talega e na veiwere.

17O na cudruvi e na nomu sova kei na nomu lololo.

18Ena cudruvi na vua ni ketemu, kei na vua ni vanua, na luve ni nomu karavau, kei na nomu qele ni sipi.

19O na cudruvi ni ko curu mai, ko na cudruvi talega ni ko curu yani.

20Ena vakayacora vei iko ko Jiova na lesa, na rarawa, kei na cudru, e na ka kecega sa dodo kina na ligamu mo cakava, ka mo oti mada, ka mo rusa vakasauri; e na vuku ni ca ni nomui valavala, ko sa biuti au kina.

21Ena vakabita vei iko ko Jiova na mate ca, ka me vakaoti iko mada ko koya mai na dela ni vanua, ko sa lako kina me taukena.

22Ena yaviti iko ko Jiova e na lila, kei na katakata waqawaqa, kei na karovisa katakata, kei na waqawaqa ni yago, kei nai seleiwau, kei na cagi todra, kei na vu ni malai; a ra na muri iko tiko mo rusa mada.

23Ia na nomu lomalagi ecake sa donuya na ulumu ena parasa, kei na qele e rukumu ena aironi.

24Ena cakava ko Jiova na uca ni nomu vanua me nuku ka kuvu ni soso: ena tauci iko mai lomalagi, ka mo vakarusai mada.

25Ena soli iko ko Jiova mo moku e na matadra na nomu meca: ko na lako yani e na sala e dua me tavaki ira, ka kaboasese e na sala e vitu e na matadra: ia ko na kauti tani ki na matanitu kecega e vuravura.

26Ia na yagomu mate ena kedra kakana na manumanu kecega ni lomalagi, kei na manumanu tawa lasa ni vanua, ka sega na tamata me kuruya tani.

27Ena yaviti iko ko Jiova e na bo ni Ijipita, kei na bo e rubumu, kei na bu ca, kei na milamila, ko na sega ni vakabulai rawa kina.

28Ena yaviti iko ko Jiova mo lialia, ka mataboko, me kidacala talega na lomamu:

29ia ko na vakayayamo voli e na siga levu, me vaka sa vakayayamo voli na mataboko e na butobuto, ia ena tawa yaco na ka ko cakava: ia ko na vakasaurarataki, ka daukovei tikoga, ia ena sega nai vakabula.

30O na veiyalayalati kei na alewa me watimu, ia ena koto kaya na tamata tani: ko na tara na vale, ia ko na tawa tiko kina: ko na tea na veivaini, ia ko na tawa tauca na vuana.

31A nomu karavau ena vakamatei e matamu, ia ko na tawa kana kina: a nomu asa ena koveraki tani e matamu, ka sega ni vakasukataki vei iko: a nomu sipi ena soli yani vei ira na nomu meca, ia ena sega e dua me kauta tale mai vei iko.

32A luvemu tagane kei na luvemu alewa era na soli ki na kai tani, ia ena rai matua tiko na matamu, ka oca e na vukudra e na siga ka bogi: ia ena malumalumu na ligamu.

33Era na kania na vua ni nomu vanua, kei na nomu cakacaka kecega, e dua na matanitu ko sa tawa kila; ia ko na vakasaurarataki ga ka butu qaqi tikoga:

34ia ko na lialia e na vuku ni ka e rairai rawa ki na matamu, a ya ko na raica.

35Ena yavita na durumu kei na yavamu ko Jiova, e na bo rarawa sa sega ni vakabulai rawa, mai na qeteqete ni yavamu ka cavaraka na buradelamu.

36Ena kauti iko ko Jiova, kei na nomu tui ko na bulia me lewai iko, ki na matanitu e dua ko sa tawa kila, ko iko, se ko ira na nomu qase; ia ko na qarava maikina e so na kalou tani, na kau kei na vatu.

37Ia ko na yaco me ka vei-vakurabui, nai bole, kei na ka e dredre-vaki, e na kedra maliwa na matanitu kecega sa kauti iko kina ko Jiova.

38E levu na sore ni sila ko na kauta tani ki na nomu were, ka lailai na ka ko na kumuna tale mai; ni na kania na vodre.

39O na tea na veivaini, ka samaka, ia ko na tawa gunuva na waini, se kumuna vata na vuana; ni na kania na baca.

40Ena so na nomu kau olive e na nomu yasana kecega, ia ko na tawa lumuti iko e na waiwai; ni na lutu dole na vua ni nomu olive.

41Ena sucu vei iko na goneatagane kei na gonealewa, ia era na sega ni dei vei iko; ni ra na kauti vakabobula.

42Ena kania na nomu kau kecega kei na vua ni nomu vanua na maka.

43Na kai tani sa tiko kei iko ena tubu cake me cecere sara vei iko; ia ko iko, ko na lako sobu me lolovira sara.

44Ena soli-sarava vei iko ko koya, ka ko na sega ni soli-sarava vua: ena ulumu ko koya, ia ko iko ko na buina.

45Ia na ca kecega o qo ena yacovi iko, ka muri iko, ka vauci iko, ka mo vakarusai mada; e na vuku ni ko a tawa vakarorogo ki na domo i Jiova na nomu Kalou, me vakabauta na nona vunau kei na nona veilesilesi sa vunautaka vei iko ko koya:

46ia era na tiko vei iko mei vakatakilakila, kei na ka veivakidacalataki, vei ira talega na nomu kawa ka tawa mudu.

47E na vuku ni ko a sega ni qaravi Jiova na nomu Kalou e na marau, kei na rereki ni yalomu, e na vuku ni sa levu tu na ka kecega;

48o koya ko na qaravi ira kina na nomu meca sa tala ko Jiova me vala kei iko, e na viakana, kei na viagunu, kei na luvawale, kei na dravudravua e na ka kecega: ia era na vauca ki domomu nai vau kaukamea, ka me vakarusai iko mada.

49Ena kauta vakayawa mai ko Jiova e dua na matanitu me vala kei iko, mai nai yalayala kei vuravura, me vaka na vuka ni ikeli; a matanitu ko sa sega ni kila na kena vosa;

50a matanitu sa mata lisoliso, sa na sega ni dokai ira na qase, se lomani ira na cauravou:

51ia ena kania ko ira na vua ni nomu karavau, kei na vua ni nomu vanua, ka mo vakarusai mada: ena sega talega ni vakavoca vei iko na sila, na waini, se na waiwai, se na luve ni nomu karavau, se na nomu qele ni sipi, ka me vakarusai iko mada:

52ia era na bukia na druadrua vei iko e na nomu veikoro kecega, ka me bale sobu mada na nomu bai cecere ka kaukauwa, na ka ko a vakararavi kina, e na nomu vanua kecega: ia era na bukia na druadrua vei iko e na nomu Veikoro kecega e na nomu vanua kecega, a ya sa solia vei iko ko Jiova na nomu Kalou.

53Ia ko na kania na vua ni ketemu, na lewe ni luvemu tagane kei na luvemu alewa, ko ira sa solia vei iko ko Jiova na nomu Kalou, ni sa buku na druadrua, e na vuku talega ni ka rarawa sa vakararawataki iko kina na nomu meca:

54na tamata vei kemudou sa daurerere ka daumamarau sara, ena ca na matana vua na wekana, vei koya talega na watina sa koto e lomaserena, ka vei ira na vo ni luvena sa vakavoca ko koya:

55sa sega kina ni solia ki na dua vei ira e dua na tiki ni lewe ni luvena sa kania ko koya: ni sa sega ni vo vua e dua na ka e na buku ni druadrua, kei na rarawa sa vakararawataki iko kina na nomu meca e na nomu veikoro kecega:

56na alewa vei kemudou sa daurerere ka daumamarau, sa sega ni vakatovolea me tara na qele e na qeteqete ni yavana, e na vuku ni daumamarau kei na daurerere, ena ca na matana vua na watina sa koto e na lomaserena, vua talega na luvena tagane, kei na luvena alewa,

57ki nai tokatoka-ni-gone talega sa lako mai na ketena; vei ira talega na luvena sa vakasucuma ko koya: ni na kania e vuni ko koya e na vuku ni sa dravudravua e na ka kecega, e na buku ni druadrua, kei na rarawa sa vakararawataki iko kina na nomu meca e na nomu Veikoro.

58Kevaka ko sa bese ni vakabauta me cakava na vosa kecega ni vunau o qo sa volai e nai vola o qo, ka mo rerevaka na yaca rogo ka rerevaki o qo, O JIOVA NA NOMU KALOU;

59ena qai cakava ko Jiova me ka veivakidacalataki na ka ko yaviti kina kei na ka ena yaviti kina na nomu kawa, ni dou sa yaviti vakalevu ka vakadede, ka mate rarawa ka vakadede.

60Ena vakayacora talega vei iko na mate kecega ni Ijipita ko sa daurerevaka; ia ena kabiti iko.

61Ia na mate kecega, kei na rarawa kecega, a ya sa sega ni volai e nai vola ni vunau o qo, ena vakayacora vei iko ko Jiova, ka mo vakarusai mada.

62Ia dou na vo ka lewe lailai, ka na sega tiko ni vaka na veikalokalo ni lomalagi e na lewe vuqa; e na vuku ni ko a bese ni vakarorogo ki na domo i Jiova na nomu Kalou.

63Ia me vaka ka rekitaki kemuni ko Jiova me caka vinaka vei kemuni, ka me vakalewe-vuqataki kemuni; ena rekitaki kemuni vakakina ko Jiova me vakarusai kemuni, ka vakaoti kemuni; ia kemuni na cavuti tani mai na vanua ko sa lako kina me taukena.

64Ia ena dui vakasevi iko ko Jiova vei ira na matanitu kecega, mai nai yalayala e dua kei vuravura ka yacova na kenai yalayala kadua; ia ko na qarava maikea na kalou tani e so, ko a tawa kila, ko iko se ko ira na nomu qase, io na kau kei na vatu.

65Ia e na veimatanitu o qo ko na sega ni tiko vinaka, ka na sega ni vakacegu na qeteqete ni yavamu: ia ena vakayacora vei iko ko Jiova na yalo e sautaninini, kei na mata e rai cala, kei na loma rarawa:

66ia ena tautauwalili vei iko na nomu bula; ia ko na rere e na siga kei na bogi, ka sega ni dinata ni ko na bula:

67e na mataka ko na kaya, Me yakavi mada! ia e na yakavi ko na kaya, Me mataka mada! e na vuku ni rere ni lomamu ko sa rere kina, kei na ka e rairai rawa ki na matamu, a ya ko na raica.

68Ia ena kauti iko tale ki Ijipita ko Jiova e na veiwaqa, ki na yasana kaʼu a kaya kina vei iko, Ko na sega ni raica tale: ia kemuni na volitaki maikea vei ira na nomuni meca me tagane bobula, ka alewa bobula, ia ena sega e dua me voli kemuni.