Nai Vakarua 27 - AI VOLA TABU（FIJ1864）

Me volai e na vatu na vunau, 1-4; ka me tarai e na vatu sa tawa ta nai cabocabo-ni-soro, 5-8. O Kirisimi kei Epali, 11-13 Me tukuni mai Epali na ka era na ca kina, 14-26.

1IA ko Mosese kei ira na qase ni Isireli era sa vakaroti ira na tamata, ka kaya, Mo ni vakabauta na vunau kecega kaʼu sa vakarota vei kemuni edaidai.

2Ia ena yaco e na siga kemuni sa lako-kosova kina na Joritani, ki na vanua sa solia vei iko ko Jiova na nomu Kalou, mo qai vakaduria vei iko e so na vatu lelevu, ka boroya e nai boro:

3ia mo vola kina na vosa kecega ni vunau o qo, ni ko sa yaco ki tai kadua, mo lako ki na vanua sa solia vei iko ko Jiova na nomu Kalou, a vanua sa dave kina na wai-ni-sucu kei na oni; me vaka sa yalataka vei iko ko Jiova na Kalou ni nomu qase.

4Ia ni dou sa lako-kosova oti na Joritani, mo dou qai vakaduria na veivatu o qo, kaʼu sa vakarota vei kemudou edaidai, e na ulu-ni-vanua ko Epali, ia mo boroya e nai boro.

5Ia ko na tara kina e dua nai cabocabo-ni-soro vei Jiova na nomu Kalou, ai cabocabo-ni-soro vatu: mo kakua ni laveta kina na kaukamea.

6Mo tara nai cabocabo-ni-soro i Jiova na nomu Kalou e na vatu sa tawa ta: ia ko na vakacabora kina e so nai soro kama vei Jiova na nomu Kalou:

7ko na vakamatea talega e so nai madrali e na veivinakati, ka kana maikea, ka rereki e na mata i Jiova na nomu Kalou.

8Ia mo vola e na vatu na vosa kecega ni vunau o qo me matata sara.

9A sa vosa vei ira kecega na Isireli ko Mosese kei ira na bete na luve i Levi, ka kaya, Mo ni qarauni kemuni, ka vakarorogo, na Isireli; e na siga o qo ko sa yaco me matanitu i Jiova na nomu Kalou.

10Ia mo vakarorogo ki na domo i Jiova na nomu Kalou, ka cakava na nona vunau, kei na nona veilesilesi, kaʼu sa vunautaka vei iko edaidai.

11A sa vunauci ira na tamata e na siga ko ya ko Mosese, ka kaya,

12O ira o qo era na tu e na dela ni ulu-ni-vanua ko Kirisimi me vosavakalougatataki ira na tamata, ni dou sa yaco ki tai kadua ni Joritani; ko na Simioni, kei na Levi, kei na Juta, kei na Isakari, kei na Josefa, kei na Penijamini:

13ia ko ira o qo era na tu e na dela ni ulu-ni-vanua ko Epali me vosa ruru; ko na Rupeni, ko na Kata, kei na Aseri, kei na Sepuloni, ko na Tani, kei na Nafitali.

14A ra na vosa na luve i Levi, ka kaya vei ira kecega na tamata ni Isireli e na domo levu,

15Me cudruvi na tamata sa cakava e dua na matakau ceuceu se na matakau sa vakawaicalataki, na ka vakasisila vei Jiova, na cakacaka ni liga ni matai, ka vakaduria e na tikina vuni. A ra na vosa na tamata kecega, ka vakaemeni.

16Me cudruvi ko koya sa beci tamana se tinana. A ra na vakaemeni na tamata kecega.

17Me cudruvi ko koya sa vakisira nai yalayala ni vanua ni kai nona. A ra na vakaemeni na tamata kecega.

18Me cudruvi ko koya sa vaka-sesea na mataboko mai na sala. A ra na vakaemeni na tamata kecega.

19Me cudruvi ko koya sa kauta vakatani na lewa e na vuku ni kai tani, na tawa-vakatamani, kei na alewa dawai. A ra na vakaemeni na tamata kecega.

20Me cudruvi ko koya sa koto vata kei na wati ni tamana; ni sa vakarairaitaka ko koya na luvawale ni tamana. A ra na vakaemeni na tamata kecega.

21Me cudruvi ko koya sa koto vata kei na manumanu e dua. A ra na vakaemeni na tamata kecega.

22Me cudruvi ko koya sa koto vata kei na ganena, na luve i tamana, se na luve i tinana. A ra na vakaemeni na tamata kecega.

23Me cudruvi ko koya sa koto vata kei na vugona. A ra na vakaemeni na tamata kecega.

24Me cudruvi ko koya sa mokuta lo na kai nona. A ra na vakaemeni na tamata kecega.

25Me cudruvi ko koya sa taura na yau me mokuta-mate kina na tamata tawa cala. A ra na vakaemeni na tamata kecega.

26Me cudruvi ko koya sa sega ni vakadinadinataka na vosa ni vunau o qo me cakava. A ra na vakaemeni na tamata kecega.