Nai Vakarua 26 - AI VOLA TABU（FIJ1864）

A vakatusa i koya sa vakacabora nai sevu, 1-11. A masumasu ni sa kau nai katini ni ka ki na Kalou, 12-15. A veiyalayalati ni Kalou kei ira na tamata, 16-19.

1IA ni ko sa lako mai ki na vanua sa solia vei iko ko Jiova na nomu Kalou mei votavota, ka ko sa taukena, ka tiko kina;

2ko na kauta nai sevu ni vua kecega ni vanua, a ya ko na kauta mai na nomu vanua sa solia vei iko ko Jiova na nomu Kalou; ka viria ki na sova, ka lako ki na yasana sa digitaka ko Jiova na nomu Kalou me vakatikora kina na yacana.

3Ia ko na lako vua sa bete e na gauna ko ya, ka kaya vua, Au sa vakatusa e na siga o qo vei Jiova na nomu Kalou, niʼu sa yaco mai ki na vanua sa vosavavakini kina ko Jiova vei ira na noda qase me solia vei keda.

4Me na qai taura na sova ko na bete mai na ligamu, ka viritura e na mata ni cabocabo-ni-soro i Jiova na nomu Kalou.

5Ia ko na qai vosa e na mata i Jiova na nomu Kalou, ka kaya, A kai Siria sa kolai rusa na tamaqu, a sa lako sobu ko koya ki Ijipita, ka tiko vulagi kina ko koya, ko ira talega e lewe lailai, a sa yaco maikea me matanitu levu, sa kaukauwa, ka lewe vuqa:

6a ra sa vakacacani keimami ko ira na kai Ijipita, ka vakararawataki keimami, ka lesi keimami ki na cakacaka ni bobula sa dredre:

7ia ni keimami sa tagi vei Jiova na Kalou ni neimami qase, sa rogoca na domo i keimami ko Jiova, ka raica na neimami rarawa, kei na neimami cakacaka, kei na veivakasaurarataki sa kitaki vei keimami:

8a sa kauti keimami tani mai Ijipita ko Jiova e na liga kaukauwa, kei na liga sa dodo yani, kei na ka rerevaki vakaidina, kei nai vakatakilakila e so, kei na cakacaka-mana e so:

9a sa kauti keimami mai ki na yasana o qo, ka sa solia vei keimami na vanua o qo, a vanua sa dave kina na wai-ni-sucu kei na oni:

10ia o qo, raica, kaʼu sa kauta mai nai sevu ni vua ni vanua kemuni, Jiova, sa solia mai vei au.

Ia ko na viritura e na mata i Jiova na nomu Kalou, ka soro e na mata i Jiova na nomu Kalou:

11ia ko na rekitaka na vinaka kecega sa solia vei iko ko Jiova na nomu Kalou, ka ki na nomu lewe-ni-vale, ko iko, kei na luve i Levi, kei na vulagi sa tiko kei iko.

12Ni ko sa ia oti nai katini ni nomu vuata e nai katolu ni yabaki, na yabaki sa iataki kina nai katini ni ka, a sa solia ki na luve i Levi, ki na vulagi, ki na tawa-vakatamani, kei na alewa dawai, me ra kana e nomu lomanibai, ka mamau;

13ko na qai kaya e na mata i Jiova na nomu Kalou, Au sa kauta mai na ka sa vakatabui mai vale, ka sa solia talega ki na luve i Levi, kei na vulagi, ki na tawa-vakatamani, kei na alewa dawai, me vaka na nomu vunau kecega ko sa vunautaka vei au: au sa sega ni vakacataka na nomu vunau, au sa sega talega ni guilecava:

14au sa sega ni kana kina niʼu sa tagi yaso, kaʼu sa tawa kauta maikina me ia kina na ka tawa savasava, se vakacabora e so ki na mate: au sa vakarorogo ki na domo i Jiova na noqu Kalou; au sa kitaka me vaka na ka kecega kemuni sa vakarota vei au.

15Mo ni rai sobu mai na nomui tikotiko tabu, mai lomalagi, ka vakalougatataki ira na nomu tamata na Isireli, kei na vanua kemuni sa solia vei keimami, me vaka kemuni a vosavavakini vei ira na neimami qase, a vanua sa dave: kina na wai-ni-sucu kei na oni.

16E na siga o qo sa vakaroti iko ko Jiova na nomu Kalou me cakava na veilesilesi o qo kei na lelewa: mo vakabauta kina ka cakava e na lomamu taucoko, kei na valomu taucoko.

17O sa tukuni Jiova edaidai me nomu Kalou, ka mo lako e nona sala, ka me vakabauta na nona veilesilesi, kei na nona vunau, kei na nona lelewa, ka vakarorogo ki na domona:

18a sa tukuni iko edaidai ko Jiova me nona matanitu talei, me vaka sa yalataka vei iko, ia mo vakabauta kina na nona vunau kecega;

19me laveti iko talega mo cecere vei ira na matanitu kecega sa cakava ko koya, ni ko sa vakavinavinakataki, ka sa rogo, ka sa vakarokorokotaki; ia mo matanitu tabu me nei Jiova na nomu Kalou, me vaka na nona vosa.