Nai Vakarua 25 - AI VOLA TABU（FIJ1864）

A vunau e na tamata sa vakanakuitataki, 1-3; e na buturaki sila, 4; e na watina na veitacini, 5-10; e na alewa sa kitaka na ka e veivakamaduataki, 11, 12; e nai vakarau ni veivoli, 13-16. Me kawaboko ko ira na Amaleki, 17-19.

1KEVAKA sa dua na ka era veiletitaka na tamata, a ra sa torova nai tikotiko ni veilewai, me ra lewai; me na qai vakadonui ko koya sa dodonu, ka vakacalai ko koya sa cala.

2Ia kevaka sa dodonu me vakanakuitataki na tamata ca, me na qai lewa na dauveilewai me vakabaleti, ka me vakanakuitataki e matana, me vaka na nona cala, ka me wili na kuita.

3E tara me vasagavulu na kena kuita, me kakua ni levu cake: de vaka na ka vakasisila e matamu na wekamu, ni sa levu cake, ka vuqa na kena kuita.

4Mo kakua ni vauca na gusu ni karavau, ni sa buturaki sila.

5Kevaka era tiko vata na veitacini, a sa mate e dua vei ira, ka sa sega na luvena, me kakua ni lako tani me veiwatini kaya na kai tani na wati ni mate: me curu vua na taci se na tuaka ni watina, ka taura me watina, ka yaco me wekana e na veiwatini:

6ia na ulumatua sa vakasucuma ko koya, enai sosomi i koya sa mate vei ira na veitacini, me kakua kina ni bokoci na yacana vei ira na Isireli.

7Ia kevaka sa sega ni via veiwatini kei na wati ni tuakana se tacina na tamata ko ya, me qai lako ki na matamata-ni-koro na wati ni tuakana se tacina vei ira na qase, ka kaya, O koya erau a veitacini kei na watiqu, sa bese ni vakatubura e Isireli na yaca i koya erau a veitacini kaya: sa bese ko koya ni yaco me wekaqu e na veiwatini.

8Era na qai kacivi koya ko ira na qase ni nona koro, ka vosa vua: ia kevaka sa taudei ko koya, ka kaya, Au sa sega ni vinakata meʼu kauti koya;

9me na qai torovi koya na wati ni tuakana se tacina e na matadra na qase, ka luvata nai vava mai na yava i koya, ka kasivita na matana, ka vosa ka kaya, Me caka vakaoqo vua na tagane sa bese ni tara na vale i koya erau a veitacini kaya.

10Ia ena vakatokai na yacana e Isireli, A nona vale sa luvati na nonai vava.

11Ni rau sa veivala na tagane e rua, a sa toro mai na watina e dua me Vakabula na watina mai na ligana sa yaviti koya, ka dodoka na ligana ka taura na nona ka vakatagane:

12ko na qai muduka na ligana; me kakua ni loloma na matamu.

13Me kakua ni tiko e nomu taga e rua nai vakarau ni bibi, na ka levu kei na ka lailai:

14me kakua e nomu vale e rua nai vakarau ni ka mamaca, na ka levu kei na ka lailai:

15me vinaka ka dodonu na nomui vakarau ni bibi; me vinaka ka dodonu na nomui vakarau ni ka mamaca: me vakabalavutaki kina na nomu bula e na vanua sa solia vei iko ko Jiova na nomu Kalou.

16Ni ra ka vakasisila vei Jiova na nomu Kalou ko ira kecega era kitaka na ka vakaoqo, ko ira kece era tawa caka dodonu.

17Mo nanuma na ka sa kitaka vei iko ko ira na Amaleki e na sala, ni dou sa lako tani mai Ijipita;

18ni ra sa tavaki iko e na sala, ka mokuti ira na kai nomu era lako emuri, ko ira kece na nomu malumalumu era muri, ni ko a rarawa ka ceguoca; a sa tawa rerevaka na Kalou ko ira.

19Ia ni sa vakacegui iko ko Jiova na nomu Kalou maivei ira kecega na nomu meca era voliti iko, e na vanua sa solia vei iko ko Jiova na nomu Kalou mei votavota mo taukena, ko na qai bokoci ira na Amaleki me kakua na kedrai vakananumi e ruku ni lomalagi; mo kakua ni guilecava.