1NI sa kauta e dua na alewa na tagane, a sa yaco me watina, ke sa qai sega ni lomana, e na vuku ni sa kunea vua e dua na ka tawa savasava: mo na qai vola vua e dua nai vola ni tawase, ka solia ki na ligana, ka vakatalai koya tani e nona vale.
2Ia ni sa lako tani e nona vale, sa tara vua me laʼki veiwatini kei na tamata tani.
3Ia kevaka sa cati koya na watina emuri, ka vola vua e dua nai vola ni tawase, ka solia ki na ligana, ka vakatalai koya tani e nona vale; se kevaka sa mate na watina emuri, ko ya ka taura me watina;
4sa tabu vua na watina eliu, ko ya ka talai koya yani, me taura tale me watina, ni sa vakatawasavasavataki oti; ni sa ka vakasisila o qori e na mata i Jiova: ia mo kakua ni cakava me valavala ca na vanua, sa solia vei iko ko Jiova na nomu Kalou mo taukena.
5Ni sa taura na watina vou na tamata e dua, me kakua ni lako yani e nai valu ko koya, me kakua talega ni lesi ki na dua na cakacaka: me lalaga ga mai nona vale ka yabaki dua, ka vakamarautaka na watina sa taura oti ko koya.
6Me kakua ni kauti na vatu ni varo sila sa toka ecake se toka era mei vakarawarawa ni ka: ni sa kauti kina mei vakarawarawa na ka sa bula kina na tamata.
7Kevaka sa kune na tamata ni sa butakoca me nona e dua vei ira na wekana sa luve i Isireli, me vakayau kina, se volitaka; ena qai mate na butako ko ya; ia ko na biuta tani kina na ca mai na nomudou maliwa.
8Mo qarauni iko e na vuku ni mate ni vukavuka, mo nanuma vinaka me kitaka na ka kecega era sa vakavulica vei kemudou na bete era luve i Levi; dou nanuma me cakava na ka kaʼu a vunautaka vei ira.
9Mo nanuma na ka sa cakava ko Jiova na nomu Kalou vei Miriami e na sala ni dou a lako tani mai Ijipita.
10Ni ko sa solia-sarava e dua na ka vua na kai nomu, mo kakua ni curuma na nona vale me kauta mai vua nai sosomi ni ka sa soli-saravi.
11Mo tu ga etautuba, ia na tamata ko sa solia-sarava vua na ka, ena kauta vei iko kitautuba nai sosomi ni ka sa soli-saravi.
12Ia kevaka sa dravudravua na tamata ko ya, mo kakua ni moce kaya na nonai sosomi ni ka sa soli-saravi:
13ko na solia vakaidina vua nai sosomi ni ka sa soli-saravi, ni sa laʼki dromu na siga, me moce rawa ko koya e nonai tutuvi, ka vosavakalougatataki iko kina: ia ena nomu cakacaka dodonu o qo e na mata i Jiova na nomu Kalou.
14Mo kakua ni vakasaurarataka na tamata sa voli nona cakacaka sa kaisi ka dravudravua, se sa dua vei ira na wekamu, se dua vei ira na nomu vulagi sa tiko e nomu vanua e na nomu lomanibai:
15ni sa oti na kena siga, mo solia nai voli ni nona cakacaka, me kakua ni dromu mada na siga; ni sa dravudravua ko koya, a sa daudomona: de tagicaki iko ko koya vei Jiova, a sa ka ca vei iko.
16Me ra kakua ni vakamatei na qase e na vukudra na gone, me ra kakua talega ni vakamatei na gone e na vukudra na qase: ena vakamatei na tamata yadua e na vuku ni nonai valavala ca.
17Mo kakua ni kauta vakatani na lewa vua na vulagi, se na tawa-vakatamani; se kauta na nonai sulu na alewa dawai mei vakarawarawa ni ka:
18ia mo nanuma ga ni ko a bobula mai Ijipita, a sa vakabulai iko maikina ko Jiova na nomu Kalou: o koya kaʼu sa vakaroti iko kina mo kitaka na ka o qo.
19Ni ko sa tamusuka na nomu sila e na nomu veiwere, ka sa guilecava e dua nai vau sila e na were, mo kakua ni lako tale me kauta mai: me nona ga na vulagi, na tawa-vakatamani, kei na alewa dawai: me vakalougatataki iko kina ko Jiova na nomu Kalou e na cakacaka kecega ni ligamu.
20Ni ko sa vetia na nomu kau olive, mo kakua ni qara tale e na tabana: me nona ga na vulagi, na tawa-vakatamani, kei na alewa dawai.
21Ni ko sa tauca na vua ni nomu veivaini, mo kakua ni lako tale mo vakasaqaqara: me nona ga na vulagi, na tawa-vakatamani, kei na alewa dawai.
22Ia ko na nanuma ni ko a bobula mai na vanua ko Ijipita: o koya kaʼu sa vakaroti iko kina mo kitaka na ka o qo.
Who We AreWhat We EelieveWhat We Do
2025 by iamachristian.org,Inc All rights reserved.
