1O KOYA sa qaqi na sore ni qalana, se koya sa mudu na nona ka vakatagane, me kakua ni curu ki nai soqosoqo i Jiova.
2A luve ni butako e tabu ni curu ki nai soqosoqo i Jiova; ia me yacova na nonai katini ni tabatamata, e tabu vua me curu ki nai soqosoqo i Jiova.
3A luve i Amoni se na luve i Moapi era na tawa curu ki nai soqosoqo i Jiova; ia me yacova na kedrai katini ni tabatamata, ena tabu ni ra curu ki nai soqosoqo i Jiova ka tawa mudu:
4e na vuku ni ra tawa kauta na madrai kei na wai, ka laʼki tavaki kemudou e na sala, ni dou a lako tani mai Ijipita; e na vuku talega ni ra voli Palami na luve i Piori na kai Picori mai Mesopotemia, me rukaki iko.
5Ia sa bese ga ni vakarorogo vei Palami ko Jiova na nomu Kalou; a sa vukica na ruru ko Jiova na nomu Kalou me vosa ko sa kalougata kina, e na vuku ni sa lomani iko ko Jiova na nomu Kalou.
6Mo kakua ni qara na ka me ra sautu kina se na ka me ra vinaka kina, e na nomu bula kecega, ka tawa mudu.
7Mo kakua ni cata na kai Itomi; ni sa wekamu ko koya: mo kakua ni cata na kai Ijipita; ni ko a tiko vulagi e nona vanua.
8A luvedra sa sucu vei ira, era na curuma nai soqosoqo i Jiova e na kedrai katolu ni tabatamata.
9Ni sa lako yani na matai valu me veivala kei ira na nomu meca, mo qai qarauni iko mai na ka ca kecega.
10Kevaka sa tawa savasava e dua na tamata vei kemudou e na vuku ni dua na ka sa yaco loa vua e na bogi, me na qai lako tani ko koya ki nai bili ni koro, me kakua ni lako mai ko koya ki loma ni koro:
11ia ni sa toro mai na yakavi, ena sili ko koya e na wai: ia ni sa dromu na siga, me qai curu mai ki na koro ko koya.
12Ia me dua na nomu tikina mai nai bili ni koro, ko na lako yani kina kituba:
13ka me dua na mata ni doko e na nomui yaragi ni valu; ia ena yaco ni ko sa laʼki tuba, mo qai keli kina, ka vuki ka buluta na ka e lako maivei iko:
14ni sa lako voli e na nomu koro ni valu ko Jiova na nomu Kalou, me vakabulai iko, ka me soli ira na nomu meca e matamu; o koya me savasava kina na nomu koro ni valu; me kakua kina ni raica ko koya na ka ca vei iko, ka lesu tani vei iko.
15Mo kakua ni solia tale vua na turaga na tamata sa biuta na nona turaga, ka dro vei iko:
16ena tikoga kei iko ko koya, io e na kemudou maliwa, e na yasana sa digitaka ko koya e na dua na nomu koro, sa vinakata ko koya: mo kakua ni vakasaurarataki koya.
17Me kakua e dua na alewa ni Isireli me cabori me dauyatagane, se dua vei ira na tagane ni Isireli me cabori me veivakasisilataki.
18Mo kakua ni kauta nai voli ni alewa dauyatagane, se nai voli ni tagane sa veivakasisilataki, ki na vale i Jiova na nomu Kalou, e na vuku ni dua na vavakini: ni sa ka vakasisila koi rau ruarua o qo vei Jiova na nomu Kalou.
19Mo kakua ni solia e dua na ka vua na wekamu mo taura tale kei na kenai voli, se nai lavo, se na kakana, se dua na ka sa dautauri tale kaya na kenai voli:
20e tara mo solia na ka vua na kai tani mo taura tale kei na kenai voli; ia sa tabu ga mo soli ka ki na wekamu mo taura tale kei na kenai voli: me vakalougatataki iko kina ko Jiova na nomu Kalou e na ka kecega sa dodo kina na ligamu, e na vanua ko sa lako yani kina mo taukena.
21Ni ko sa vosataka na vavakini vei Jiova na nomu Kalou, mo kakua ni berabera mo vakayacora: ni na taroga vakaidina vei iko ko Jiova na nomu Kalou; ena qai valavala ca vei iko.
22Ia kevaka ko sa kua na vosa vavakini, ena qai sega ni ca vei iko.
23A ka sa lako mai na tebenigusumu mo vakabauta ka vakayacora; io nai soro sa lomamu ga me cabora, me vaka ko sa vavakini vei Jiova na nomu Kalou, na ka sa yalataka na gusumu.
24Ni ko sa curu ki na nona veivaini na kai nomu, e tara mo kania loa na vua ni vaini mo mamau kina; ia e tabu ga mo tugana ki na nomu kato.
25Ni ko sa lako ki loma ni sila ni kai nomu sa tu ga, e tara mo vetia na kena sola e na ligamu; ia sa tabu ga mo vakacuruma nai sele ni sila ki na sila ni kai nomu sa tu ga.
Who We AreWhat We EelieveWhat We Do
2025 by iamachristian.org,Inc All rights reserved.
