1MO kakua ni raica na karavau se na sipi ni wekamu ni sa lako sese, ka vuni iko kina: mo kauta vakaidina tale vua na wekamu.
2Ia kevaka sa sega ni voleka vei iko na wekamu, se ko tawa kilai koya, mo qai kauta ki na nomu vale, ia me tiko kei iko me vakasaqara mada na wekamu, mo na qai vakasuka tale vua.
3Mo kitaka vakakina talega ki na nona asa; ia mo kitaka vakakina ki na nonai sulu; ia na ka kecega e yali vua na wekamu, sa vakayali a ko koya, ka ko sa kunea, mo kitaka vakakina: e tabu ni ko sa vuni iko.
4Mo kakua ni raica na nona asa na wekamu se nona karavau, ni sa bale koto e na sala, ka vuni iko kina: mo vukei koya vakaidina ni laveta tale.
5Me kakua ni suluma nai sulu ni tagane na alewa, me kakua talega ni suluma nai sulu ni alewa na tagane: ni ra sa ka vakasisila vei Jiova na nomu Kalou ko ira kecega era kitaka na ka o qo.
6Kevaka ko sota kaya e dua nai oviovi ni manumanu vuka e na sala, e na dua na kau, se na qele, se tiko kina na luvena bula se na yaloka, a sa ovica tiko na luvena se na yaloka na tinatina, mo kakua ni kauta vata na tinatina kei na luvena:
7mo laiva dina na tinatina me lako, ka kauta vei iko na luvena; me yaco kina vei iko na ka vinaka, ia me balavu na nomu bula.
8Ni ko sa tara e dua na vale vou, mo qai viria e dua na bai mai dela ni nomu vale, mo kakua kina ni vakayacora na dra ki na nomu vale, kevaka sa lutu maikina e dua na tamata.
9Mo kakua ni tea e na nomu veivaini na sore ni kau tani: de vakadukadukalitaki na vua ni sore ni kau ko sa tea, kei na vua ni veivaini talega.
10Me rau kakua ni vauci vata na karavau kei na asa me yalataka nai sivi-yara.
11Mo kakua ni vakaisulu e nai sulu sa tali vata kina na veika tani, na vutika ni sipi vata kei nai sulu tani.
12Mo cakava vei iko na belena e na vasana e va ni nomui sulu, ko sa ubi kina.
13Kevaka sa kauta e dua me watina na tamata, a sa curu vei koya, a sa cati koya,
14ka vakavuna na vosa ca vei koya, ka vakacacataka na yacana, ka kaya, Au a kauta na alewa o qo, ia ni kaʼu a curu vua, au sa kunea ni sa sega ni gonealewa:
15me rau qai taura ka kauta ko tamana kei tinana na gonealewa nai vakatakilakila ni nona gonealewa, vei ira na qase ni koro, ki na matamata-ni-koro:
16ena qai kaya na tamana na gonealewa vei ira na qase, Au a solia na luvequ ki na tagane o qo me watina, a sa cata ko koya;
17ka, raica, sa vakavuna na vosa ca, ka vaka, Au a kunea na luvemu ni sa tawa gonealewa; ia sa o qo ga nai vakatakilakila ni nona gonealewa na luvequ. Me rau qai tevuka nai sulu e na matadra na qase ni koro.
18Ia ko ira na qase ni koro ko ya me ra qai kauta na tamata ko ya, ka vakanakuitataka;
19a ra na vakaorea, me dua na drau na sikeli siliva, me soli ki na tamana na gonealewa, e na vuku ni sa vakacacataka na yacana e dua na gonealewa ni Isireli: ia ena watina alewa ko koya; sa tabu vua me biuta tani e nona bula kecega.
20Ia kevaka sa dina na ka o qo, ke sa sega ni kune na nonai vakatakilakila ni gonealewa:
21era na qai kauta na alewa ki na katuba ni vale i tamana, a ra na virika e na vatu na lewe ni nona koro me mate ko koya: e na vuku ni sa kitaka na ka vakalialia e Isireli, ni sa dauyatagane e na vale i tamana: ko na biuta tani kina na ca mai na nomudou maliwa.
22Kevaka sa kune e dua na tamata ni sa koto vata kei na alewa sa vakawati, erau na mate ruarua, na tagane sa koto kaya na alewa, kei na alewa talega: ko na biuta tani kina na ca maivei Isireli.
23Kevaka sa dua na gonealewa sa tawa kila na tagane, sa musu vua e dua na tamata, a sa kunei koya e dua na tagane e na koro, ka koto kaya;
24dou na qai kauti rau ruarua yani ki na matamata ni koro ko ya, ia dou na viriki rau e na vatu me rau mate; na gonealewa, e na vuku ni sa tawa qoqolou, e na koro: kei koya na tagane, e na vuku ni sa vaqasena na wati ni kai nona: ko na biuta tani kina na ca mai na nomudou maliwa.
25Ia kevaka e dua na tagane sa kunea e na veiwere e dua na gonealewa sa musu, a sa vakasaurarataki koya na tagane, ka koto kaya: ena qai mate duaduaga na tagane sa koto kaya:
26ia mo kakua ni kitaka e dua na ka vua na gonealewa; sa sega na ka e dodonu me mate kina na gonealewa: ni sa tautauvata na ka o qo kei na tu cake ni tamata e dua, ka vakamatea na kai nona:
27ni sa kunei koya e na veiwere ko koya, a sa qoqolou na gonealewa sa musu, ka sega e dua me vakabulai koya.
28Kevaka e dua na tagane sa kunea e dua na gonealewa sa tawa kila na tagane, sa tawa musu, ka sa taura, ka koto kaya, a rau sa kune;
29ena qai solia ki na tama ni gonealewa ko na tagane sa koto kaya e limasagavulu na sikeli siliva, ia ena watina alewa ko koya; e na vuku ni sa vaqaseni koya, sa tabu vua me biuta tani e nona bula kecega.
30Sa tabu vua na tagane me kauta na wati i tamana, se vakarairaitaka na luvawale ni tamana.
Who We AreWhat We EelieveWhat We Do
2025 by iamachristian.org,Inc All rights reserved.
