1KEVAKA sa kune e dua sa moku-mate e na vanua sa solia vei iko ko Jiova na nomu Kalou mo taukena, sa koto e na vanua, a sa tawa kilai se ko cei sa mokuta:
2me ra qai lako yani na nomu qase kei na nomu dauveilewai, a ra na qara na kena yawa ki na Veikoro sa voliti koya sa moku-mate:
3ia na koro sa voleka kivei koya sa moku-mate, na qase ni koro ko ya era na kauta e dua na luve ni karavau alewa, sa sega ni kitaki kina e dua na cakacaka, a ya sa tawa yara e nai vau;
4ia na qase ni koro ko ya, era na kauta sobu na luve ni karavau alewa ki na buca sa vatuvatu, sa sega ni tauri ka sega ni tei, ka tamusuka maikeri na domo ni luve ni karavau e na buca:
5ia era na qai toro mai na bete na luve i Levi; (ni sa digitaki ira ko Jiova na nomu Kalou me ra qaravi koya, ka ia na vosa veivakalougatataki e na yaca i Jiova; ia ena lewai e na nodra vosa na veileti kecega kei na veimoku kecega:)
6ia na qase kecega e na koro ko ya sa voleka vei koya sa moku-mate, me ra vuluvulu e dela ni luve ni karavau sa tamusuki mai na uluna e na buca:
7a ra na vosa, ka kaya, A liga i keitou sa sega ni liviraka na dra o qo, a sa sega ni raica na mata i keitou:
8mo ni yalololoma, i Jiova, vei ira na nomu tamata na Isireli, ko ira ko a Vakabula, mo ni kakua talega ni beitaki ira na nomu tamata na Isireli e na dra tawa cala. Era na qai tawa cudruvi e na dra ko ya.
9O na biliga tani kina na dra tawa cala mai na nomudou maliwa, ni ko na caka dodonu e na mata i Jiova.
10Ni ko sa lako yani me ia nai valu vei ira na nomu meca, a sa soli ira ko Jiova na nomu Kalou ki na ligamu, ka ko sa vakabobulataki ira,
11ia ko sa raica vei ira na bobula e dua na alewa matavinaka, ka sa domona, ka via kauta me watimu;
12ko na qai kauta ki na nomu vale; ia me na tasia na uluna ko koya, ka civia na nonai taukuku;
13ia me luvata tani vua ko koya na nonai sulu vakabobula, ka tiko e na nomu vale, ka tagicaki tamana kei tinana ka dua dina na vula: ka sa oti, ko na qai curu vua, ka yaco me watina, ia ena watimu ko koya.
14Ia kevaka ko na tawa vinakati koya, mo qai laiva me lako veitalia yani ko koya; ia e tabu sara ni ko volitaka e nai lavo; o na kakua ni veivoli-taka, e na vuku ni ko sa vaqasena.
15Kevaka sa rua na watina na tamata e dua, sa lomani e dua, ka cati e dua, a rau sa vakasucuma vei koya na gone, ko koya sa lomani kei koya talega sa cati; a sa nona sa cati na ulumatua na tagane:
16ni sa vota ko koya na nona yau vei ira na luvena, sa tabu ni cakava na luve i koya sa lomani me ulumatua, ka laiva na luve i koya sa cati, ko koya sa ulumatua:
17ia me vinakata ga ko koya na ulumatua na luve i koya sa cati, ni sa solia vua e rua nai votavota ni nona ka kecega: ni sai vakatekivu ni nona kaukauwa ko koya; sa dodonu me nona nai votavota ni ulumatua.
18Kevaka sa dua na tamata sa yalovakatani ka dautalaidredre na luvena tagane, sa bese ni vakarorogo ki na domo ni tamana, se na domo ni tinana, ka rau sa dauvakanakuitataki koya, ka sa tawa vakarorogo ga vei rau:
19me rau qai taura na tamana kei na tinana, ka kauta yani vei ira na qase ni nona koro, kei na matamata-ni-koro ni nona yasana;
20a rau na kaya vei ira na qase ni nona koro, A luve i keirau o qo sa yalovakatani ka dautalaidredre, sa bese ni vakarorogo ki na domo i keirau; sa daukana ko koya, ka daumateni.
21Era na qai viriki koya e na vatu ko ira kecega na lewe ni nona koro, me mate kina: ko na biuta tani kina na ca mai na nomudou maliwa; ia ena rogoca ko ira na Isireli kecega, ka rere.
22Ia kevaka e dua na tamata sa kitaka nai valavala ca sa dodonu me mate kina, a sa lewai ko koya me mate, ka ko sa vakalilica e na kau:
23me kakua ni lili tu e na bogi na yagona e na kau, ia mo buluta vakaidina ga e na siga ko ya; (ni sa cudruvi vua na Kalou ko koya sa vakalilici e na kau;) mo kakua kina ni vakadukadukalitaka na nomu vanua, sa solia vei iko ko Jiova na nomu Kalou mo taukena.
Who We AreWhat We EelieveWhat We Do
2025 by iamachristian.org,Inc All rights reserved.
