Nai Vakarua 20 - AI VOLA TABU（FIJ1864）

A vunau ni bete kei na turaga lalai vei ira na tamata ni ra lako ki nai vahi, 1-9. A vunau e so e na vuku ni valu, 10-20.

1NI ko sa lako yani me ia nai valu vua na nomu meca, ka sa raica na ose kei na vale-vodoki, kei na tamata era lewe vuqa, ka lewe lailai ko iko, mo kakua ni rerevaki ira: ni sa tiko vata kei iko ko Jiova na nomu Kalou, o koya ka kauti iko cake mai na vanua ko Ijipita.

2Ia ni kemudou sa laʼki toro voleka ki nai valu, me na qai toro mai na bete ka vosa vei ira na tamata,

3ka kaya vei ira, Mo rogoca, na Isireli, kemudou sa toro ki nai valu edaidai vei ira na nomudou meca: me kakua ni waicala na yalomudou, dou kakua ni rere, dou kakua tale ni sautaninini, dou kakua talega ni domobula e na vukudra;

4ni ko Jiova na nomudou Kalou sa lako vata kei kemudou, me veivala kei ira na nomudou meca e na vukumudou, me vakabulai kemudou.

5Me na qai vosa vei ira na tamata ko ira na turaga lalai, ka kaya, Ko cei na tamata sa tara e dua na vale vou, ka sa tawa curuma? me lako ko koya ka lesu ki na nona vale, de mate e nai valu, ka sa curuma na tamata tani:

6se ko cei na tamata sa tea e dua na veivaini, a sa sega ni kania na kenai matai? me lako ko koya ka lesu ki na nona vale, de mate e nai valu, ka sa kania na kenai matai na tamata tani:

7se ko cei na tamata sa veiyalayalati kei na alewa me watina, a sa sega ni kauti koya? me lako ko koya ka lesu ki na nona vale, de mate e nai valu, ka sa kauti koya na tamata tani.

8Ia me ra vosa tale vei ira na tamata ko ira na turaga lalai, ka me ra kaya, Ko cei na tamata sa rere ka sa waicala na lomana? me lako ko koya ka lesu ki na nona vale, de waicala na yalodra na wekana me vaka na yalona.

9Ia ni ra sa vosa oti na turaga lalai vei ira na tamata, me ra qai lesia na turaga ni matai valu me liutaki ira na tamata.

10Ni ko sa toro voleka ki na dua na koro me veivala kaya, mo qai kacivaka kina na sauvinaka.

11Ia kevaka sa vosa mai vei iko me sauvinaka, ka dolavi iko, me qai yaco me ra nomu qali na tamata kecega era sa kune kina, a ra na qaravi iko.

12Ia kevaka sa bese ni sauvinaka kei iko, ka sa kitaka ga nai valu kei iko, mo qai bukia na nona druadrua:

13ia ni sa solia ki na ligamu ko Jiova na nomu Kalou, mo qai yavita na kena tagane kecega e na bati ni seleiwau:

14ia ko ira na alewa, kei na lalai, kei na manumanu e yavai va, kei na ka kecega sa tiko e na koro, io na kena yau kecega, mo tokitaka me nomu; ia mo kania nai toki maivei ira na nomu meca, a ya sa solia vei iko ko Jiova na nomu Kalou.

15Mo kitaka vakaoqo ki na veikoro kecega sa vakayawa sara vei iko, sa sega ni nodra veikoro na veimatanitu o qo.

16Ia na nodra veikoro na veimatanitu o qo, a ya sa solia vei iko ko Jiova na nomu Kalou mo taukena, mo kakua ni Vakabula e dua na ka sa cegu:

17mo vakarusai ira sara ga; ko ira na luve i Eci, kei na luve i Amori, na kai Kenani, kei na lewe ni Veikoro lalai, na luve i Evi, kei na kai Jepusa; me vaka sa vakaroti iko ko Jiova na nomu Kalou:

18me ra kakua kina ni vakavulici kemudou me kitaka me vaka na nodra ka vakasisila kecega, era sa kitaka ki na nodra veikalou; mo dou kakua kina ni valavala ca vei Jiova na nomudou Kalou.

19Ni ko sa bukia na druadrua ni dua na koro ka bogi vuqa, ni ko veivala kaya me kabata, mo kakua ni vakacacana na kena kau ni ko sa taya e na matau: ni ko na kana rawa kina, ia mo kakua kina ni vakabalea; ni sa tamata li na kau ni vanua, me sagai iko ni sa buku na druadrua?

20ia na kau ga ko sa kila sa sega ni kau kana, mo vakacacana ka vakabalea; ia mo viria kina na bai ki na koro sa veivaluti kei iko, ka me vakamalumalumutaki mada.