Nai Vakarua 19 - AI VOLA TABU（FIJ1864）

A Veikoro ei drodro, 1-13. Me kakua ni kisi nai yalayala ni vanua, 14. Me rua na tamata sa beitaka na tamata me cudruvi kina, 15. Me cudruvi na tamata sa beitaka vakailasu e dua, 16-21.

1NI sa muduki ira tani ko Jiova na nomu Kalou na veimatanitu, ko ira sa solia na nodra vanua vei iko ko Jiova na nomu Kalou, ka ko sa kedrai sosomi, ka tiko e na nodra veikoro, kei na nodra veivale;

2mo qai lesia vei iko e tolu na koro e na loma ni nomu vanua, sa solia vei iko ko Jiova na nomu Kalou mo taukena.

3Mo caramaka na sala, ka wasea tolu na veiyasana ni nomu vanua, sa solia vei iko ko Jiova na nomu Kalou mo taukena, me dro kina ko koya yadua sa ravuravu.

4Ia o qo nai valavala e na vuku i koya sa ravuravu, ko koya sa dro kina, me bula kina: Ko koya sa mokuta-mate na kai nona ni sa tawa nakita, ka tawa cati koya eliu;

5(e vaka, ni rau lako na tamata kei na kai nona ki na veikau me ta kau, a sa laveta na matau na ligana me taya na kau, a sa tauucu na matau mai diana, a sa lutuka na kai nona, a sa mate kina;) me na dro ki na dua na koro o qori, ka bula;

6de vakasavi koya sa ravuravu ko koya sa nonai tavi me sauma na dra, ni sa katakata tu na lomana, ia de vauci koya, ka mokuta-mate ni sa balavu na sala; ia ka sa tawa dodonu me mate ko koya, ni sa tawa cati koya eliu.

7O koya kaʼu a vakaroti iko kina, ka vaka, Mo wasea vei iko e tolu na koro.

8Ia kevaka sa vakarabailevutaka na nomu vanua ko Jiova na nomu Kalou, me vaka ka vosavavakini kina vei ira na nomu qase, ka solia vei iko na vanua kecega ka yalataka ko koya me solia vei ira na nomu qase;

9kevaka ko sa vakabauta na vunau kecega o qo me cakava, a ya kaʼu sa vunautaka vei iko edaidai, me lomani Jiova na nomu Kalou, ka me lako tikoga e na nona sala; ko na qai kuria tale vei iko e tolu na koro, mei kuri ni koro e tolu o qo:

10me kakua kina ni livi na dra tawa cala e na nomu vanua, sa solia vei iko ko Jiova na nomu Kalou mo taukena, a ko sa cudruvi e na vuku ni dra.

11Ia kevaka sa cata na kai nona e dua na tamata, ka sa lawakitaki koya, ka tu cake vei koya, ka mokuta-mate, ka sa qai dro ki na dua na koro o qori:

12me ra qai talaki na qase ni nona koro ka kauti koya maikina, ka soli koya ki na ligana sa nonai tavi me sauma na dra, me mate kina ko koya.

13Me kakua ni lomani koya na matamu, ia mo biliga tani vei ira na Isireli na dra tawa cala, me yaco vei iko kina na ka vinaka.

14Mo kakua ni vakisira nai yalayala ni vanua ni kai nomu, a ya sa vakatakilakilataka ko ira eliu, e na nomui votavota, ko na taukena e na vanua sa solia vei iko ko Jiova na nomu Kalou mo taukena.

15Me kakua ni tu cake na tamata e dua ga sa kila, me beitaka na tamata e na dua na ka tawa dodonu, se dua nai valavala ca, e nai valavala ca e dua sa valavala ca kina ko koya: ni sa tukuna na gusu ni tamata e lewe rua erau kila, se na gusu ni tamata e lewe tolu eratou kila, ena vakataudeitaki kina na bei.

16Kevaka sa tu cake e dua na tamata sa tukuna vakailasu, me beitaka na tamata kadua e na cala;

17me rau tu ruarua na tamata erau veibeitaki e na mata i Jiova, e na matadra era na bete kei ira era na dauveilewai e na gauna ko ya;

18ia me ra tarotaroga vakavinaka ko ira na dauveilewai: ia kevaka sa tukuna vakailasu na tamata sa tukuna, ka sa beitaka vakailasu na wekana;

19dou na qai kitaka vei koya na ka ka nakita ko koya me kitaka vua na wekana: ko na biuta tani kina na ca vei kemudou:

20ia ko ira sa vo, era na rogoca ka rere, ka tawa kitaka tale na ka ca vakaoqo e na kemudou maliwa.

21Ia me kakua ni lomana na matamu; mei sau ni mate na mate, mei sau ni mata na mata, mei sau ni bati na bati, mei sau ni liga na liga, mei sau ni yava na yava.