Nai Vakarua 18 - AI VOLA TABU（FIJ1864）

Jiova na nodrai votavota na bete kei ira na luve i Levi, 1, 2. A kena tiki ni soro na bete, 3-5: a kedra na luve i Levi, 6-8. Me biu na ka era vakasisila kina na veimatanitu, 9-14. Su yalataki e dua na parofita levu, 15-19. Me vakamatei na parofita lasu, 20-22.

1KO ira na bete na luve i Levi, io ko ira kece na yavusa i Levi, ena sega na nodra tikina se nodrai votavota vata kei ira na Isireli: me ra kania ga na ka sa cabori vei Jiova e na buka waqa, kei na nonai votavota.

2Era na sega kina ni votai e na kedra maliwa na wekadra: o Jiova ga sa nodrai votavota, me vaka ka kaya vei ira.

3Ia ena dodonu me nodra na bete maivei ira na tamata, maivei ira era cabora nai soro, se na karavau se na sipi; me ra solia vua na bete na tabana, kei na baluna ruarua, kei na kato ni kena.

4Ai sevu ni nomu sila, na nomu waini, kei na nomu waiwai, kei na vuti ni sipi sa koti taumada, mo solia vei koya.

5Ni sa digitaki koya ko Jiova na nomu Kalou mai na nomu yavusa kecega, me tu me ia na veiqaravi e na yaca i Jiova, ko koya kei ira na luvena me tawa mudu.

6Ia kevaka sa na lako mai na luve i Levi mai na dua na nomu koro e Isireli kecega, sa tiko vulagi kina ko koya, a sa lako mai ni sa gadreva sara na lomana, ki na yasana sa digitaka ko Jiova;

7ena qai ia na veiqaravi e na yaca i Jiova na nona Kalou, me vakataki ira kecega na luve i Levi na wekana, era sa dautu e na mata i Jiova.

8Ena tautauvata na kedrai votavota me ra kania, enai kuri talega vei ira yadua nai voli ni ka mai nona qase.

9Ni ko sa yaco ki na vanua sa solia vei iko ko Jiova na nomu Kalou, mo kakua ni vulica me cakava me vaka na nodra veika vakasisila na veimatanitu ko ya.

10Me na kakua ni kune vei kemudou e dua sa cakava na luvena tagane se na luvena alewa me lako e loma ni buka waqa, e dua na rairai, e dua sa daudigitaka na siga e so, se dua sa dauia na parofisai e na gata, se dua sa daucakai sausau,

11se dua sa lawaki, se dua sa taroga na daucurumi, se dua na dauveinita, se dua sa taroga na tamata sa mate.

12Ni ra sa ka vakasisila vei Jiova ko ira kecega era sa kitaka na veika o qo: e na vuku talega ni veika vakasisila o qo sa vakasevi ira tani e matamu ko Jiova na nomu Kalou.

13Mo yalodina sara vei Jiova na nomu Kalou.

14Ni ka vakarorogo vei ira era daudigitaka na siga e so, kei ira na rairai, ko ira na veimatanitu ko na taukena: ia ko iko, sa sega ni laivi iko ko Jiova na nomu Kalou mo vakakina.

15Ena vakatubura vei iko ko Jiova na nomu Kalou e dua na parofita mai na nomu maliwa, maivei ira na wekamu, me vakai au; dou na vakarorogo vei koya;

16me vaka na ka kecega ko a kerea vei Jiova na nomu Kalou mai Orepi, e na siga ni soqosoqo, ka kaya, Meʼu kakua mada ni rogoca tale na domo i Jiova na noqu Kalou, meʼu kakua talega ni raica tale na buka waqa levu o qo, deʼu mate kina.

17A sa kaya vei au ko Jiova, A ka dodonu na ka era sa kaya:

18au na vakatubura vei ira e dua na parofita maivei ira na wekadra, me vakai iko, ia kaʼu na tauca na noqu vosa ki na gusuna; ia ena tukuna vei ira na ka kecega kaʼu na vunautaka vei koya:

19ia na tamata sa na tawa vakarorogo ki na noqu vosa sa na tukuna ko koya e na yacaqu, au na tarogi koya kina.

20Ia na parofita sa doudou me cavuta e dua na vosa e na yacaqu, na ka kaʼu sa tawa vakarota vua me vosataka, se sa vosa e na yaca ni kalou tani e so, ena mate ga na parofita ko ya.

21Ia do ko kaya e lomamu, Keitou na kila vakaevei na vosa sa tawa cavuta ko Jiova?

22ni sa vosa e dua na parofita e na yaca i Jiova, kevaka sa tawa caka na ka, se yaco, o qori na ka sa tawa cavuta ko Jiova; sa cavuta vakaviavialevu na parofita: mo kakua ni rerevaki koya.