Nai Vakarua 17 - AI VOLA TABU（FIJ1864）

Me vinaka sara na manumanu ei soro, 1. Me vakamatei na tamata sa qarava na kalou tani, 2-7. Me lewa na ka dredre na bete kei na dauveilewai; a me mate ko koya sa beca na lewa, 8-13. Ai valavala ni tui, 14-20.

1MO kakua ni cabora mei soro vei Jiova na nomu Kalou na karavau, se na sipi, sa ca e dua na tikina, se tauvi mate: ni sa ka vakasisila o qori vei Jiova na nomu Kalou.

2Kevaka sa kune vei kemudou, e na loma ni dua na nomu koro sa solia vei iko ko Jiova na nomu Kalou, e dua na tagane se dua na alewa sa caka ca e na mata i Jiova na nomu Kalou, ni sa vakacataka na nona veiyalayalati,

3a sa laʼki qarava e so na kalou tani, ka sa cuva kina, se na mata-ni-siga, se na vula, se na kalokalo e dua mai lomalagi, na ka kaʼu sa vunautaka me kakua;

4a sa tukuni vei iko, ka ko sa rogoca, mo qai tarotaroga vakavinaka; ia, kevaka sa dina, ka sa vakadinadinataki, ni sa kitaki mai Isireli na ka vakasisila o qo;

5ko na qai kauta mai na tagane ko ya, se na alewa ko ya, sa kitaka na ka ca o qori, ki na nomu matamata-ni-koro, io na tagane ko ya se na alewa ko ya, ka virika e na vatu, me mate kina.

6O koya sa dodonu me mate, ena vakamatei ga ni sa tukutuku na tamata e lewe rua se lewe tolu era kila: ena sega ni vakamatei ko koya ni sa tukutuku na tamata e lewe dua ga sa kila.

7Na ligadra era kila ena yaviti koya taumada me mate kina, ka yavita emuri na ligadra na tamata kecega. Ko na biuta tani kina na ca mai na nomudou maliwa.

8Kevaka sa yaco e dua na ka e dredre vei iko mo lewa, a ka e na vuku ni veivakamatei, se na ka e veiletitaki, se e na vuku ni veimokuti, ni sa ka e veiletitaki mai na nomu lomanibai: mo qai tu cake, ka lako cake ki na yasana sa digitaka ko Jiova na nomu Kalou;

9ia ko na lako vei ira na bete na luve i Levi, kei na dauveilewai e na gauna ko ya, ka taroga; a ra na vakatakila vei iko na ka e lewai me caka:

10ia ko na qai kitaka me vaka na lewa era na vakatakila vei iko ko ira e na yasana ko ya sa digitaka ko Jiova; ia ko na nanuma me kitaka me vaka na ka kecega era sa vakavulica vei iko:

11me vaka na vunau era sa vakavulica vei iko, ka vaka na lewa era sa tukuna vei iko, mo kitaka vakakina: mo kakua ni lako tani ki nai matau se nai mawi mai na lewa era sa tukuna vei iko.

12Ia na tamata sa cakacaka vakaviavialevu, me kakua ni vakarorogo kina ki na bete sa tu maikea me ia na veiqaravi e na mata i Jiova na nomu Kalou, se vua na dauveilewai, io na tamata ko ya ena mate. Ia ko na biuta tani kina na ca maivei Isireli.

13A ra na rogoca na tamata kecega, ka rere, ka tawa cakacaka vakaviavialevu tale.

14Ni ko sa yaco ki na vanua sa solia vei iko ko Jiova na nomu Kalou, ka ko sa taukena, ka tiko kina, ka kaya, Au na lesia vei au e dua na tui, me vakataki ira na veimatanitu kecega era tiko voliti au;

15ko na qai lesi koya vakaidina me nomu tui, sa na digitaka ko Jiova na nomu Kalou: mo lesia e dua maivei ira era wekamu me nomu tui: e tabu ni ko lesia na kai tani me lewai iko, ko ya sa sega ni wekamu.

16Ia me kakua ga ni vakavuqataka vei koya na ose ko koya, se vakalesui ira na tamata ki Ijipita, me vuqa kina na nona ose: ni sa kaya oti vei kemudou ko Jiova, Mo dou kakua ni lesu tale e na sala ko ya.

17Ia me kakua talega ni vakavuqataka na watina, me kakua kina ni lako tani na yalona: me kakua talega ni vakalevutaka vakalevu na nona siliva kei na nona koula.

18Ia ena yaco ni na tiko ko koya e na nonai tikotiko vakatui, me na qai vola ko koya na vunau o qo me nonai vola, me vakai ko ya sa nodra na bete na luve i Levi:

19ia ena dautiko kaya, ka me dauwili kina ko koya e na veisiga sa bula kina: me vakavulici kina ko koya me rerevaki Jiova na nona Kalou, me vakabauta na vosa kecega ni vunau o qo kei na veilesilesi o qo, me cakava:

20me kakua ni viavialevu kina na lomana vei ira na wekana, me kakua talega ni lako tani mai na vunau, ki nai matau se nai mawi: me balavu kina na nona bula ni sa tui ko koya, ko koya, kei iratou na luvena, e na kedra maliwa na Isireli.