1MO nanuma na vula ko Apipi, ka ia na solevu ni lako-sivia vei Jiova na nomu Kalou: ni sa kauti iko tani mai Ijipita ko Jiova na nomu Kalou e na vula ko Apipi, e na bogi.
2Ia mo cabora kina nai soro ni lako-sivia vei Jiova na nomu Kalou, maivei ira na sipi kei na karavau, e na yasana sa digitaka ko Jiova me vakatikora kina na yacana.
3Mo kakua ni kania kaya na ka sa vakalevenitaki; me bogi vitu mo kania tiko kaya na ka sa tawa vakalevenitaki, na kakana ni rarawa; ni ko a lako vakusakusa mai na vanua ko Ijipita: mo nanuma kina na siga ko a lako tani kina mai na vanua ko Ijipita, e na veisiga kecega ko sa bula kina.
4Ia me kakua ni raici vei iko na ka sa vakaleveni ka bogi vitu e na nomu yasana kecega; me kakua talega ni vo e na bogi, me yacova na mataka, e dua na tiki ni lewe ni manumanu ko sa cabora e na yakavi e nai matai ni siga.
5E sega ni tara mo cabora nai soro ni lako-sivia e na nomu lomanibai kecega, a ya sa solia vei iko ko Jiova na nomu Kalou:
6e na yasana ga sa digitaka ko Jiova na nomu Kalou me vakatikora kina na yacana, mo cabora maikina nai soro ni lako-sivia e na yakavi, ni sa laʼki dromu na siga, e na tiki-ni-siga ko a lako tani kina mai Ijipita.
7Ia mo tavuna ka kania e na yasana sa digitaka ko Jiova na nomu Kalou: ia ko na lesu e na mataka, ka lako yani ki na nomu veivale.
8E ono na siga mo kania kina na ka sa tawa vakalevenitaki: ia e nai kavitu ni siga me dua nai soqosoqo tabu e na vuku i Jiova na nomu Kalou: mo kakua ni kitaka kina na cakacaka.
9Mo wilika vei iko e vitu na wiki: mo vakatekivu me wilika na wiki e vitu mai nai vakatekivu ni tamusuka na sila.
10A mo kitaka na solevu ni veiwiki vei Jiova na nomu Kalou, ni ko cabora nai vakacavacava sa vinakata na lomamu e rawarawa vei iko, a ya ko na solia, me vaka sa vakalougatataki iko ko Jiova na nomu Kalou:
11ia ko na rereki e na mata i Jiova na nomu Kalou, ko iko, kei na luvemu tagane, kei na luvemu alewa, kei na nomu tamata, kei na nomu vada, kei na luve i Levi sa tiko e nomu lomanibai, kei na vulagi, kei na tawa-vakatamani, kei na alewa dawai, era sa tiko kei kemudou, e na yasana sa digitaka ko Jiova na nomu Kalou me vakatikora kina na yacana.
12Ia mo nanuma ni ko a bobula mai Ijipita: mo nanuma talega me cakava na veilesilesi o qo.
13Mo ia na solevu ni vale taba ni kau ka bogi vitu, ni ko sa kumuna vata oti na nomu sila kei na nomu waini:
14ia ko na rereki e na nomu solevu, ko iko, kei na luvemu tagane, kei na luvemu alewa, kei na nomu tamata, kei na nomu vada, kei na luve i Levi, kei na vulagi, kei na tawa-vakatamani, kei na alewa dawai, era sa tiko e nomu lomanibai.
15Sa bogi vitu mo ia kina na solevu vei Jiova na nomu Kalou, e na yasana sa na digitaka ko Jiova: ni na vakalougatataki iko ko Jiova na nomu Kalou e na nomu vuata kecega, kei na cakacaka kecega ni ligamu; o koya ko na reki vakaidina kina.
16Era na rairai vakatolu e na mata i Jiova na nomu Kalou ko ira kecega na nomu tagane e na yabaki, e na yasana sa na digitaka ko koya; e na solevu ni ka sa tawa vakalevenitaki, kei na solevu ni veiwiki, kei na solevu ni vale taba ni kau: ia me ra kakua ni rairai lala e na mata i Jiova:
17na tamata yadua me vaka na ka sa rawata, me vaka na ka sa solia vei iko ko Jiova na nomu Kalou ni sa vakalougatataki iko.
18Mo lesia vei iko e so na dauveilewai kei na turaga lalai e na nomu koro kecega, a ya sa solia vei iko ko Jiova na nomu Kalou, e na nomu veiyavusa: a ra na lewai ira na tamata e na lewa dodonu.
19Mo kakua ni kauta vakatani na lewa; mo kakua ni vinakata na mata ni tamata, se taura nai solisoli: ni sa vakamatabokotaka na mata ni vuku nai solisoli, ka kauta vakatani na nodra vosa na dodonu.
20A ka sa dodonu walega mo muria, mo bula kina, ka taukena na vanua sa solia vei iko ko Jiova na nomu Kalou.
21Mo kakua ni tea vei iko e dua na kau me kaloualewa ni veikau, me voleka ki nai cabocabo-ni-soro i Jiova na nomu Kalou, a ya ko sa cakava vei iko.
22Mo kakua talega ni vakaduria e dua na matakau; o qori sa cata ko Jiova na nomu Kalou.
Who We AreWhat We EelieveWhat We Do
2025 by iamachristian.org,Inc All rights reserved.
