1NI sa oti na yabaki e vitu mo dauia e dua na veisere.
2A sa vakaoqo nai valavala ni veisere: A tamata yadua sa solia-sarava na ka vua na kai nona, me na qai sereka tawa saumi; me na kakua ni taroga vua na kai nona, se na wekana: ni sa kacivaki na veisere i Jiova.
3E dodonu mo taroga vua na kai tani: ia na nomu ka sa tu vua na wekamu mo sereka tawa saumi:
4ia ena sega beka ga na dravudravua vei kemudou; ni na vakalougatataki iko vakalevu ko Jiova e na vanua sa solia vei iko ko Jiova na nomu Kalou mei votavota mo taukena;
5kevaka ko sa vakarorogo vakavinaka ki na domo i Jiova na nomu Kalou, mo nanuma me cakava na vunau kecega o qo kaʼu sa vunautaka vei iko edaidai.
6Ni na vakalougatataki iko ko Jiova na nomu Kalou, me vaka ka kaya vei iko: ia ko na solia-sarava vei ira na matanitu e vuqa, ia ko na tawa sarava: ko na lewa talega na matanitu e vuqa, a ra na tawa lewai iko.
7Kevaka sa dua vei iko na tamata dravudravua, e dua vei ira na wekamu, e na dua na nomu lomanibai, e na nomu vanua sa solia vei iko ko Jiova na nomu Kalou, mo kakua ni vakaukauwataka na yalomu, se qumia na ligamu vua na wekamu dravudravua:
8ia mo dolava sara ga na ligamu vei koya, ka solia-sarava sara vei koya me ganita na nona dravudravua, a ya sa dravudravua kina.
9Mo qarauni iko de dua na nanuma e na yalomu ca, ka vaka, Sa voleka mai nai kavitu ni yabaki, na yabaki ni veisere; ka ca na matamu vua na wekamu dravudravua, ka ko sega ni ia vua nai loloma; a sa tagi vei Jiova e na vukumu ko koya, ka ko sa cala kina.
10Mo ia vua vakaidina nai loloma, mo kakua talega ni yalo ca ni ko sa ia vua nai loloma: ia e na vuku ni ka o qo ena vakalougatataki iko ko Jiova na nomu Kalou e na nomu cakacaka kecega, kei na ka kecega sa dodo kina na ligamu.
11Ni na sega ni mudu na dravudravua mai na vanua: o koya kaʼu sa vakaroti iko kina, ka kaya, Mo dolava sara na ligamu vua na wekamu, ki na nomu kaisi, kei na nomu dravudravua, e na nomu vanua.
12Kevaka sa volitaki vei iko e dua na wekamu, a tagane Iperiu, se na alewa Iperiu, a sa qaravi iko ka ono na yabaki; mo na qai laiva me lako yani vei iko mo lalaga, e nai kavitu ni yabaki.
13Ia ni ko sa laiva me lako yani vei iko me lalaga, mo kakua ni laiva me lako lala yani:
14mo solia vakayauyau vei koya mai na nomu sipi, ka mai na nomu sila, ka mai na nomu waini: mo solia vei koya mai na ka sa vakalougatataki iko kina ko Jiova na nomu Kalou.
15Ia mo nanuma ni ko a bobula mai na vanua ko Ijipita, a sa vakabulai iko ko Jiova na nomu Kalou: o koya kaʼu sa vunautaka kina na ka o qo vei iko edaidai.
16Ia kevaka sa kaya vei iko ko koya: Au na sega ni via lako yani vei iko; ni sa lomani iko kei na nomu lewe-ni-vale, ni sa tiko vinaka kei iko;
17mo qai taura nai cula, ka cula na daligana ka veituitui-taka kei nai sogo, ena qai nomu bobula ka tawa mudu. Ia mo kitaka talega vakakina vua na nomu vada.
18Me kakua ni vaka na ka sa dredre vei iko, ni ko laivi koya me lako yani vei iko me lalaga; ni sa tauvata na nona qaravi iko e na yabaki e ono kei na yabaki e tinikarua ni tamata sa voli na nona cakacaka: ia ena vakalougatataki iko ko Jiova na nomu Kalou e na ka kecega ko sa cakava.
19A ulumatua tagane kecega ni nomu karavau kei na nomu sipi, mo vakatabuya me nona ko Jiova na nomu Kalou: mo kakua ni kitaka na ulumatua ni nomu karavau me cakacaka, mo kakua talega ni kotiva na ulumatua ni nomu sipi.
20Mo kania ga, ko iko kei na nomu lewe-ni-vale, e na mata i Jiova na nomu Kalou, e na veiyabaki, e na yasana sa digitaka ko Jiova.
21Ia kevaka sa ca e dua na tikina, ke sa lokiloki, se mataboko, se dua na tikina e ca, mo kakua ni cabora vei Jiova na nomu Kalou.
22Mo kania e nomu lomanibai: ko koya sa tawa savasava vata kei koya sa savasava, me vaka na teira lasa kei na teira kila.
23Ia na kena dra ga mo kakua ni kania; mo livia ki na qele me vaka na wai.
Who We AreWhat We EelieveWhat We Do
2025 by iamachristian.org,Inc All rights reserved.
