Nai Vakarua 14 - AI VOLA TABU（FIJ1864）

Me ra kakua ni vakacacana na yagodra, 1, 2. A ka sa tara kei na ka sa tabu ni kani, 3-27. E dua na ka ni loloma vei ira na dravudravua, 28, 29.

1OI kemuni sa luve i Jiova na nomuni Kalou: mo ni kakua ni tavai kemuni, se tasia na yadremuni, e na vuku ni mate.

2Ni ko sa matanitu savasava vei Jiova na nomu Kalou, a sa digitaki iko ko Jiova me nona matanitu talei, maivei ira na matanitu kecega sa tiko e dela i vuravura.

3Mo kakua ni kania na ka sa vakasisila.

4O qo na manumanu e yavai va mo ni kania: Na karavau, na sipi, kei na koti;

5na mataqali e va ni teira, kei na yavusa e rua ni koti kila, kei na kameli sa wase rua na kena ququ.

6Kei na manumanu e yavai va kecega sa wase na kena ququ, ka basika na wase e rua, ka sa mama vakarua na kena, vei ira na manumanu e yavai va, o qori mo ni kania.

7Ia ko ira o qo vei ira sa mama vakarua na kena, kei ira sa wase na kena ququ, dou kakua ni kania; na kameli, kei na eri, kei na tamani: ni ra sa mama vakarua na kedra, ka sa sega ni wase na kedra ququ; era sa tawa savasava vei kemuni.

8Kei na vuaka, ni sa wase na kena ququ, ka sa sega ni mama vakarua na kena, sa tawa savasava vei kemuni: mo ni kakua ni kania na lewedra, mo ni kakua talega ni tara na yagodra ni sa mate.

9A veika o qo mo ni kania e na ka kecega mai wai: a ka kecega sa vakatutuna ka vakavarina mo ni kania.

10Ia na ka kecega sa sega ni vakatutuna ka vakavarina mo ni kakua ni kania; sa tawa savasava vei kemuni.

11A manumanu vuka kecega sa savasava mo ni kania.

12Ia na veika o qo vei ira mo ni kakua ni kania: na mataqali e tolu ni ikeli,

13kei na veimataqali ni vulituri,

14kei na mataqali kecega ni reveni,

15kei na ositereji, kei na mataqali kecega ni lulu kei na manulevu,

16io na lulu tabu, kei na lulu tani,

17kei na veimataqali ni suani,

18kei na veimataqali ni belo, kei na upupa, kei na beka.

19Ia na manumanu vuka kecega sa dauqasi sa tawa savasava vei kemuni: e tabu ni ra sa kani.

20Na manumanu vuka kecega sa savasava e tara mo ni kania.

21E tabu ni kemuni kania e dua na ka sa mate loa: mo solia vua na vulagi sa tiko e nomu lomanibai, me kania ko koya; se mo volitaka vua na kai tani: ni ko sa matanitu savasava vei Jiova na nomu Kalou.

Mo kakua ni saqata na luve ni koti e na wai-ni-sucu i tinana.

22Mo solia vakaidina na kenai katini ni vua ni nomu teitei kecega, a ya sa vuataka na veiwere e na veiyabaki.

23Ia mo kania nai katini ni nomu sila, na nomu waini, kei na nomu waiwai, kei na ulumatua ni nomu karavau kei na nomu sipi, e na mata i Jiova na nomu Kalou, e na yasana sa digitaka ko koya me vakatikora kina na yacana; mo vakavulici kina mo rerevaki Jiova tikoga na nomu Kalou.

24Ia kevaka sa balavu vei iko na sala, mo dredre kina ni kauta, ni sa yawa vei iko na yasana sa digitaka ko Jiova na nomu Kalou me vakatikora kina na yacana, ni sa; vakalougatataki iko ko Jiova na nomu Kalou:

25mo qai veisau mei lavo, ka vauca nai lavo e na ligamu, ka lako ki na yasana sa digitaka ko Jiova na nomu Kalou:

26ko na qai solia nai lavo ko ya me rawa kina na ka kecega sa garova na yalomu, se na karavau, se na sipi, se na waini, se na yaqona kaukauwa, se na ka tani kecega sa garova na yalomu: ia mo kana maikea e na mata i Jiova na nomu Kalou, ka rereki, ko iko, kei ira na nomu lewe-ni-vale;

27ia na luve i Levi sa tiko e nomu lomanibai, mo kakua ni biuta; ni sa sega na nona tikina se nonai votavota vata kei iko.

28Ni sa cava na yabaki e tolu mo kauta mai nai katini kecega ni nomu vuata e na yabaki ko ya, ka binia e nomu lomanibai:

29ia na luve i Levi, (ni sa sega na nona tikina se nonai votavota vata kei iko,) kei na kai tani, kei na tawa-vakatamani, kei na alewa dawai, sa tiko e nomu lomanibai, me ra lako mai, ka kana ka mamau; me vakalougatataki iko kina ko Jiova na nomu Kalou e na cakacaka kecega ni ligamu ko sa kitaka.