Nai Vakarua 13 - AI VOLA TABU（FIJ1864）

A vunau e na vuku ni parofita vakailasu, 1-11. Me vakarusai na koro sa vuki me qarava e so na kalou lasu, 12-18.

1KEVAKA sa tubu vei iko e dua na parofita se na dautadra, a sa solia vei iko nai vakatakilakila se na cakacaka-mana,

2a sa yaco nai vakatakilakila se na cakacaka-mana, sa vosa kina ko koya vei iko, ni sa kaya, Tou laʼki muria na kalou tani e so, ka qaravi ira;

3mo kakua ni rogoca na vosa ni parofita ko ya, se na dautadra ko ya: ni sa vakatovolei kemuni kina ko Jiova na nomuni Kalou, me kila se kemuni na lomani Jiova na nomuni Kalou e na lomamuni taucoko kei na yalomuni taucoko, se segai.

4Mo ni muri Jiova ga na nomuni Kalou, ka rerevaki koya, ka vakabauta na nona vunau, ka vakarorogo ki na domona, ka qaravi koya, ka kabiti koya.

5Ia na parofita ko ya, se na dautadra ko ya, ena vakamatei; ni sa cikeva na vuki tani maivei Jiova na nomudou Kalou, o koya sa kauti kemuni mai na vanua ko Ijipita, ka vakabulai kemuni mai na vale ni veivakabobulataki; me vakasesei iko tani mai na sala sa vunautaka vei iko ko Jiova na nomu Kalou mo lako kina. Ko na biuta tani kina na ca mai na nomudou maliwa.

6Kevaka sa temaki iko vakavuni na tuakamu se na tacimu, na luvena tagane na tinamu, se na luvemu tagane, se na luvemu alewa, se na watimu sa koto e na lomaseremu, se na wekamu sa vaka na yalomu, e kaya, Daru laʼki qarava na kalou tani e so; a ya ko sa tawa kila, ko iko, se na nomu qase;

7maivei ira na nodra veikalou na tamata era tiko vaka-volivoliti kemudou, se ra voleka vei iko, se vakayawa vei iko, mai nai yalayala e dua kei vuravura ka yacova nai yalayala kadua kei vuravura;

8mo kakua ni yalo-vata kaya, se vakarorogo vua; me kakua talega ni lomani koya na matamu, mo kakua talega ni vosoti koya, mo kakua talega ni vunitaki koya:

9ia mo vakamatei koya vakaidina ga; me yaviti koya taumada na ligamu me mate kina, ia me qai yavita emuri na ligadra na tamata kecega.

10Ia mo viriki koya e na vatu, me mate kina ko koya, e na vuku ni sa vakasaqara me vakasesei iko tani vei Jiova na nomu Kalou, o koya ka kauti iko mai na vanua ko Ijipita, mai na vale ni veivakabobulataki.

11Ena qai rogoca ko ira na Isireli kecega, ka rere, ka tawa cakava tale na ka ca vakaoqo e na kemudou maliwa.

12Kevaka ko na rogoca e na dua na nomu koro, sa solia vei iko ko Jiova na nomu Kalou mo tiko kina, ka vaka,

13E so na tamata, na luve ni ca, era sa lako tani maivei kemudou, a sa vakasesei ira tani na lewe ni nodra koro, ni ra kaya, Tou lako me qarava na kalou tani e so, kemudou sa tawa kila;

14mo na qai taroga, ka vakasaqara, ka qaqa; ia kevaka sa dina, sa vakadinadinataki ni sa caka na ka vakasisila o qo e na kemudou maliwa;

15mo na qai yavita vakaidina na lewe ni koro ko ya e na bati ni seleiwau me rusa sara, kei na ka kecega sa tiko kina, kei na kena manumanu e yavai va, e na bati ni seleiwau.

16Ia na kenai toki kecega, mo kumuna vata ki loma ni rara, ka vakama na koro e na buka, kei na kenai toki kecega, me oti sara, e na vuku i Jiova na nomu Kalou: ia ena suva wale tu ka tawa mudu; ko ya ena tawa tara tale.

17Ia me kakua ni kabita na ligamu e dua na ka sa lesi me vakarusai: me lesu kina ko Jiova mai na nona cudru waqawaqa, ka caka vinaka vei iko, ka lomani iko, ka vakalewevuqa-taki iko, me vaka sa vosavavakini vei ira na nomu qase;

18ni ko sa vakarorogo ki na domo i Jiova na nomu Kalou, me vakabauta na nona vunau kecega kaʼu sa vunautaka vei iko edaidai, me caka dodonu e na mata i Jiova na nomu Kalou.