1SA vakaoqo na veilesilesi kei na lelewa, a ya kemuni na vakabauta me cakava e na vanua sa solia vei iko ko Jiova na nodra Kalou na nomu qase, mo taukena, e na veisiga kecega kemuni sa bula kina e dela i vuravura.
2Mo ni vakacacana sara na tikina kecega era a qarava kina na nodra veikalou na veimatanitu kemuni na taukena, e dela ni veiulu-ni-vanua cecere, kei na dela ni vei vanua-cecere, kei na ruku ni kau karakarawa kecega:
3ia kemuni na vakacacana talega na nodra veicabocabo-ni-soro, ka musumusuka na nodra veimatakau, ka vakama na nodra veikaloualewa ni veikau e na buka; ia kemuni na taya sobu na veimatakau ni nodra veikalou sa ceuceu, ka vakaotia na yacadra mai na yasana ko ya.
4Mo ni kakua ni kitaka vakakina vei Jiova na nomuni Kalou:
5ia na yasana ga sa na digitaka ko Jiova na nomuni Kalou mai na nomuni veiyavusa kecega, me vakatikora kina na yacana, mo ni dauqarava na nonai tikotiko, ka daulako mai kina:
6ia mo ni kauta kina na nomuni veisoro kama, kei na nomuni manumanu sa cabori, kei nai katini ni nomuni veika, kei nai soro ni ligamuni e lavelaveti, kei na veika kemuni a vosavavakini kina, kei na veisoro sa lomamudou ga me cabora, kei na ulumatua ni nomuni karavau, kei na nomuni sipi:
7ia kemuni na kana maikea e na mata i Jiova na nomuni Kalou, ka rereki e na ka kecega sa dodo kina na ligamuni, koi kemuni, kei ira na nomuni lewe-ni-vale, sa vakalougatataki iko kina ko Jiova na nomu Kalou.
8Kemuni na tawa cakava me vaka na ka kecega eda sa cakava eke e na siga o qo, na tamata yadua na ka kece sa vinaka e matana.
9Ni kemuni sa tawa yaco edaidai ki nai vakavakacegu kei nai votavota, sa solia vei kemuni ko Jiova na nomuni Kalou.
10Ia ni kemuni sa yaco ki tai kadua ni Joritani, ka tiko e na vanua sa solia vei kemuni, mo ni taukena, ko Jiova na nomuni Kalou, ka sa vakacegui kemuni maivei ira kecega na nomuni meca sa vakavolivolita ka ni sa tiko vakacegu;
11ena qai dua na yasana sa digitaka ko Jiova na nomuni Kalou, me vakatikora kina na yacana; mo ni kauta mai kina na ka kecega kaʼu sa vakarota vei kemuni; na nomuni veisoro kama, kei na nomuni manumanu sa cabori, kei nai katini ni nomuni veika, kei nai soro ni ligamuni e lavelaveti, kei na veika talei kecega, kemuni sa vosavavakini kina vei Jiova:
12ia kemuni na rereki e na mata i Jiova na nomuni Kalou, koi kemuni, kei ira na luvemuni tagane, kei ira na luvemuni alewa, kei ira na nomuni tamata, kei ira na nomuni vada; kei na luve i Levi sa tiko e na nomuni lomanibai, e na vuku ni sa sega na nona tikina sei votavota vata kei kemuni.
13Mo qarauni iko mo kakua ni cabora na nomui soro kama e na yasana kecega ko sa raica:
14ia e na yasana ga sa digitaka ko Jiova e na dua na nomu yavusa, mo cabora kina na nomui soro kama, ka cakava maikina na ka kecega kaʼu sa vunautaka vei iko.
15Ia sa tara ga mo vakamatea ka kania na lewe ni manumanu e na nomu lomanibai kecega, a ka kecega sa kusikusima kina na yalomu, me vaka nai loloma i Jiova na nomu Kalou, a ya sa solia ko koya vei iko: me kania ga ko koya sa tawa savasava kei koya sa savasava, me vaka sa daukani na teira lasa kei na teira kila.
16Ia na dra ga mo dou kakua ni kania; dou livia ga ki na qele me vaka na wai.
17E sega ni tara mo kania e na nomu lomanibai nai katini ni nomu sila, se na nomu waini, se na nomu waiwai, se na ulumatua ni nomu karavau kei na nomu sipi, se dua na ka ko sa vosavavakini kina, se nai soro sa lomamu ga me cabora, se nai soro ni ligamu e lavelaveti:
18ia mo kania ga e na mata i Jiova na nomu Kalou e na yasana sa digitaka ko Jiova na nomu Kalou, o iko, kei na luvemu tagane, kei na luvemu alewa, kei na nomu tamata, kei na nomu vada, kei na luve i Levi sa tiko e na nomu lomanibai: ia ko na rereki e na mata i Jiova na nomu Kalou e na ka kecega sa dodo kina na ligamu.
19Mo qarauni iko mo kakua ni biuta na luve i Levi e na nomu veisiga kecega e vuravura.
20Ni sa vakarabailevutaka na nomu vanua ko Jiova na nomu Kalou, me vaka ka yalataka vei iko, ka ko sa kaya, Au na kana lewe ni manumanu, ni sa kusima na yalomu; e tara mo kana manumanu, me vaka na ka kecega sa kusikusima kina na yalomu.
21Kevaka sa yawa vei iko na yasana sa digitaka ko Jiova na nomu Kalou, me vakatikora kina na yacana, sa qai tara mo vakamatea e so na nomu karavau kei na nomu sipi, sa solia vei iko ko Jiova na nomu Kalou, me vaka kaʼu sa vakarota vei iko, ia ko na kania e na nomu lomanibai na ka kecega sa kusikusima kina na yalomu.
22Ia mo kania me vaka sa daukani na teira lasa kei na teira kila: ena kania ko koya sa tawa savasava, kei koya talega sa savasava.
23Ia mo raica vinaka mo kakua ni kania na dra: ni sa kena bula na dra; a sa tabu ni ko sa kania vata na kena bula kei na lewena.
24Mo kakua ni kania; mo livia ki na qele me vaka na wai.
25Mo kakua ni kania; me yacovi iko kina na ka vinaka, kei ira na luvemu era sa muri iko, ni ko sa caka dodonu e na mata i Jiova.
26Ia na nomu veika ga e tabu, kei na veika kemuni sa vosavavakini kina, mo taura, ka lako ki na yasana sa na digitaka ko Jiova:
27ia ko na cabora na nomu veisoro kama, na lewena kei na dra, e dela ni cabocabo-ni-soro i Jiova na nomu Kalou: ena livi yani talega na dra ni nomu veisoro e na dela ni cabocabo-ni-soro i Jiova na nomu Kalou, ia na lewena ko na kania.
28Mo nanuma ka vakarogoca na vosa kecega o qo kaʼu sa vunautaka vei iko, me yacovi iko kina na ka vinaka, kei ira na luvemu era na muri iko, ka tawa mudu, ni ko sa caka dodonu ka vinaka e na mata i Jiova na nomu Kalou.
29Ni na muduka tani e matamu ko Jiova na nomu Kalou na veimatanitu ko sa lako kina mo taukena, ka ko sa kedrai sosomi, ka tiko e nodra vanua;
30mo qarauni iko mo kakua ni coriti me muri ira, ni ra sa vakarusai tani oti e matamu; ia mo kakua talega ni tarotaroga na nodra veikalou, ka kaya, Era a qarava vakaevei na nodra veikalou na veimatanitu o qo? au na kitaka vakakina koi au.
31Mo kakua ni cakacaka vakakina vei Jiova na nomu Kalou: ni ra sa kitaka ki na nodra veikalou na ka kecega sa vakasisilataka ko Jiova, sa cata ko koya; ia na luvedra tagane kei na luvedra alewa era sa vakama e na buka ki na nodra veikalou.
32A ka kecega kaʼu sa vunautaka vei kemudou, dou vakabauta me cakava: mo ni kakua ni kuria, se vakalailaitaka.
Who We AreWhat We EelieveWhat We Do
2025 by iamachristian.org,Inc All rights reserved.
