1IA mo lomani Jiova na nomu Kalou, ka vakabauta na ka sa kaya ko koya, kei na ka sa lesia, kei na ka sa lewa, kei na nona vunau, e na veisiga kecega.
2Ia mo ni kila edaidai: niʼu sa sega ni vosa vei ira na luvemuni era sa tawa kila, ka sa sega ni raica na vakanakuitataki maivei Jiova na nomuni Kalou, na kena levu, na ligana kaukauwa, kei na ligana sa dodo yani,
3kei na nona veivakatakilakila, kei na nona cakacaka, sa cakava ko koya e loma i Ijipita, kivei Fero na tui Ijipita, kei na nona vanua taucoko;
4kei na ka sa cakava ko koya ki nai valu ni Ijipita, ki na nodra veiose, kei na nodra veivale-vodoki; ni sa cakava na wai ni Wasa Damudamu me luvuci ira ni ra sa cicimuri kemuni, ka sa vakarusai ira ko Jiova ka yacova na siga o qo;
5kei na ka sa cakava ko koya vei kemudou mai na lekutu, ka yacova na nomudou lako mai ki na yasana o qo;
6kei na ka sa kitaka ko koya kivei Tacani kei Epirami, na luve i Iliapi, na luve i Rupeni: ni sa dalaga na gusuna na vanua, ka tilomi rau, kei na nodrau lewe-ni-vale, kei na nodra veivale gatu, kei na yau kecega sa tu vei ira, e na nodra maliwa na Isireli kecega:
7ia na matamuni sa raica na cakacaka levu kecega i Jiova sa cakava ko koya.
8Ia dou vakabauta kece kina na vunau kaʼu sa vunautaka vei kemuni e na siga o qo, mo ni kaukauwa kina, ka lako me taukena na vanua, kemuni sa lako yani kina me taukena;
9me balavu talega na nomuni bula, e na vanua sa vosavavakini kina vei ira na nomuni qase ko Jiova, me solia vei ira kei na nodra kawa, e dua na vanua sa dave kina na wai-ni-sucu kei na oni.
10Ia na vanua ko sa lako kina me taukena, sa sega ni vaka na vanua ko Ijipita, kemuni sa lako maikina, ko a kaburaka kina na nomu sore ni sila, ka vakasuasuataka e na yavamu, me vaka na were ni co laukani:
11ia na vanua kemuni sa lako kina me taukena, sa vanua e vuqa kina na ulu-ni-vanua, kei na qakilo, sa gunuva na wai ni uca mai lomalagi:
12e dua na vanua sa vakaraica tiko ko Jiova na nomu Kalou: sa qarava tikoga na mata i Jiova na nomu Kalou, mai nai vakatekivu ni yabaki ka yacova nai vakataotioti ni yabaki.
13Ia ena yaco, kevaka kemuni sa vakarorogo vakavinaka ki na noqu vunau, kaʼu sa vunautaka vei kemuni e na siga o qo, mo ni lomani Jiova na nomuni Kalou, ka me qaravi koya, e na lomamuni taucoko kei na yalomuni taucoko,
14au na qai solia na uca ki na nomuni vanua e na kena gauna, na uca taumada kei na uca tau-muri, mo kumuni mai kina na nomu sila, kei na nomu waini, kei na nomu waiwai;
15ia kaʼu na solia na co e na nomu tiki ni vanua me kedra na nomu manumanu e yavai va, mo kana kina ka mamau.
16Mo ni qarauni kemuni, me kakua ni vakacalai na lomamuni, kemuni sa qai lesu tani, ka qarava na kalou tani e so, ka cuva vei ira;
17asa waqa mai kina na cudru i Jiova vei kemuni, a sa sogota na lagi ko koya, me kakua kina na uca, ka sa tawa vuataka na kena vua na vanua: a kemuni sa rusa vakasauri mai na vanua vinaka sa solia vei kemuni ko Jiova.
18Ia mo ni maroroya na noqu vosa o qo e na lomamuni kei na yalomuni, ka vauca mei vakatakilakila e na ligamuni, a me na vaka nai ukuuku e na tadrua ni matamuni.
19Ia mo ni vakavulica vei ira na luvemuni, ka dauvosataka ni ko sa tiko e na nomu vale, ni ko sa lako voli talega e na sala, ka ni ko sa laʼki koto, ni ko sa duri cake talega.
20Mo vola talega e na duru ni katuba ni nomu vale, kei nai sogo ni nomu matamata-ni-koro:
21me vuqa kina na nomu siga kei na nodra siga na luvemuni, e na vanua sa vosavavakini kina ko Jiova vei ira na nomuni qase me solia vei ira, me vaka na siga ni lomalagi e vuravura.
22Ia kevaka kemuni na vakabauta vakavinaka na vunau kecega o qo kaʼu sa vunautaka vei kemuni me caka, mo ni lomani Jiova na nomuni Kalou, me lako e nona sala kecega, ka kabiti koya;
23ena qai vakasevi ira tani ko Jiova e na matamuni na matanitu kecega o qori, ia kemuni na taukena e so na matanitu sa levu ka kaukauwa, ka lailai ka malumalumu koi kemuni.
24A yasana kecega sa butuka na qeteqete ni yavamuni ena nomuni ga: mai na lekutu kei Lipanoni, mai na uciwai ko ya, na uciwai ko Uferetisi, ka yacova na Wasawasa mai ra, ena nomuni yalayala.
25Sa na sega na tamata me tu rawa e na matamuni: ena vakatubura na rere kei na domobula e na vukumuni ko Jiova e na vanua kecega kemuni na butuka, me vaka ka kaya vei kemuni.
26Raica, kaʼu sa tauca e na matamuni e na siga o qo na vosa ni veivakalougatataki kei na vosa ni veivakarusai:
27a vosa ni veivakalougatataki, kevaka kemuni sa vakarorogo ki na vunau i Jiova na nomuni Kalou, a ya kaʼu sa vunautaka vei kemuni edaidai:
28kei na vosa ni veivakarusai, kevaka kemuni sa tawa vakarorogo ki na vunau i Jiova na nomuni Kalou, ka sa lesu tani mai na sala kaʼu sa vunautaka vei kemuni edaidai, ni kemuni muria na kalou tani e so kemuni sa tawa kila.
29Ia ena yaco, ni sa kauti iko ko Jiova na nomu Kalou ki na vanua ko sa lako kina me taukena, mo qai vakatura na vosa ni veivakalougatataki e dela ni ulu-ni-vanua ko Kirisimi, kei na vosa ni veivakarusai e dela ni ulu-ni-vanua ko Epali:
30sa sega li ni rau tu e na tai kadua ni Joritani, kivaka ki na tikina sa dromudromu kina na siga, e na nodra vanua na kai Kenani, era sa tiko e na cecelevu sa donui Kilikali, sa voleka ki na veioki mai More?
31Ni kemuni na lako-kosova na Joritani, me laʼki taukena na vanua sa solia vei kemuni ko Jiova na nomuni Kalou, ia kemuni na taukena, ka tiko kina.
32Ia kemuni na vakabauta me cakava nai lesilesi kecega, kei na lelewa, kaʼu sa tauca e na matamuni e na siga o qo.
Who We AreWhat We EelieveWhat We Do
2025 by iamachristian.org,Inc All rights reserved.
