Nai Vakarua 10 - AI VOLA TABU（FIJ1864）

Sa vola tale na vatu ko Jiova, 1-5. A mate i Eroni, 6, 7. Sa tawase ko ira na luve i Levi, 8, 9. Sa rogoci Mosese ko Jiova ni sa masulaki ira na Isireli, 10, 11. Sa vunauci ira ko Mosese me ra talairawarawa, 12-22.

1E NA gauna ko ya sa kaya vei au ko Jiova, Mo taya vei iko e rua na vatu raraba, me vaka na kena eliu, ka cabe vei au ki na ulu-ni-vanua, ka cakava vei iko e dua na kato kau:

2ia kaʼu na vola e na ka raraba na vosa sa volai e na ka raraba eliu, a ya ko a vorota, ia mo qai viria ki na kato.

3Ia kaʼu a cakava e dua na kato e na kau Sitimi, ka taya e rua na vatu raraba sa vaka na kena eliu, a sa cabeta na ulu-ni-vanua, ka taura na ka raraba ruarua e na ligaqu.

4A sa vola ko koya ki na ka raraba, me tautauvata kei nai volavola eliu, na vunau e tini, a ya ka cavuta vei kemuni ko Jiova mai na ulu-ni-vanua mai na loma ni buka waqa e na siga ni soqosoqo levu: a sa solia mai vei au ko Jiova.

5Au a qai gole ka siro sobu mai na ulu-ni-vanua, ka viria na ka raraba ki na kato kaʼu a cakava; a rau sa koto kina, me vaka ka vakarota vei au ko Jiova.

6A ra sa lako tani ko ira na luve i Isireli, mai Pieroci era sa taukena na luve i Yeekani, me laʼki Mosera: sa ciba maikina ko Eroni, a sa buluti maikea; a sa bete mai ko Eliasari na luvena me kenai sosomi.

7Era sa lako tani maikea ki Kutikota; ka mai Kutikota ki Yotipaci, a vanua sa vuqa kina na uciwai.

8E na gauna ko ya sa wasea tani na yavusa i Levi ko Jiova, me colata na kato ni veiyalayalati i Jiova, me tu e na mata i Jiova me qaravi koya, ka me ia na vosa vakalougatataka e na yacana, ka yacova na siga o qo.

9O koya sa sega kina na nodra tikina se nai votavota ko ira na Levi vata kei ira na wekadra: o Jiova ga sa nodrai votavota, me vaka sa kaya vei ira ko Jiova na nomu Kalou.

10Ia kaʼu a tiko e na ulu-ni-vanua, me vaka eliu, me vasagavulu na siga ka vasagavulu na bogi; a sa vakarogoci au ko Jiova e na gauna talega ko ya; sa sega ni via vakarusai iko ko Jiova.

11A sa kaya vei au ko Jiova, Tu cake, mo lako mo liutaki ira na tamata, me ra lako kina ka taukena na vanua kaʼu a vosavavakini kina kivei ira na nodra qase me solia vei ira.

12IA o qo, na Isireli, a cava na ka sa taroga vei iko ko Jiova na nomu Kalou, mo rerevaki Jiova ga na nomu Kalou, me lako e na nona sala kecega ka lomani koya, ka qaravi Jiova na nomu Kalou, e na lomamu taucoko kei na yalomu taucoko,

13me vakabauta na vunau i Jiova, kei na ka sa lesia ko koya, a ya kaʼu sa vakarota vei iko e na siga o qo, me yaco vei iko na ka vinaka?

14Raica, sa nei Jiova na nomu Kalou na lomalagi, kei na lomalagi ecake sara, na vuravura, kei na ka kecega sa tu kina:

15ia ka sa marautaki ira na nomu qase ko Jiova me lomani ira, ka sa digitaka na nodra kawa era muri ira, io koi kemuni, vei ira na matanitu kecega, me vaka e na siga o qo.

16Ia mo ni ciliva na vuso ni yalomuni, ka mo ni kakua ni vakadomoqataki kemuni tiko.

17Ni sa nodra Kalou na veikalou ko Jiova na nomuni Kalou, kei na nodra Turaga na veituraga, a Kalou levu, a kaukauwa, ka rerevaki, ko koya sa sega ni vinakata vakatani na tamata, se taura nai voli:

18sa dauia na lewa e na vukudra na tawa-vakatamani kei na alewa dawai, ka sa lomana na vulagi, me dausolia vua na kakana kei nai sulu.

19Ia dou lomani ira na vulagi: ni dou a vulagi mai na vanua ko Ijipita.

20Mo rerevaki Jiova na nomu Kalou; mo qaravi koya, ka kabiti koya,; ka vosavavakini e na yacana.

21O koya ga sa kemui ukuuku, ka sa nomu Kalou ko koya, a ya sa cakava vei iko na ka lelevu ka rerevaki o qo, sa kunea na matamu.

22Eratou a lako sobu ki Ijipita na nomu qase, a ratou sa lewe vitusagavulu ga na tamata; ia o qo, sa cakavi iko ko Jiova na nomu Kalou me lewe vuqa me vaka na veikalokalo ni lomalagi.