Nai Vakarua 9 - AI VOLA TABU（FIJ1864）

Sa vunauci ira me ra kakua ni dokai ira e na yalododonu: a sa tukuna na nodra dautalaidredre.

1MO ni rogoca, na Isireli: Ko sa lako-kosova edaidai na Joritani, me laʼki taukena e so na matanitu sa levu ka kaukauwa, ka lailai ka malumalumu ko iko, na Veikoro lelevu ka sa yala ki lomalagi na kedra bai,

2a matanitu tamata lelevu ka balabalavu, na luve i Anaki, ko ira ko sa kila, ia ko sa rogoca ka vaka, O cei e tu rawa e na matadra na luve i Anaki!

3Mo kila mada edaidai, ni sa liutaki iko yani ko Jiova na nomu Kalou, na buka katikati: ena vakaoti ira, ka vakamalumalumutaki ira e na matamu: ia ko na vakasevi ira kina, ka vakaoti ira vakusakusa, me vaka ka kaya vei iko ko Jiova.

4Mo kakua ni vosa e lomamu, ni sa vakasevi ira tani e matamu ko Jiova na nomu Kalou, ka kaya, E na vuku ni noqui valavala dodonu sa kauti au mai ko Jiova me taukena na vanua o qo: e na vuku ga ni nodra tawa dodonu na veimatanitu o qori sa vakasevi ira kina e na matamu ko Jiova.

5Sa sega e na vuku ni nomui valavala dodonu, se na dodonu ni lomamu, ko sa lako kina mo taukena na nodra vanua: e na vuku ga ni nodra tawa dodonu na veimatanitu o qori sa vakasevi ira kina e na matamu ko Jiova na nomu Kalou, ka me vakayacora ko koya na vosa ka vosavavakini kina ko Jiova vei iratou na nomu qase, kivei Eparaama, ko Aisake, kei Jekope.

6Mo kila mada, ni sa sega ni solia vei iko na vanua vinaka o qo ko Jiova na nomu Kalou mo taukena, e na vuku ni nomu yalododonu; ni ko sa matanitu domoqa.

7Mo nanuma, kakua ni guilecava, ni ko a dauvakacudrui Jiova na nomu Kalou mai na lekutu: mai na siga ko a lako tani mai na vanua ko Ijipita, ka yacova na siga kemuni a yaco ki na yasana o qo, kemuni sa talaidredre vei Jiova.

8Mai Orepi talega kemuni a vakacudrui Jiova, a sa cudruvi kemuni ko Jiova me vakarusai kemuni.

9Ni kaʼu a cabe ki na ulu-ni-vanua me taura na vatu raraba, io na ka raraba ni veiyalayalati sa cakava kei kemuni ko Jiova, au a qai tiko e na ulu-ni-vanua ka vasagavulu na siga ka vasagavulu na bogi; au a sega ni kana madrai, se gunu wai:

10a sa solia vei au ko Jiova e rua na vatu raraba sa volai e nai qaqalo ni Kalou; a sa volai kina na vosa kecega sa vosataka vei kemuni ko Jiova mai na ulu-ni-vanua mai na loma ni buka waqa e na siga ni soqosoqo levu.

11Ia ni sa oti na siga e vasagavulu kei na bogi e vasagavulu, sa qai solia vei au ko Jiova na vatu raraba e rua ko ya, io na ka raraba ni veiyalayalati.

12A sa kaya vei au ko Jiova, Mo ia, mo lako sobu vakasauri eke; ni ra sa vakadukadukalitaki na nomu tamata ko a kauta tani mai Ijipita; era sa vuki tani vakasauri mai na sala kaʼu a vunautaka vei ira; era sa cakava vei ira e dua na ka vakawaicalataki.

13Sa vosa talega vei au ko Jiova, ka kaya, Au sa raici ira oti na matanitu o qo, ka, raica, sa matanitu domoqa:

14mo laivi au mada, meʼu vakarusai ira, ka bokoca na yacadra mai na ruku ni lomalagi: ia kaʼu na cakavi iko mo matanitu kaukauwa ka levu cake vei ira.

15Au a qai lesu ka siro sobu mai na ulu-ni-vanua, a sa waqa tiko na ulu-ni-vanua e na buka: a sa lutuki e na ligaqu ruarua na ka raraba e rua ni veiyalayalati.

16Kaʼu a qai rai yani, ka, raica, kemuni sa kitaka oti nai valavala ca vei Jiova na nomuni Kalou; kemuni sa bulia oti vei kemuni e dua na luve ni karavau sa vakawaicalataki: kemuni sa lesu tani oti vakasauri mai na sala sa vakarota vei kemuni ko Jiova.

17Ia kaʼu a kauta na ka raraba e rua, ka viritaka yani mai na ligaqu ruarua, ka vorolaka e na matamuni.

18Au a qai bale sobu e na mata i Jiova, me vaka eliu, e vasagavulu na siga ka vasagavulu na bogi; (au a sega ni kana madrai, se gunu wai;) e na vuku ni nomuni valavala ca kecega kemuni a valavala ca kina, ni kemuni a caka cala e na mata i Jiova, me vakacudrui koya.

19Niʼu a rerevaka na lesa kei na cudru katakata sa cudru kina vei kemuni ko Jiova me vakarusai kemuni. A sa rogoci au ko Jiova e na gauna talega ko ya.

20Sa cudruvi Eroni vakalevu talega ko Jiova me vakamatei koya: ia kaʼu a masulaki Eroni talega e na gauna ko ya.

21Kaʼu a qai taura na nomuni valavala ca, na luve ni karavau kemuni a bulia, ia kaʼu a vakama e na buka, ka buturaka, me vurumemea me matailalai sara, me vaka mada na kuvu ni soso: ia kaʼu a biuta na kena kuvu ki na uciwai sa lako sobu mai na ulu-ni-vanua. (

22Mai Tapera talega, kei Masa, kei Kipiroci-ateeva, kemuni a vakacudrui Jiova.

23Ni sa talai kemuni talega ko Jiova mai Ketesa-parinea, ka kaya, Mo ni lako cake ka taukena na vanua kaʼu sa solia vei kemuni; kemuni a talaidredre ga ki na vunau i Jiova na nomuni Kalou, ka tawa vakabauti koya, se vakarorogo ki na domona.

24Mai na siga kaʼu a kilai kemuni kina, kemuni sa talaidredre ga vei Jiova.)

25Ia kaʼu a bale sobu e na mata i Jiova ka vasagavulu na siga ka vasagavulu na bogi, me vaka kaʼu a bale sobu eliu; e na vuku ni sa kaya ko Jiova ni na vakarusai kemuni.

26Au a masu kina kivei Jiova, ka kaya, I Turaga, Jiova, mo ni kakua mada ni vakarusai ira na nomuni tamata kei na nomuni votavota, ko ira kemuni a Vakabula e na kemuni levu, ko ira kemuni a kauta mai Ijipita e na liga kaukauwa:

27mo ni nanumi iratou na nomuni tamata, ko Eparaama, ko Aisake, kei Jekope; kakua ni raica na nodra yalokaukauwa na tamata o qo, se na nodra caka cala, se na nodrai valavala ca:

28de kainaki e na vanua kemuni a kauti keimami maikina, E na vuku ni sa sega ni vakayacori ira rawa ko Jiova ki na vanua ka yalataka vei ira, e na vuku talega ni sa cati ira, sa kauti ira tani mai ko koya me vakamatei ira e na lekutu.

29Ia era sa nomuni tamata ga kei na nomuni votavota, kemuni a kauta tani mai e na nomuni kaukauwa levu kei na ligamuni sa dodo yani.