Nai Vakarua 6 - AI VOLA TABU（FIJ1864）

Sa vunau tiko ko Mosese, me ra dautalairawa-rawa ki na vunau ni Kalou.

1A SA vakaoqo na vunau, na veilesilesi, kei na lelewa, sa vunautaka ko Jiova na nomuni Kalou me vakavulica vei kemuni, mo ni cakava e na vanua kemuni sa lako yani kina me taukena:

2mo rerevaki Jiova kina na nomu Kalou, me vakabauta na nonai vakaro kecega kei na nona vunau kaʼu sa vunautaka vei iko, ko iko, kei na luvemu, kei na luvena na luvemu, e na veisiga kecega ko sa bula kina; ia me balabalavu kina na nomu bula.

3Ia mo rogoca mada, na Isireli, ka vakabauta mo cakava; me yacovi iko na ka vinaka, ia mo ni tubu me lewe vuqa sara, me vaka sa yalataka vei iko ko Jiova na Kalou ni nomu qase, e na vanua sa dave kina na wai-ni-sucu kei na oni.

4Mo rogoca, na Isireli: O Jiova na noda Kalou sa ko Jiova e dua bau:

5ia mo lomani Jiova na nomu Kalou e na lomamu taucoko, kei na yalomu taucoko, kei na nomu kaukauwa taucoko.

6Ia na vosa o qo, a ya kaʼu sa vunautaka vei iko e na siga o qo, me tikoga e na lomamu:

7ia mo gumatua ni vakavulica vei ira na luvemu, ka dauvosataka ni ko sa tiko e na nomu vale, ni ko sa lako voli talega e na sala, ka ni ko sa laʼki koto, ni ko sa duri cake talega.

8Ia mo vauca mei vakatakilakila e na ligamu, ia me na vaka nai ukuuku e na tadrua ni matamu.

9Mo vola talega e na duru ni katuba ni nomu vale, kei nai sogo ni nomu matamata-ni-koro.

10Ia ni sa vakayacori iko oti ko Jiova na nomu Kalou ki na vanua sa vosavavakini kina ko koya vei iratou na nomu qase, vei Eparaama, vei Aisake, kei Jekope, me solia vei iko, io ki na Veikoro lelevu ka vinaka, ko a tawa tara,

11kei na veivale sa sinai kina na ka vinaka kecega, ko a sega ni vakasinaita, kei na veikeli-wai ko a sega ni kelia, na veivaini kei na veiolive, ko a sega ni tea; ka ni ko sa kana ka mamau;

12mo qarauni iko do ko guilecavi Jiova, ko koya ka kauti iko mai na vanua ko Ijipita, mai na vale ni veivakabobulataki.

13Mo rerevaki Jiova ga na nomu Kalou, ka qaravi koya, ka cavuta na yacana ga e na vavakini.

14Mo ni kakua ni muria na veikalou tani, na nodra veikalou na veimatanitu sa voliti kemudou;

15(ni sa Kalou vuvu ko Jiova na nomu Kalou e na nomuni maliwa) de waqa mai vei iko na cudru i Jiova na nomu Kalou, ka vakawabokotaki iko mai na dela i vuravura.

16Mo ni kakua ni vakatovolei Jiova vakaca na nomuni Kalou, me vaka ko ni a vakatovolea vakaca mai Masa.

17Mo ni vakabauta vakavinaka na vunau i Jiova na nomuni Kalou, kei na nonai vakaro, kei na nona veilesilesi, sa vunautaka vei iko ko koya.

18Ia mo cakava na ka e dodonu ka vinaka e na mata i Jiova: me yacovi iko kina na ka vinaka, ia mo yaco kina mo taukena na vanua vinaka sa vosavavakini kina ko Jiova vei ira na nomu qase,

19me vakaseva tani e matamu na nomu meca kecega, me vaka sa yalataka ko Jiova.

20Ni na sa tarogi iko na luvemu e na gauna maimuri, ka vaka, Sa vakaevei nai vakaro, kei na veilesilesi, kei na lelewa, sa vunautaka vei kemuni ko Jiova na noda Kalou?

21ko na qai kaya vua na luvemu, Eda a bobula vei Fero mai Ijipita; a sa kauti keda tani mai Ijipita ko Jiova e na liga kaukauwa:

22a sa vakayacora ko Jiova e so nai vakatakilakila, kei na cakacaka-mana e levu ka rarawa, ki Ijipita, kivei Fero, kei na nona lewe-ni-vale kece, e na matada:

23a sa kauti keda tani maikina, me vakayacori keda, me solia vei keda na vanua sa vosavavakini kina ko koya vei ira na noda qase.

24A sa vakaroti keda ko Jiova me cakava nai lesilesi kecega o qo, me da rerevaki Jiova na noda Kalou, me yacovi keda tikoga na ka vinaka, ka me vakabulai keda kina, me vaka e na siga o qo.

25Ia na ka o qo eda na dodonu kina, ni da sa vakabauta me cakava na vunau kecega o qo e na mata i Jiova na noda Kalou, me vaka sa vakaroti keda ko koya.