Nai Vakarua 7 - AI VOLA TABU（FIJ1864）

Sa tabu ni ra veiriti kei na veimatanitu tani, de ra vakatevoro kina, 1-5. Ni ra sa tamata tabu me nei Jiova, 6-8. A Kalou yalololoma ka dodonu ko Jiova, 9-11. Era na kalougata ka gumatua vei ira na nodra meca, kevaka era sa talairawarawa, 12-26.

1NI sa vakayacori iko ko Jiova na nomu Kalou ki na vanua ko sa lako kina me taukena, a sa vakaseva tani e matamu na matanitu e vuqa, na luve i Eci, kei na Kerekesa, kei na luve i Amori, kei na kai Kenani, kei na lewe ni Veikoro lalai, kei na luve i Evi, kei na kai Jepusa, na matanitu e vitu sa levu ka kaukauwa, ka lailai ka malumalumu ko iko;

2a sa soli ira e matamu ko Jiova na nomu Kalou, ka ko sa mokuti ira; mo qai vakawabokotaki ira sara; mo kakua ni ia vei ira na veiyalayalati, se lomani ira:

3mo kakua talega ni veiwatini kei ira; mo na kakua ni musuka na luvemu alewa ki na luvena tagane, se kauta na luvena alewa me nona na luvemu tagane.

4Ni ra na vagolea tani na luvemu me kakua ni muri au, ka me qarava e so na kalou tani: ena qai waqa mai na cudru i Jiova vei kemuni, ka vakawabokotaki iko vakasauri.

5Ia mo ni kitaki ira vakaoqo; mo ni vakacacana na nodra veicabocabo-ni-soro, ka musumusuka na nodra veimatakau, ka taya sobu na nodra veikaloualewa ni veikau, ka vakama e na buka na nodra veimatakau ceuceu.

6Ni kemuni sa matanitu tabu me nei Jiova na nomuni Kalou: sa digitaki kemuni ko Jiova na nomuni Kalou mo ni sa nona matanitu talei, vei ira kecega na veimatanitu e dela i vuravura.

7Sa sega ni lomani kemuni ko Jiova, ka digitaki kemuni, e na vuku ni kemuni sa lewe vuqa, ka lewe lailai na veimatanitu tani; ni kemuni a lewe lailai vei ira na matanitu kece:

8e na vuku ga ni sa lomani kemuni ko Jiova, ka sa vakabauta tiko na vosa vavakini sa vosavavakini kina ko koya vei ira na nomuni qase, sa kauti kemuni tani kina ko Jiova e na liga kaukauwa, ka sa vakabulai kemuni mai na vale ni veivakabobulataki, io mai na liga i Fero na tui Ijipita.

9Mo kila mada ni sa Kalou ko Jiova na nomu Kalou, na Kalou dina, sa vakabauta tiko na veiyalayalati, kei na loloma, vei ira sa lomani koya ka kitaka na nona vunau, ka yacova nai tabatamata e udolu;

10a sa sauma votu vei ira sa cati koya, ni sa vakarusai ira: ena tawa caka bera vua sa cati koya, ena sauma votu.

11Ia ko na vakabauta kina na vunau, kei na veilesilesi, kei na lelewa, kaʼu sa vunautaka vei iko edaidai, mo cakava.

12Ia ena yaco, kevaka kemuni sa vakarorogo ki na lelewa o qo, ka vakabauta, ka cakava, ena qai vakabauta vei iko ko Jiova na nomu Kalou na veiyalayalati, kei na loloma, sa vosavavakini kina vei ira na nomu qase:

13ia ena lomani iko, ka vakalougatataki iko, ka vakalevutaki iko: ena vakalougatataka talega na vua ni ketemu, kei na vua ni nomu vanua, na nomu sila, kei na nomu waini, kei na nomu waiwai, na nomu luve ni karavau, kei na nomu qele ni sipi, e na vanua sa vosavavakini kina vei ira na nomu qase me solia vei iko.

14Ko na kalougata vakalevu, ka vakalailai na matanitu kecega: sa na sega na tagane se alewa sa tawa vakaluveni vei kemuni, se vei ira na nomuni manumanu e yavai va.

15Ia ena kauta tani vei iko ko Jiova na mate kecega, ka sega ni cakava me tauvi iko e dua na mate ca ko a kila mai Ijipita; ia ena cakava me tauvi ira kecega era sa cati iko.

16Ia ko na sa vakaoti ira kecega na veimatanitu sa solia vei iko ko Jiova na nomu Kalou; me na kakua ni lomani ira na matamu: ia mo kakua ni qarava na nodra veikalou; ni nai cori vei iko.

17Kevaka ko na kaya e lomamu, Sa levu cake vei au na veimatanitu o qo; au na vakasevi ira tani rawa vakaevei?

18Mo kakua ni rerevaki ira: mo nanuma vinaka ga na ka sa cakava ko Jiova na nomu Kalou kivei Fero, kei Ijipita kecega;

19na veivakatovolei levu sa kunea na matamu, kei na vei vakatakilakila, kei na veika-mana, kei na liga kaukauwa, kei na liga sa dodo yani, sa kauti iko tani kina ko Jiova na nomu Kalou: ena kitaka vakakina ko Jiova na nomu Kalou vei ira na matanitu kecega ko sa rerevaka.

20Ia ena vakatala talega ko Jiova na nomu Kalou e dua na ka rerevaki vei ira, ka me ra oti mada e matamu ko ira era sa vo ka vunitaki.

21Mo kakua ni domobula vei ira: ni sa tiko kei kemuni ko Jiova na nomu Kalou, na Kalou levu ka rerevaki.

22Ia ena vakasevi ira vakalalai tiko e matamu na veimatanitu o qori ko Jiova na nomu Kalou: mo na kakua ni vakaoti ira rawa vakasauri, de gumatua vei iko ni sa lewe vuqa na manumanu ni vanua.

23Ia ena soli ira ga vei iko ko Jiova na nomu Kalou, ka vakarusai ira e na veivakarusai levu, ka me ra oti mada.

24Ia ena soli ira na nodra tui ki na ligamu, ia ko na bokoca na yacadra mai na ruku ni lomalagi: sa na sega na tamata me tu rawa e matamu, ko na vakaoti ira mada ga.

25A veimatakau ceuceu ni nodra veikalou dou na vakama e na buka: mo kakua ni kocova na siliva se na koula era sa botani kina, se kauta vei iko, do ko sa coriti kina: ni sa ka vakasisila o qori vei Jiova na nomu Kalou.

26Ia mo kakua ni kauta ki na nomu vale na ka vakasisila, do ko yaco me ka sa lesi me vakarusai me vaka na ka ko ya: mo cata dina sara ga, ka vakasisilataka sara; ni sa ka sa lesi me vakarusai.