Nai Vakarua 5 - AI VOLA TABU（FIJ1864）

Sa tukuni tale na vunau e tini, 1-22. Sa masuti Mosese ko ira na tamata me rogoci Jiova ko koya, ka tukuna vei ira na nona vosa, 23-33.

1A SA kacivi ira kecega na Isireli ko Mosese, a sa kaya vei ira,

Mo rogoca, na Isireli, na veilesilesi kei na lelewa kaʼu sa tukuna ki na daligamuni e na siga o qo, mo dou vulica, ka taura tiko, ka cakava.

2Sa kitaka kei keda ko Jiova na noda Kalou e dua na veiyalayalati mai Orepi.

3Sa sega ni kitaka na veiyalayalati o qo ko Jiova vei ira na noda qase, vei keda ga, vei keda eda sa bula kecega eke e na siga o qo.

4Kemuni sa veiraici mata kei Jiova ni sa vosa vei kemuni ko koya mai na ulu-ni-vanua, mai loma ni buka waqa;

5ni kaʼu a tu e na kemuni maliwa kei Jiova e na siga ko ya, me tukuna vei kemuni na vosa i Jiova: ni dou a rere e na vuku ni buka waqa, ka tawa cabeta na ulu-ni-vanua; a sa kaya ko koya,

6Sa ko Jiova na nomu Kalou koi au, o koya sa kauti iko mai na vanua ko Ijipita, mai na vale ni veivakabobulataki.

7Me kakua vei iko na Kalou tani, oi au duaduaga.

8Mo kakua ni cakava vei iko e dua na matakau ceuceu; e dua nai vakatakarakara ni ka mai lomalagi ecake, se mai vuravura era, se mai na wai e ruku i vuravura:

9mo kakua ni cuva vei ira, se qaravi ira: niʼu sa Kalou vuvu, koi au ko Jiova na nomu Kalou, au sa cudruvaka na nodra caka ca na qase vei ira na luvedra, ka yacova nai katolu ni tabatamata kei na kenai kava, vei ira era sa cati au;

10ia kaʼu sa vakatakila na loloma vei ira nai tabatamata e udolu, vei ira sa lomani au, ka kitaka na noqu vunau.

11Mo kakua ni cavuta walega na yaca i Jiova na nomu Kalou; ni na sega ni vakadonui koya ko Jiova sa cavuta wale na yacana.

12Mo vakabauta na siga ni vakacecegu, me vakatabuya, me vaka ka vunautaka vei iko ko Jiova na nomu Kalou.

13E ono na siga mo daucakacaka kina, ka kitaka kina na nomu cakacaka kecega;

14ia nai kavitu ni siga sa siga ni vakacecegu i Jiova na nomu Kalou; o kakua ni kitaka kina e dua na cakacaka, o iko, se na luvemu tagane se na luvemu alewa, se na nomu tamata, se na nomu vada, se na nomu karavau, se na nomu asa, se dua na nomu manumanu, se na nomu vulagi sa tiko e na nomu lomanibai: me vakacegu kina vakai iko na nomu tamata kei na nomu vada.

15Ia mo nanuma ni ko a bobula mai na vanua ko Ijipita, a sa kauti iko tani maikina ko Jiova na nomu Kalou e na liga kaukauwa, kei na liga sa dodo yani: o koya sa vakaroti iko kina ko Jiova na nomu Kalou mo vakabauta na siga ni vakacecegu.

16Mo vakarokoroko vei rau na tamamu kei na tinamu, me vaka sa vakaroti iko ko Jiova na nomu Kalou; me balabalavu kina na nomu bula, ia me yacovi iko kina na ka vinaka, e na vanua sa solia vei iko ko Jiova na nomu Kalou.

17Mo kakua ni laba.

18Mo kakua talega ni ia na veibutakoci.

19Mo kakua talega ni butako.

20Mo kakua talega ni beitaka vakailasu na kai nomu.

21Mo kakua talega ni kocova na watina na kai nomu; o kakua talega ni kocova na nona vale na kai nomu, na nona were, se nona tamata, se nona vada, na nona karavau, se nona asa, se dua na ka sa nona na kai nomu.

22A vosa o qo sa cavuta ko Jiova vei kemuni kecega sa soqoni vata mai na ulu-ni-vanua, mai loma ni buka waqa, mai na o, kei na butobuto vavaku, e na domo levu: a sa sega ni kuria. A sa vola e na vatu raraba e rua, ka solia mai vei au.

23Ia ni dou sa rogoca na domo mai na loma ni butobuto, (ni sa waqa tu na ulu-ni-vanua e na buka,) dou a qai toro mai vei au, io na turaga kecega ni nomudou veiyavusa, kei ira na nomuni qase;

24ia dou a kaya, Raica, sa vakatakila vei keda ko Jiova na noda Kalou na kenai ukuuku kei na kena levu, ia eda sa rogoca na domona mai loma ni buka waqa: keimami sa raica edaidai ni sa vosa na Kalou ki na tamata, a sa bula ga ko koya.

25Ia o qo, a cava me keimami mate kina? ni na kani keimami na buka waqa levu o qo: kevaka keimami sa rogoca tale na domo i Jiova na noda Kalou, keimami na qai mate.

26Ni ko cei vei ira na tamata kecega sa rogoca vakai keda na domo ni Kalou bula, ni sa vosa mai loma ni buka waqa, a sa bula ga?

27Mo torova yani, ka rogoca kecega na ka ena kaya ko Jiova na noda Kalou: ia mo tukuna vei keimami na ka kecega sa kaya vei iko ko Jiova na noda Kalou; ia keimami na rogoca, ka cakava.

28A sa rogoca na domo ni nomuni vosa ko Jiova, ni dou a vosa vei au; a sa kaya vei au ko Jiova, Au sa rogoca na domo ni nodra vosa na tamata o qo, era sa vosataka vei iko: sa dodonu na ka kecega era sa vosa kina.

29Me yaco mada vei ira na yalo vakaoqo, me ra rerevaki au, ka vakabauta tikoga na noqu vunau kecega, me yaco kina vei ira na ka vinaka, kei na nodra kawa talega ka tawa mudu!

30Mo laʼki kaya vei ira, Mo ni suka ki na nomuni veivale.

31Ia ko iko, mo tu mada eke me voleka vei au, meʼu cavuta vei iko na vunau kecega, kei na veilesilesi, kei na lelewa, mo vakavulica vei ira, me ra cakava e na vanua kaʼu sa solia vei ira me ra taukena.

32Mo ni vakabauta kina, mo ni cakava me vaka na vunau i Jiova na nomuni Kalou vei kemudou: mo ni kakua ni suka ki nai matau se nai mawi.

33Mo ni lako e na sala kecega sa vakarota vei kemuni ko Jiova na nomuni Kalou, mo ni bula kina, me yacovi kemuni na ka vinaka, me balavu kina na nomuni bula e na vanua kemuni na taukena.