Na Tiko Voli Mai Na Lekutu 35 - AI VOLA TABU（FIJ1864）

A nodra Veikoro na luve i Levi, 1-8. Na veikoro i drodro, kei na kedra vanua, 9-29. Me kakua ni bula na tamata sa laba, 30-34.

1A SA vosa vei Mosese ko Jiova mai na cecelevu ni Moapi, sa voleka ki na Joritani, ka donui Jeriko, ka kaya,

2Mo vakaroti ira na luve i Isireli, me ra solia, mai na nodrai votavota, e so na koro vei ira na luve i Levi me ra tiko kina; ia dou solia talega vei ira na luve i Levi na vanua sa volita nai bili ni Veikoro.

3Ia na Veikoro ena nodra me tiko kina; ia na vanua e na kedrai bili ena yasana ki na nodra karavau, kei na nodra yau, kei na nodra manumanu e yavai va kecega.

4Ia na vanua e nai bili ni Veikoro, a ya dou sa solia vei ira na luve i Levi, me vakatekivu mai na bai ni koro ka lako yani, me rua na drau ka limasagavulu na katu e na veiyasana.

5Ia dou na vakarauta mai nai bili ni koro e lima na drau na katu mai na yasana kivaka ki cake, ka lima na drau na katu mai na yasana ki na ceva, ka lima na drau na katu mai na yasana ki ra, ka lima na drau na katu mai na yasana kivaka ki na tokalau; ia me tiko eloma na koro. Sa na vakaoqo na nodra vanua e nai bili ni Veikoro.

6Ia e na veikoro dou na solia vei ira na luve i Levi me ono na koro i drodro, a ya dou na lesia, me dro kina ko koya sa ravuravu: ia dou kuria kina na koro e vasagavulu ka rua.

7A koro kecega dou na solia vei ira na luve i Levi ena vasagavulu ka walu na koro, vata kei na vanua e nodrai bili.

8Ia na Veikoro dou na solia mai na nodrai votavota na luve i Isireli: maivei ira sa vuqa na nodra, me vuqa; ia maivei ira sa lailai na nodra, me lailai: me solia ko ira yadua e so na nona koro vei ira na luve i Levi, me vaka na nona vanua sa taukena ko koya.

9A sa vosa vei Mosese ko Jiova, ka kaya,

10Mo vosa vei ira na luve i Isireli, ka kaya vei ira, Ni dou sa yaco ki tai kadua ni Joritani, ki na vanua ko Kenani;

11dou qai lesia vei kemudou e so na koro me Veikoro mo dou dro kina; me dro kina ko koya sa ravuravu, a ya sa mokuta-mate e dua ni sa tawa nakita.

12Ia era na Veikoro mo dou dro kina mai vua sa nonai tavi me sauma na ka sa caka: me kakua kina ni mate ko koya sa ravuravu, ka me tu mada e na mata ni lewe ni vavakoso me lewai.

13Ia me ono na koro me nomudoui drodro, mai na Veikoro dou sa solia.

14E tolu na koro mo dou solia e na tai o qo ni Joritani, ka tolu na koro mo dou solia mai na vanua ko Kenani, me veikoro mei drodro.

15Mei drodro na koro e ono o qo, vei ira na luve i Isireli, kei na kai tani, kei koya sa tiko vulagi kei ira: me dro kina na tamata kecega sa mokuta-mate e dua ni sa tawa nakita.

16Ia kevaka sa mokuti koya e na ka kaukamea, a sa mate kina, sa laba ko koya: ena vakamatei vakaidina ko koya sa laba.

17Ia kevaka sa virilauti koya e na vatu, e mate rawa kina, a sa mate kina, sa laba ko koya: ena vakamatei vakaidina ko koya sa laba.

18Se sa mokuti koya e nai wau, e mate rawa kina, a sa mate kina, sa laba ko koya; ena vakamatei vakaidina ko koya sa laba.

19Me vakamatei koya sa laba ko koya sa nonai tavi me sauma na dra: me vakamatei koya ni sa sota kaya.

20Ia kevaka sa tuetueraki koya ni sa cata, se virika ni sa lawakitaka, a sa mate kina;

21se sa yaviti koya e na ligana ni sa yalo ca vua, a sa mate kina: ena vakamatei vakaidina ko koya ka yavita; sa laba ko koya: me vakamatei koya sa laba ko koya sa nonai tavi me sauma na dra, ni sa sota kaya.

22Ia kevaka sa tuetueraki koya vakasauri ni sa sega ni yalo ca vua, se sa biuta na ka me lutuki koya ni sa sega ni lawakitaka,

23se dua na vatu, e mate rawa kina, ka sa sega ni raica, ka sa biuta me lutuki koya, a sa mate kina, ia ka sa sega ni nona meca, ka sa sega ni qara na ka me ca kina ko koya:

24me ra qai lewa nai vavakoso vei koya sa ravuravu kei koya sa nonai tavi me sauma na dra, me vaka na lelewa o qo:

25ia ko ira nai vavakoso, me ra vakabulai koya sa ravuravu mai na ligana sa nonai tavi me sauma na dra, ka vakasukai koya ko ira nai vavakoso ki na koro sa nonai drodro ka dro kina ko koya: ia me na tikoga kina ko koya, me yaco mada na mate ni bete levu, o koya sa lumuti e na waiwai tabu.

26Ia kevaka sa lako ko koya sa ravuravu, ka yawasivita nai bili ni koro sa nonai drodro sa dro kina ko koya,

27a sa kunei koya ko koya sa nonai tavi me sauma na dra ni sa yawasivita nai bili ni koro sa nonai drodro, a sa vakamatei koya sa ravuravu ko koya sa nonai tavi me sauma na dra; ena sega ni tarogi na nona dra:

28ni sa dodonu me tikoga e na koro sa nonai drodro me yaco mada na mate ni bete levu: ia ni sa mate na bete levu, me na qai lesu ko koya sa ravuravu ki na nona vanua sai taukei kina.

29Ia na ka o qo ena kemudou vunau mo dou lewa vakakina e na nomudou veitabatamata e na nomudoui tikotiko kecega.

30O koya yadua sa vakamatea na tamata, me vakamatei ko koya sa laba ni sa tukuni koya ko iratou sa raica: ia me kakua ga ni mate na tamata e dua, ni sa tukuni koya e lewe dua ga sa raica.

31Ia dou na kakua ni vakadonuya e dua nai bulubulu me bula ko koya sa laba, ni sa dodonu me mate: ia ena vakamatei vakaidina ga.

32Ia dou kakua ni vakadonuya e dua nai bulubulu e na vukuna sa dro ki na koro sa nonai drodro, me lako tale ko koya me tiko e na vanua, ka me mate mada ga na bete.

33Ia mo dou kakua ni vakadukadukalitaka na vanua dou sa tiko kina: ni sa vakadukadukalitaka na vanua na laba: a sa sega ni sorovaki rawa na vanua e na vuku ni dra sa dave kina, a ya ga e na kena dra ka vakadavea.

34Ia mo dou kakua ni vakadukadukalitaka na vanua dou sa tiko kina, kaʼu sa tiko eloma kina koi au: niʼu a tiko koi au ko Jiova e na kedra maliwa na luve i Isireli.