Na Tiko Voli Mai Na Lekutu 36 - AI VOLA TABU（FIJ1864）

A vunau e na vuku ni nodrai votavota na gonealewa, ni sa sega na ganedra.

1IA ko ira era turaga qase e na nodra mataqali na luve i Kiliati na luve i Mekiri, na luve i Manase, e na nodra veimataqali na luve i Josefa, era toro mai, ka vosa e na mata i Mosese, kei na matadra na turaga, na turaga qase vei ira na luve i Isireli:

2a ra sa kaya, Sa vakarota ko Jiova vei iko na turaga mo solia na vanua, e nai vola ni veidigidigi, me ra taukena na luve i Isireli: a sa vakarota ko Jiova vei iko na turaga mo solia nai votavota i Silofati na weka i keimami kivei iratou na luvena alewa.

3Ia kevaka eratou na vakawati kei na tagane e na yavusa tani vei ira na luve i Isireli, ena qai kauti na nodratoui votavota mai nai votavota ni neimami qase, ka kau ki nai votavota ni yavusa eratou vakawati kina: ia ena kauti tani mai nai votavota keimami sa taukena.

4Ia ni na yaco na nodra jupeli na luve i Isireli, ena qai kau na nodratoui votavota ki nai votavota ni yavusa eratou vakawati kaya: ia ena kauti tani na nodratoui votavota mai nai votavota ni yavusa ni neimami qase.

5A sa vakaroti ira na luve i Isireli ko Mosese me vaka na vosa i Jiova, ka kaya, Sa dodonu na vosa ni nodra yavusa na luve i Josefa.

6O qo na ka sa vakarota ko Jiova e na vukudratou na gonealewa i Silofati, ka vaka, Me ratou vakawati kaya ga na tamata eratou vinakata: ia ki na mataqali ga e na yavusa ni nodratou qase me ratou na vakawati kina:

7me na sega kina ni veikauyaki na nodrai votavota na luve i Isireli mai na yavusa e dua ki na yavusa e dua: ia me na tikotiko ga yadua vei ira na luve i Isireli e nai votavota ni yavusa ni nona qase.

8Ia na alewa yadua, sai taukei ni dua nai votavota e na dua na nodra yavusa na luve i Isireli, me watina e dua e na mataqali ni yavusa ni nona qase, me na taukena na tamata yadua vei ira na luve i Isireli nai votavota ni nona qase.

9Ia me kakua ni veikauyaki mai na yavusa e dua ki na yavusa e dua; ia me tikotiko yadua na nodra veiyavusa na luve i Isireli e na nonai votavota.

10Eratou sa kitaka na gonealewa i Silofati me vaka ka vakaroti Mosese ko Jiova:

11ni ratou sa vakawati kei iratou na luve ni tamadra lalai, ko Mala, ko Tirisa, kei Okila, kei Milika, kei Noa, na luvena alewa ko Silofati:

12eratou sa vakawati e na nodra veimataqali na luve i Manase na luve i Josefa, a sa toka ga na nodratoui votavota e na yavusa ni mataqali ni nodratou qase.

13O QO na vunau kei na lelewa, sa vunautaka ko Jiova vei irana luve i Isireli e na gusu i Mosese, mai na cecelevu ni Moapi, sa voleka ki na Joritani, ka donui Jeriko.