Na Tiko Voli Mai Na Lekutu 34 - AI VOLA TABU（FIJ1864）

Sa tukuni na veiyalayala ni vanua, 1-15. A yacadratou na tamata sa lesi mo vota na vanua, 16-29.

1A SA vosa vei Mosese ko Jiova, ka kaya,

2Mo vakaroti ira na luve i Isireli, ka kaya vei ira, Ni dou na yaco ki na vanua ko Kenani: (o qori na vanua sa lutu vei kemudou mo dou taukena, io na vanua ko Kenani me vaka na kena veiyalayala:)

3Ena qai vakatekivu mai na lekutu ko Sini na nomudoui yalayala kivaka ki na ceva, ka lako voli ki nai yalayala ni Itomi, ia na nomudoui yalayala mai na ceva enai yalayala sara ni wasa tuituina mai cake:

4ia ena lesu na nomudoui yalayala mai na ceva ka lako ki nai cabecabe ki Akirapimi, ka lako yani ki Sini: ia ena lako yani tiko ki na ceva ki Ketesa-parinea, ka lako yani ki na koro ko Atari, ka lako tikani ki Asimoni:

5ia na kenai yalayala ena lako voli mai Asimoni ki na uciwai ni Ijipita, ia na kenai otioti na wasawasa.

6Ia nai yalayala mai ra, ena nomudoui yalayala na wasa levu: o qori na nomudoui yalayala ki ra.

7A sa vakaoqo na nomudoui yalayala ki na tokalau; mai na wasa levu dou na vakatakilakilataka vaka ki na ulu-ni-vanua ko Ori:

8ia mai na ulu-ni-vanua ko Ori dou na vakatakilakilataka vaka ki nai curucuru ki Emaci; ia ena lako yani nai yalayala ka yacovi Sitati:

9ia me lako yani nai yalayala ki Sifironi, ia ena lako yani ka yala ki na koro ko Enani: sa vakaoqo na nomudoui yalayala ki na tokalau.

10Ia dou na vakatakilakilataka na nomudoui yalayala mai cake mai na koro ko Enani ki Sifami:

11ia me na lako sobu nai yalayala mai Sifami ki Ripila, mai na yasana ki cake mai Ayini; me qai lako sobu nai yalayala, ka yaco ki na baravi ni Wasawasa ko Kinereci kivaka ki cake:

12ia me lako sobu nai yalayala ki na Joritani, ia na kenai otioti na wasa tuituina.

Sa vakaoqo na nomudou vanua kei na kena veiyalayala sa vakavolivolita.

13A sa vakaroti ira na luve i Isireli ko Mosese, ka kaya, O qo na vanua dou na veivota e nai vola ni veidigidigi, ko ya ka vakarota ko Jiova me soli ki na yavusa e ciwa ka dua na wase ni yavusa e dua:

14ni sa votai oti na nodra yavusa na luve i Rupeni, e na mataqali ni nodra qase, kei na nodra yavusa na luve i Kata, e na mataqali ni nodra qase; ka dua na wase ni yavusa i Manase, era sa rawata na nodrai votavota:

15na mataqali e rua ka dua na wase ni yavusa e dua, era sa rawata na nodrai votavota e na tai mai o qo ni Joritani, sa donui Jeriko sa vaka ki cake, sa qarava nai cadracadra ni siga.

16A sa vosa vei Mosese ko Jiova, ka kaya,

17O qo na yacadratou na tamata eratou na vota na vanua vei kemudou: ko Eliasari na bete, kei Josua na luve i Nuni:

18ia dou kauta na turaga e dua mai na yavusa yadua, me vota na vanua:

19ia o qo na yacadratou na tamata: Mai na yavusa i Juta, ko Kalepi na luve i Yifune.

20Ia mai na nodra yavusa na luve i Simioni, ko Simueli na luve i Amiuti.

21Mai na yavusa i Penijamini, ko Ilitati na luve i Kisiloni.

22Ia na turaga ni nodra yavusa na luve i Tani, ko Puki, na luve i Yokili.

23A nodra turaga na luve i Josefa, mai na nodra yavusa na luve i Manase, ko Anieli na luve i Efoti.

24Ia na turaga ni nodra yavusa na luve i Ifireimi, ko Kimueli na luve i Sifitani.

25Ia na turaga ni nodra yavusa na luve i Sepuloni, ko Elisafani na luve i Parinaki.

26Ia na turaga ni nodra yavusa na luve i Isakari, ko Palitieli na luve i Asana.

27Ia na turaga ni nodra yavusa na luve i Aseri, ko Eiiuti na luve i Silomi.

28Ia na turaga ni nodra yavusa na luve i Nafitali, ko Pitaeli na luve i Amiuti.

29O iratou o qo ka vakarota ko Jiova me ia na veivota ni vanua ko Kenani vei ira na luve i Isireli.