1IA ko ira na luve i Rupeni kei na luve i Kata, sa ka levu sara na nodra manumanu e yavai va: a ra sa raica na vanua ko Yaseri, kei na vanua ko Kiliati, ka, raica, sa vanua ki na manumanu e yavai va na vanua ko ya;
2ia era sa lako mai na luve i Kata kei na luve i Rupeni, ka vosa vei Mosese kei Eliasari na bete, kei ira na turaga ni vavakoso, ka kaya,
3O Ataroci, kei Tiponi, kei Yaseri, kei Nimira, kei Esiponi, kei Elale, kei Sipami, kei Nipo, kei Pioni,
4io na vanua ka vakamalumalumutaka ko Jiova e na mata ni vavakoso ni Isireli, sa vanua ki na manumanu e yavai va, ka sa vakamanumanu koi keimami a nomu tamata:
5era sa kaya talega, Kevaka kemuni sa lomani keimami, me soli mada na vanua o qo vei ira na nomuni tamata mei votavota; mo ni kakua ni kauti keimami ki na tai kadua ni Joritani.
6A sa kaya ko Mosese vei ira na luve i Kata kei na luve i Rupeni, Me ra lako li ki nai valu na wekamudou, ka tikoga eke koi kemudou?
7Ia a cava dou sa vakayalolailaitaki ira kina na luve i Isireli me ra kakua kina ni lako yani ki na vanua sa solia vei ira ko Jiova?
8Eratou a kitaka vakaoqo na nomudou qase, niʼu a talai iratou mai Ketesa-parinea me raica na vanua.
9Ia ni ratou a lako cake ki na buca ko Esikoli, ka raica na vanua, eratou sa qai vakayalolailaitaki ira na luve i Isireli, me ra kakua ni lako ki na vanua sa solia vei ira ko Jiova.
10A sa waqa na cudru i Jiova e na gauna ko ya, a sa vavakini ko koya, ka kaya,
11O ira na tamata sa lako cake mai Ijipita, sa ruasagavulu na nodra yabaki ka levu cake, era na sega sara ni raica na vanua kaʼu a vosavavakini kina vei Eparaama, vei Aisake, kei Jekope; e na vuku ni ra sa sega ni muri au tikoga:
12ia koi rau ga ko Kalepi na luve i Yifune na kai Kenisai, kei Josua na luve i Nuni: ni rau sa muri Jiova tikoga.
13A sa waqa mai na cudru i Jiova vei ira na Isireli, a sa cakavi ira me ra veilakoyaki e na lekutu ka vasagavulu na yabaki, ka me oti mada kece nai tabatamata ko ya ka caka ca e na mata i Jiova.
14Ka, raica, dou sa tubu cake me nodrai sosomi na nomudou qase, na kawa ni tamata ca, me vakalevutaka tiko na cudru katakata i Jiova kivei ira na Isireli.
15Kevaka kemuni sa vuki tani mo ni kakua ni muri koya, ena laivi ira tale ko koya e na lekutu; dou na vakawabokotaka ira kece talega na tamata o qo.
16A ra sa toro vua, ka kaya, Keimami na tara eke e so na bai ni sipi ki na neimami manumanu e yavai va, ka so na koro ki na neimami lalai:
17ia koi keimami, keimami na vakaiyaragi lako, ka liutaki ira na luve i Isireli, ka me keimami kauti ira mada ki na nodra yasana: a ra na tikoga na neimami lalai e na veikoro sa vakabai, e na vuku ni lewe ni vanua o qo.
18Keimami na tawa lesu ki na neimami veivale, ka me ra taukena mada na luve i Isireli na tamata yadua na nonai votavota.
19Ni keimami na sega ni taukei vata kei ira, mai tai kadua ni Joritani, se kiliu, ni sa lutu vei keimami na neimami votavota e na tai mai o qo ni Joritani vaka ki na vanua ki cake.
20A sa kaya vei ira ko Mosese, Kevaka kemuni na kitaka na ka o qo, kevaka kemuni na lako vakaiyaragi e na mata i Jiova ki nai valu,
21ka lako kecega ki tai kadua ni Joritani e na mata i Jiova, ni dou sa vakaiyaragi, ka me vakaseva tani mada ko koya na nona meca e matana,
22a sa vakamalumalumutaki na vanua e na mata i Jiova: kemuni na qai lesu, ia dou na tawa cala vei Jiova, kei ira na Isireli; ia ena nomudoui votavota na vanua o qo e na mata i Jiova.
23Ia kevaka dou na sega ni kitaka vakakina, raica, dou sa valavala ca vei Jiova: ia dou kila ni na kunei kemudou na nomudoui valavala ca.
24Dou tara e so na koro ki na nomudou lalai, ka so na bai ki na nomudou sipi; ka kitaka na ka sa lako oti mai na gusumudou.
25A ra sa vosa vei Mosese na luve i Kata kei na luve i Rupeni, ka kaya, Ena cakava ga koi keimami na nomu tamata me vaka ko ni sa kaya na turaga.
26O ira na neimami lalai, na wati i keimami, na neimami sipi, kei na neimami manumanu e yavai va kecega, era na tiko mai na Veikoro mai Kiliati:
27ia ena lako ki tai kadua e na mata i Jiova koi keimami na nomu tamata, ka sa vakaiyaragi na tamata yadua ki nai valu, me vaka ko ni sa kaya na turaga.
28Ia sa vakarota e na vukudra ko Mosese vei Eliasari na bete, kei Josua na luve i Nuni, kei ira sa turaga qase vei ira na nodra veiyavusa na luve i Isireli:
29a sa kaya vei ira ko Mosese, Kevaka era na lako vata kei kemudou ki tai kadua ni Joritani ko ira na luve i Kata kei na luve i Rupeni, ka ra vakaiyaragi ki nai valu na tamata kecega, e na mata i Jiova, a sa vakamalumalumutaki vei kemudou na vanua; dou na qai solia vei ira na vanua ko Kiliati mei votavota:
30ia kevaka era na sega ni lako ki tai kadua vata kei kemudou, ka vakaiyaragi, me ra qai votai kei kemudou mai na vanua ko Kenani.
31A ra sa vosa na luve i Kata kei na luve i Rupeni, ka kaya, Me vaka na ka sa kaya ko Jiova vei keimami na nomu tamata, keimami na kitaka vakakina:
32keimami na lako ki tai kadua, ka vakaiyaragi, e na mata i Jiova, ki na vanua ko Kenani, me neimami kina na vanua keimami nai taukei kina e na tai mai o qo ki Joritani.
33A sa solia ko Mosese vei ira, io vei ira na luve i Kata, kei ira na luve i Rupeni, kei na dua na wase ni yavusa i Manase na luve i Josefa, na matanitu i Sioni na tui ni luve i Amori, kei na matanitu i Oki na tui Pasani, na vanua, kei na kena veikoro e na kena baravi, io na veikoro ni vanua taucoko.
34Ia na luve i Kata era tarai Tiponi, kei Ataroci, kei Aroeri,
35kei Atiroci, ko Sofani, kei Yaseri, kei Yokipa,
36kei Peci-nimira, kei Peci-arani, sa Veikoro e vakabai: e so talega na bai ni sipi.
37Ia na luve i Rupeni era tarai Esiponi, kei Elale, kei Kiriaceimi,
38kei Nipo, kei Peali-mioni (sa dua tani mai na yacadra), kei Sipima; ka ra vakayacana na veikoro era tara.
39A ra sa lako ki Kiliati ko ira na luve i Mekiri na luve i Manase, ka kabata, ka vakasevi ira tani na luve i Amori era tiko kina.
40A sa soli Kiliati ko Mosese kivei Mekiri na luve i Manase; a sa tiko kina ko koya.
41A sa lako ko Yairi na luve i Manase, ka kabata na kena veikoro lalai, ka vakatoka, Na Veikoro i Yairi.
42A sa lako ko Nopa ka kabai Kinaci, kei na kena Veikoro lalai, ka vakatoka ko Nopa, me nona yaca.
Who We AreWhat We EelieveWhat We Do
2025 by iamachristian.org,Inc All rights reserved.
