1A SA vosa vei Mosese ko Jiova, ka kaya,
2Mo saumi ira na luve i Isireli vei ira na kai Mitiani: sa oti, ko na qai soqoni vei ira na kai nomu.
3A sa vosa vei ira na tamata ko Mosese, ka kaya, Me so vei kemuni me vakaiyaragi ki nai valu, me ra laʼki veivala kei ira na kai Mitiani, ka saumi Jiova vei ira na kai Mitiani:
4me yaudolu mai na yavusa yadua, e na yavusa kecega ni Isireli, mo dou tala ki nai valu.
5A sa tinikarua na udolu sa vakaiyaragi ki nai valu, sa tawase maivei ira na veiudolu ni Isireli, sa yaudolu mai na yavusa yadua.
6A sa talai ira ki nai valu ko Mosese, sa yaudolu e na yavusa, ko ira vata kei Finiasi na luve i Eliasari na bete, ki nai valu, vata kei nai yaya tabu, kei na davui e na ligana me uvuca.
7A ra ia nai valu vei ira na kai Mitiani, me vaka na vosa i Jiova vei Mosese; a ra sa vakamatei ira kecega na tagane.
8Ia ko iratou talega na tui ni Mitiani, eratou sa moku vata kei ira sa moku; io ko Ivi, kei Rekemi, kei Suri, kei Uri, kei Repa, e lima na tui ni Mitiani: o Palami talega na luve i Piori, era sa vakamatea e nai seleiwau.
9Ia era sa vakabobulataki ira na alewa ni Mitiani ko ira na luve i Isireli, kei na nodra lalai, ka ra sa tokitaka na nodra karavau kecega, kei na nodra manumanu kecega, kei na nodra yau kecega.
10A ra sa visa e na buka na nodra veikoro kecega era tiko kina, kei na nodra vale kecega ni valu.
11A ra sa taura na yau kecega, kei na ka kecega efa tokitaka, na tamata kei na manumanu.
12A ra sa kauti ira na bobula, kei na ka era sa tokitaka, kei na yau, kivei Mosese, kei Eliasari na bete, kei nai vavakoso ni luve i Isireli, ki na koro e na cecelevu mai Moapi, sa voleka ki na Joritani, ka donui Jeriko.
13A ra sa lako yani ki nai bili ni koro, me tavaki ira, ko Mosese, kei Eliasari na bete, kei na turaga kecega ni vavakoso.
14A sa cudru ko Mosese vei ira na turaga ni valu, era turaga ni veiudolu, ka turaga ni veidrau, era sa lako mai nai valu:
15a sa kaya vei ira ko Mosese, Dou sa vakabulai ira kecega li na alewa?
16raica, ko ira o qo, e na vosa i Palami, era sa cakavi ira na luve i Isireli me ra valavala ca vei Jiova e na vuku i Piori, a sa dua na mate levu vei ira nai vavakoso i Jiova:
17ia o qo, mo dou vakamatea kecega na tagane maivei ira na lalai, ka vakamatea na alewa kecega era veikilaki kei na tagane ni ra koto kaya:
18ia na gonealewa kecega, sa sega ni veikilaki kei na tagane ni ra koto kaya, dou vakabula vei kemudou.
19Ia dou tikoga e nai bili ni koro, ka bogi vitu: ko ira kecega era sa vakamatea e dua, kei ira kecega sa tara e dua sa moku, dou vakasavasavataki kemudou kei na nomudou bobula, e nai katolu ni siga, kei nai kavitu ni siga:
20ka vakasavasavataka nai sulu kecega, kei na ka kecega sa caka e na kuli ni manumanu, kei na ka kecega sa caka e na vutika ni koti, kei na ka kecega sa caka e na kau.
21A sa kaya ko Eliasari na bete vei ira na tamatai valu era lako ki nai valu, O qo na ka sa lesi e na vunau sa vunautaka ko Jiova vei Mosese:
22A koula ga, kei na siliva, na parasa, na aironi, na tine, kei na uma,
23a ka kecega sa sega ni yavu e na buka waqa, dou biuta ga ki loma ni buka waqa, ena qai savasava: ia me vakasavasavataki ga e na wai sa savai koya sa tawase: ia na ka kecega sa yavu e na buka waqa dou biuta ki loma ni wai.
24Ia mo dou sava na nomudou veisulu e nai kavitu ni siga, dou na qai savasava, ia dou na qai lako mai ki loma ni koro.
25A sa vosa vei Mosese ko Jiova, ka kaya,
26Mo okata na veika e nai toki sa tokitaki, na tamata kei na manumanu, koi kemudou, kei Eliasari na bete, kei ira sa turaga qase vei ira nai vavakoso:
27ia mo wasea rua nai toki; me dua na nodra wase era a bolea nai valu, ka lako ki nai valu, ka dua na nodra wase nai vavakoso kecega:
28ka lesia nai vakacavacava vei Jiova, me nodrai tavi na tamatai valu ka lako ki nai valu: me dua e na lima na drau, mai na tamata, kei na karavau, kei na asa, kei na sipi:
29mo dou taura mai na wase sa nodra, ka solia vei Eliasari na bete, mei madrali e lavelaveti vei Jiova.
30Ia mai na wase sa nodra na luve i Isireli, mo kauta e dua e na limasagavulu, mai na tamata, mai na karavau, mai na asa, kei na sipi, mai na mataqali manumanu kecega, ka solia vei ira na luve i Levi, era sa qarava na cakacaka ni vale-tikotiko i Jiova.
31A rau sa kitaka ko Mosese kei Eliasari na bete, me vaka ka vakaroti Mosese ko Jiova.
32Ia na yau sai vo ni toki ka ra tokitaka na tamatai valu, sa onosagavulu ka vitu na oba ka lima na udolu na sipi,
33ka vitu na oba ka rua na udolu na karavau,
34ka ono na oba ka dua na udolu na asa,
35ka tolu na oba ka rua na udolu na tamata, io na alewa kecega sa sega ni veikilaki kei na tagane ni ra koto kaya.
36Ia na wase, sa nodrai votavota ka ra lako ki nai valu, a kenai wiliwili sa tolusagavulu ka tolu na oba ka vitu na udolu ka lima na drau na sipi:
37ia nai vakacavacava ni sipi vei Jiova sa ono na drau ka vitusagavulu ka lima.
38Ia na karavau sa tolu na oba ka ono na udolu; a sa vitusagavulu ka rua kina nai vakacavacava vei Jiova.
39Ia na asa sa tolu na oba ka lima na drau; a sa onosagavulu ka dua kina nai vakacavacava vei Jiova.
40Ia na tamata era dua na oba ka ono na udolu; a sa tolusagavulu ka rua kina na tamata nai vakacavacava vei Jiova.
41Ia nai vakacavacava, ko ya nai soro e lavelaveti vei Jiova, sa solia ko Mosese vei Eliasari na bete, me vaka ka vakaroti Mosese ko Jiova.
42Ia mai na wase sa nodra na luve i Isireli, a ya ka wasea ko Mosese maivei ira na tamata ka kitaka nai valu, (
43ia na wase sa nodra nai vavakoso sa tolusagavulu ka tolu na oba ka vitu na udolu ka lima na drau na sipi,
44ka tolu na oba ka ono na udolu na karavau,
45ka tolu na oba ka lima na drau na asa,
46ka dua na oba ka ono na udolu na tamata;)
47io mai na wase sa nodra na luve i Isireli, sa taura ko Mosese e dua e na limasagavulu, mai na tamata kei na manumanu, ka solia vei ira na luve i Levi, era sa qarava na cakacaka ni vale-tikotiko i Jiova, me vaka ka vakaroti Mosese ko Jiova.
48Ia ko ira na turaga era lewa na veiudolu ni valu, ko ira na turaga ni veiudolu, kei ira na turaga ni veidrau, era sa lako mai kivei Mosese:
49a ra sa kaya vei Mosese, Koi keitou na nomu tamata, keitou sa wiliki ira oti na tamatai valu keitou sa lesi me lewa, ka sa sega e dua na tamata vei keimami sa yali:
50ia keitou sa kauta mai nai madrali vei Jiova, e na ka kecega sa rawata na tamata yadua, nai yaya koula, na sinucodo, kei na qato, na mama, na sau ni daliga, kei na moromoro, me sorovaki keimami kina e mata i Jiova.
51A sa taura maivei ira ko Mosese kei Eliasari na bete na koula, ko ya kece sa cakavi mei yaya.
52Ia na koula kecega sai madrali, a ya era cabora vei Jiova ko ira na turaga ni veiudolu, kei ira na turaga ni veidrau, sa dua na oba ka ono na udolu ka vitu na drau ka limasagavulu na sikeli. (
53Ko ira na tamatai valu era sa tokitaka, na tamata yadua me nona.)
54A rau sa taura ko Mosese kei Eliasari na bete na koula maivei ira na turaga ni veiudolu ka veidrau, ka kauta ki loma ni vale gatu ni veitata, mei vakananumi e na vukudra na luve i Isireli e na mata i Jiova.
Who We AreWhat We EelieveWhat We Do
2025 by iamachristian.org,Inc All rights reserved.
