Na Tiko Voli Mai Na Lekutu 30 - AI VOLA TABU（FIJ1864）

Me vakabauti ga na vavakini, 1, 2. A vavakini ni gonealewa, 3-5. A vavakini ni alewa sa vakawati, 6-8. A vavakini ni alewa dawai, 9-15.

1A SA vosa ko Mosese vei ira na turaga ni nodra veiyavusa na luve i Isireli, ka kaya, Sa vakaoqo na ka sa vunautaka ko Jiova:

2Kevaka sa vavakini e na vavakini vei Jiova e dua na tamata, se cavuta na ruru me vauca kina na yalona e nai vesu; me na kakua ni vakalasutaka na nona vosa; me kitaka vaka na ka kecega sa lako mai na gusuna.

3Ia kevaka sa vavakini e na vavakini vei Jiova e dua na alewa, ka vauca na yalona e nai vesu, ni sa tiko e na vale i tamana ni sa gonealewa;

4a sa rogoca na nona vavakini ko tamana, kei na nonai vau sa vauca kina na yalona, a sa galuvi koya ko tamana: me qai dei ga na nona vavakini kecega, ka dei talega nai vau kecega sa vauca kina na yalona.

5Ia kevaka sa vakadaroya ko tamana e na siga sa rogoca; ena qai tawa dei e dua na nona vavakini, se nonai vesu sa vauca kina na yalona: ena sega talega ni cudruva kina ko Jiova, e na vuku ni ka vakadarova ko tamana.

6Ia kevaka sa vakawati dina, ni sa vavakini ko koya, se ni sa cavuta e dua na ka na tebenigusuna me vauca kina na yalona;

7a sa rogoca ko na watina, ka galuvi koya e na siga sa rogoca: me na qai dei na nona vavakini, ka dei na nonai vau sa vauca kina na yalona.

8Ia kevaka sa vakadaroya ko na watina e na siga sa rogoca; sa na qai vakatawayagataka ko koya na nona vavakini sa tu vua, kei na ka sa cavuta na tebenigusuna me vauca kina na yalona: ena sega talega ni cudruva kina ko Jiova.

9Ia na nona vavakini kecega na alewa dawai, sei koya sa tawase mai vua na watina, sa vauca kina na yalona, ena dei ga vua.

10Ia kevaka sa vavakini e na vale i watina, se sa vauca na yalona e nai vau ni sa cavuta na vavakini;

11a sa rogoca ko na watina, ka galuvi koya, ka sega ni vakadaroya: ena qai dei ga na nona vavakini kecega, ka dei talega nai vau kecega sa vauca kina na yalona.

12Ia kevaka sa vakadaroya sara ko na watina e na siga sa rogoca; ena qai tawa dei na ka kecega sa lako mai na tebenigusuna e na vuku ni nona vavakini, se na ka sa vauca kina na yalona: sa vakadaroya ko na watina; ena tawa cudruva talega kina ko Jiova.

13A vavakini kecega, kei na bubului kecega sa vauci kina me vakamalumalumutaka na yalona, ena vakataudeitaka ko na watina, se na vakadaroya ko na watina.

14Ia kevaka sa galuva sara na watina e na veisiga; sa qai vakataudeitaka ko koya na nona vavakini kecega, kei na nonai vau kecega sa tu vua: sa vakataudeitaka ko koya, e na vuku ni ka galuva e na siga ka rogoca.

15Ia kevaka sa vakadaroya sara ni sa rogoca oti; ena qai cudruvi ko koya na tagane e na vuku ni nona cala na alewa.

16O qo na veilesilesi sa vunautaka vei Mosese ko Jiova, e na vuku ni tagane kei na watina, e na vuku ni tamana kei na luvena alewa ni sa gonealewa e na vale i tamana.