Na Tiko Voli Mai Na Lekutu 28 - AI VOLA TABU（FIJ1864）

Sa tukuni nai soro kecega sa lesi me caka tiko e na veisiga, 3-8; e na siga ni vakacecegu, 9, 10; e na vula vou, 11-15; e na solevu ni lako-sivia, 16-25; kei nai sevu ni vanua, 26-31.

1A SA vosa vei Mosese ko Jiova, ka kaya,

2Mo vakaroti ira na luve i Isireli, ka kaya vei ira, Ai madrali vei au, io na noqu kakana vata kei na veika sa cabori vei au e na buka waqa, me ka boi vinaka vei au, dou nanuma me cabora ga vei au e na kena gauna sa lokuci.

3Ia mo kaya vei ira, O qo na ka sa cabori e na buka waqa dou na cabora vei J io va; e rua na lami sa yabaki dua sa tawa ca, e na veisiga, mei soro kama sa ia tikoga.

4Mo cabora e dua na lami e na mataka, ka cabora na kenai karua ni lami e na yakavi;

5kei na omeri madrai droka mei madrali laukana, sa waki vata kei na waiwai sa vutuki e rua na painiti ka levu cake:

6nai soro kama sa ia tikoga, sa lesi mai na ulu-ni-vanua ko Sinei me ka boi vinaka, na ka sa cabori e na buka waqa vei Jiova.

7Ia na kenai madrali liviraki e rua na painiti ka levu cake ki na lami e dua: mo liviraka e na tikina tabu na waini mei madrali liviraki vei Jiova.

8Ia na lami kadua mo cabora e na yakavi: mo cabora me vaka nai madrali laukana vaka-mataka, kei na kenai madrali liviraki, me ka sa cabori e na buka waqa, na ka boi vinaka vei Jiova.

9Ia e na siga ni vakacecegu me rua na lami sa yabaki dua sa tawa ca, ka rua na omeri madrai droka, sa waki vata kei na waiwai, mei madrali laukana, kei na kenai madrali liviraki:

10nai soro kama ni siga ni vakacecegu kecega, mei kuri ni soro kama sa ia tikoga, kei na kenai madrali liviraki.

11Ia e nai vakatekivu ni nomudou veivula dou na cabora nai soro kama vei Jiova; e rua na karavau sa gone, ka dua na sipi tagane, e vitu na lami sa yabaki dua sa tawa ca;

12ka tolu na omeri madrai droka, sa waki vata kei na waiwai, mei madrali laukana, ki na karavau e dua; ka rua na omeri madrai droka, sa waki vata kei na waiwai, mei madrali laukana, ki na sipi tagane e dua;

13me yadua talega na omeri madrai droka, sa waki vata kei na waiwai, mei madrali laukana, ki na lami e dua; o ya nai soro kama, me ka boi vinaka, me ka sa cabori e na buka waqa vei Jiova.

14Ia na kedrai madrali liviraki me waini e lima na painiti, ki na karavau, ka tolu na painiti ka levu cake ki na sipi tagane, ka rua na painiti ka levu cake ki na lami: o qo nai soro kama e na vula kecega, e na veivula ni yabaki.

15Ka dua na luve ni koti mei soro ni valavala ca me cabori vei Jiova, kei na kenai madrali liviraki, mei kuri ni soro kama sa ia tikoga.

16Ia e nai katinikava ni siga ni matai ni vula me caka na solevu ni lako-sivia i Jiova.

17Ia e nai katinikalima ni siga ni vula o qo me ia na solevu: me kani tiko e na siga e vitu na madrai sa tawa vakalevenitaki.

18Me dua nai soqosoqo tabu e nai matai ni siga; dou kakua ni cakava; kina e dua na cakacaka vakaisi:

19ia dou cabora na ka e na buka waqa, mei soro kama vei Jiova: e rua na karavau sa gone, ka dua na sipi tagane, ka vitu na lami sa yabaki dua: me ra na nomudou ka tawa ca:

20ia na kedrai madrali laukana me madrai droka, sa waki vata kei na waiwai: dou cabora vata e tolu na omeri kei na dua na karavau, ka rua na omeri kei na dua na sipi tagane;

21ko na cabora e dua na omeri ki na lami yadua, e na lami e vitu:

22ka dua na koti mei soro ni valavala ca, me sorovaki kemudou kina.

23Dou cabora na veika o qo, mei kuri ni soro kama vakamataka, ko ya nai soro kama sa ia tikoga.

24Dou cabocabo vakaoqo e na veisiga, e na siga e vitu, na kakana vata kei na ka sa cabori e na buka waqa, na ka boi vinaka vei Jiova: me cabori o qo kei na kenai madrali liviraki, mei kuri ni soro kama sa ia tikoga.

25Me dua talega nai soqosoqo tabu vei kemudou e nai kavitu ni siga; dou kakua ni cakava kina e dua na cakacaka vakaisi.

26E na siga talega ni sevusevu, ni dou sa kauta e dua nai madrali laukana vou vei Jiova, ni sa oti na nomudou veiwiki, me dua nai soqosoqo tabu vei kemudou; dou kakua ni cakava kina e dua na cakacaka vakaisi:

27ia dou cabora ga nai soro kama, me ka boi vinaka vei Jiova; e rua na karavau sa gone, e dua na sipi tagane, e vitu na lami sa yabaki dua;

28ia na kedrai madrali laukana me madrai droka, sa waki vata kei na waiwai, e tolu na omeri ki na karavau e dua, e rua na omeri ki na sipi tagane e dua,

29me dua na omeri ki na lami yadua, e na lami e vitu,

30e dua na luve ni koti, me sorovaki kemudou kina.

31Dou na cabora mei kuri ni soro kama sa ia tikoga, kei na kenai madrali laukana, (me ra na nomudou ka tawa ca,) vata kei na kedrai madrali liviraki.