Na Tiko Voli Mai Na Lekutu 27 - AI VOLA TABU（FIJ1864）

Eratou taroga na nodratoui votavota ni vanua na luvena alewa ko Silofati, 1-4. Sa soli vei iratou, 5-11. Sa tukuna vei Mosese ko Jiova na nona mate, 12-14. A sa vakamamasu ko Mosese me dua na kenai sosomi, a sa lesi ko Josua, 15-23.

1ERATOU sa qai lako mai na luvena alewa ko Silofati, na luve i Eferi, na luve i Kiliati, na luve i Mekiri, na luve i Manase, e na veimataqali i Manase na luve i Josefa: ia o qo na yacadratou na luvena alewa: o Mala, ko Noa, kei Okila, kei Milika, kei Tirisa.

2A ratou sa tu e na mata i Mosese, kei na mata i Eliasari na bete, kei na matadra na turaga kei ira nai vavakoso taucoko, e na katuba ni vale gatu ni veitata, ka ratou kaya,

3Sa mate na tama i keitou mai na lekutu, ka sega ni tiko vata kei ira era soqoni vata me vala kei Jiova e nai vavakoso i Kora; a sa mate ga e na nonai valavala ca, a sa sega na luvena tagane.

4Me bokoci laivi e na vuku ni cava na yaca ni tama i keitou mai na nona mataqali, ni sa sega na luvena tagane? Mo ni solia ga vei keitou nai votavota e na kedra maliwa na weka ni tama i keitou.

5A sa kauta na nodratou vosa ko Mosese me lewa ko Jiova.

6A sa vosa vei Mosese ko Jiova, ka kaya,

7Sa dodonu na nodratou vosa na gonealewa i Silofati: mo solia dina ga vei iratou e dua nai votavota me ratou taukena e na kedra maliwa na weka ni tamadratou; ia mo solia vei iratou nai votavota ni tamadratou.

8Ia mo vosa vei ira na luve i Isireli, ka kaya, Kevaka sa mate e dua na tamata, ka sa sega na luvena tagane, dou qai solia na nonai votavota vua na luvena alewa:

9ia kevaka sa sega na luvena alewa, dou solia ga na nonai votavota vei ira na tuakana kei na tacina:

10ia kevaka sa sega na tuakana se na tacina, dou solia na nonai votavota vei ira na tuaka kei na taci i tamana:

11ia kevaka sa sega na tuaka se taci i tamana, dou solia na nonai votavota vua na wekana sa wekana dina e nona mataqali, me taukena ko koya: ia o qo ena ka sa lesi vei ira na luve i Isireli me ra lewa vakakina, me vaka ka vakarota vei Mosese ko Jiova.

12A SA kaya vei Mosese ko Jiova, Mo cabeta na ulu-ni-vanua o qo ko Aparimi, ka raica na vanua kaʼu sa solia vei ira na luve i Isireli:

13ia ni ko sa raica oti, ko na qai soqoni talega vei ira na kai nomu, me vaka ka soqoni ko Eroni na tuakamu:

14ni drau a talaidredre, mai na lekutu ko Sini, ki na noqu vunau, mo drau vakarokorokotaki au mai na wai e na mata ni vavakoso, ni ra sa veileti: (ko ya na wai ko Miripa mai Ketesa mai na lekutu ko Sini.)

15A sa vosa vei Jiova ko Mosese, ka kaya,

16Me lesia mada ko Jiova na Kalou ni yalodra na tamata kecega e dua na tamata me lewai ira nai vavakoso,

17me liutaki ira ko koya ni ra curu yani, ka liutaki ira ni ra sa curu mai, ka kauti ira mai; me kakua kina ni vaka na sipi sa sega na kedrai vakatawa ko ira nai vavakoso i Jiova.

18A sa kaya vei Mosese ko Jiova, Mo kauti Josua na luve i Nuni, a tamata sa tiko vua ko na Yalo, ka tabaki koya e na ligamu;

19ka vakaturi koya e na mata i Eliasari na bete, kei na mata ni vavakoso taucoko; ka vakaroti koya e na matadra.

20Ia mo lesi koya me turaga e vakai iko e na ka e so, me ra talairawarawa kina nai vavakoso taucoko ni luve i Isireli.

21Ia me dautu ko koya e na mata i Eliasari na bete, o koya ena taroga e na vukuna vaka na lewa ni Urimi e na mata i Jiova: era na curu yani e na nona vosa, ka cavu mai e na nona vosa, ko koya kei ira kecega vata kaya na luve i Isireli, io nai vavakoso taucoko.

22A sa kitaka ko Mosese me vaka ka vakarota vua ko Jiova: a sa tauri Josua, ka vakatura e na mata i Eliasari na bete, kei na mata ni vavakoso taucoko:

23a sa tabaka e na ligana, a sa vakaroti koya, me vaka ka vakarota ko Jiova e na gusu i Mosese.