Na Tiko Voli Mai Na Lekutu 25 - AI VOLA TABU（FIJ1864）

Era kitaka na dauyalewa mai Sitimi na Isireli, 1-5. Ai valavala i Piniasi, 6-9. Sa lesi me nona na cakacaka ni bete, 10-15.

1A SA tiko mai Sitimi ko ira na Isireli, a ra sa vakatekivu me dauci ira na gonealewa ni Moapi ko ira na tamata.

2Ia ko ira na alewa sa kacivi ira na tamata ki nai soro vei ira na nodra kalou: a ra sa kana na tamata, ka cuva ki na nodra kalou na alewa.

3A ra sa kabiti Peali-piori na Isireli: a sa waqa mai na cudru i Jiova vei ira na Isireli.

4A sa kaya vei Mosese ko Jiova, Mo kauti ira kecega sa turaga vei ira na tamata, ka vakarubeci ira e mata ni siga vei Jiova, me saumaki tani kina na cudru i Jiova vei ira na Isireli.

5A sa kaya ko Mosese vei ira na dauveilewai e Isireli, Dou vakamatea na tamata yadua na nona tamata era sa kabiti Peali-piori.

6Ka, raica, sa lako mai e dua vei ira na luve i Isireli, ka kauta mai kivei ira na wekana e dua na alewa ni Mitiani, e na mata i Mosese, kei na matadra nai vavakoso taucoko ni luve i Isireli, ni ra sa tagi tiko mai na katuba ni vale gatu ni veitata.

7A sa raica ko Piniasi na luve i Eliasari, na luve i Eroni na bete, a sa tu cake maivei ira nai vavakoso, a sa lukuta e ligana na moto;

8a sa muria ko koya na tamata ni Isireli ki na vale gatu, a sa cokaveituituitaki rau, na tamata ni Isireli, kei na alewa e na ketena. A sa mudu kina na mate levu vei ira na luve i Isireli.

9Ia ko ira ka mate e na mate levu, era rua na oba ka va na udolu.

10A sa vosa vei Mosese ko Jiova, ka kaya,

11O Piniasi, na luve i Eliasari, na luve i Eroni na bete, sa saumaka tani na noqu cudru vei ira na luve i Isireli, ni sa vuvu ko koya e na nodra maliwa ni sa dokai e dua tani me noqui sosomi, ia kaʼu a sega ni vakaoti ira kina na luve i Isireli e na noqu vuvu.

12O koya mo kaya kina, Raica, kaʼu sa cakava vua na vosa ni noqu veiyalayalati me kalougata;

13ia ena nona, kei na nodra na nona kawa era muri koya, io na vosa ni yalayala me nodra tawa mudu na cakacaka ni bete; e na vuku ni ka vuvu ko koya e na vuku ni nona Kalou, ka sorovaki ira na luve i Isireli.

14Ia sa yacana na tamata ni Isireli ka laucoka, io ko koya erau sa cokaveituituitaki kei na alewa ni Mitiani, ko Simiri, na luve i Salu, a turaga e na nodra mataqali turaga na luve i Simioni.

15Ia sa yacana na alewa ni Mitiani ka laucoka ko Kosipi, na luve i Suri; a turaga ko koya vei ira na mataqali e so, mai na dua na mataqali turaga mai Mitiani.

16A sa vosa vei Mosese ko Jiova, ka kaya,

17Mo vakararawataki ira na kai Mitiani, ka dou mokuti ira:

18ni ra sa vakararawataki kemudou e na nodra vere, era sa vereti kemudou kina e na vuku i Piori, kei na vuku i Kosipi, na luvena e dua na turaga ni Mitiani, na ganedra, ko koya ka laucoka e na siga ni mate levu e na vuku i Piori.