Na Tiko Voli Mai Na Lekutu 24 - AI VOLA TABU（FIJ1864）

Sa vosavakalougatataki ira na Isireli tale ko Palami, 1-9. Sa veileti kaya tale ko Palaki, 10-14; a sa cavuta ko Palami e so na ka ena yaco, 15-24. Sa lako tale ki na nona vanua, 25.

1Ia ni sa raica ko Palami ni sa vinaka vei Jiova me vakalougatataki ira na Isireli, sa sega ni lako, me vaka eliu, me tavaka na ka ni veinita, a sa vaqara na matana kivaka ki na lekutu.

2A sa ta cake na matana ko Palami, a sa raici ira na Isireli ni ra sa tiko e vaka na nodra veiyavusa; a sa rawai koya na Yalo ni Kalou.

3A sa taura ko koya na nona vosa vakaibalebale, ka kaya,

Sa kaya ko Palami, na luve i Piori, a sa kaya na tamata ka vakayadrati na matana:

4sa kaya ko koya sa rogoca na vosa ni Kalou, ko koya sa raica na raivotu i Koya na Kaukauwa, sa bibi mai, a sa yadra ga na matana:

5A ka talei na nomudou veivale gatu, na Jekope! na nomudou veivale-tikotiko, na Isireli!

6Sa tevuki yani e vaka na veibuca, e vaka na veiwere mai na bati ni uciwai, e vaka na yasiyasi sa tea ko Jiova, e vaka na sitari e na bati ni wai.

7Ena nodra na veisaqa sa drodro maikina na wai, ia ena nodra na sila-tei e loma ni wai e vuqa; ena levu na nodra tui, ka lailai ko Ekaki, ia ena laveti cake na nodra matanitu.

8Sa kauti ira tani mai Ijipita na Kalou; sa kaukauwa ko ira e vaka na yunikoni: ena kania na veimatanitu era nodra meca, ka quruta na suidra, ka musuka na nodra gasau.

9Sa koto sobu, sa koto me vaka na laioni, ka vaka na laioni alewa: ko cei ena vakayadrata? Sa kalougata ko ira yadua sa vosavakalougatataki iko, ka cudruvi ko ira yadua sa rukaki iko.

10A sa waqa mai vei Palami na cudru i Palaki, a sa tavia vata na ligana: a sa kaya vei Palami ko Palaki, Au a kacivi iko mo rukaki ira na noqu meca, ka, raica, ko sa vosavakalougatataka walega ka vakatolu vakaoqo:

11ia o qo, mo dro ki na nomu yasana: au a kaya meʼu vakalevulevui iko sara; ka, raica, sa vakadaroya ko Jiova mo kakua kina ni vakalevulevui.

12A sa kaya vei Palaki ko Palami, Au a sega beka ni vosa vei ira na nomui talatala ko a tala vei au, ka vaka,

13Kevaka sa na solia mai vei au ko Palaki na siliva kei na koula e vakasinaita na nona vale, au sa sega ni sivia rawa na vosa i Jiova, me kitaka na ka vinaka se na ka ca e lomaqu walega; na ka ga sa cavuta ko Jiova, o qori kaʼu na cavuta?

14Ia o qo, raica, kaʼu sa lako vei ira na kai noqu: meʼu na vakatakila mada vei iko na ka era na cakava e na gauna maimuri na tamata o qo kivei ira na nomu tamata.

15A sa taura ko koya na nona vosa vakaibalebale, ka kaya,

Sa kaya ko Palami na luve i Piori, a sa kaya na tamata ka vakayadrati na matana:

16sa kaya ko koya sa rogoca na vosa ni Kalou, ka kila nai vakavuvuli i Koya na Cecere, ko koya sa raica na raivotu i Koya na Kaukauwa, sa bibi mai, a sa yadra ga na matana:

17Au sa raici koya, ka sa bera ga ko koya: au sa raici koya, ka sa yawa ga ko koya: ena vura mai e dua na kalokalo mai na Jekope, ka tubu e dua na matanakilagi-ni-tui mai na Isireli, ka yavita na vei yalayala ni Moapi, ka vakawabokotaka ira kecega na viavialevu:

18ia ena taukeni Itomi ko koya, ena taukeni Seira talega sa nona vanua meca; ia ena gumatua na Isireli.

19Ia ko koya sa daulewa ena lako mai na Jekope, ka vakarusai ira era vo e na koro.

20A sa raici ira na Amaleki ko koya, a sa taura na nona vosa vakaibalebale, ka kaya, Na Amaleki ka levu vei ira na veimatanitu, ia emuri ena rusa laivi ko ira.

21A sa raici ira na kai Kenai ko koya, a sa taura na nona vosa vakaibalebale, ka kaya, Sa kaukauwa na nomudoui tikotiko, ia sa caka e na uluvatu na nomudoui mocemoce:

22ia ena malai tikani na kai Kenai, me yaco mada na gauna sa bobulataki kemudou kina na kai Asiria.

23A sa taura ko koya na nona vosa vakaibalebale, ka kaya, Ule, ko cei me bula rawa ni sa kitaka o qo na Kalou!

24Ia ena lako mai e so na waqa mai na baravi kei Kitimi, ka vakararawataki Asiria, ka vakararawataki ira na Iperi, ka na rusa laivi o qori talega.

25A sa tu cake ko Palami, ka laʼki lesu ki na nona yasana: a sa lako talega e nona sala ko Palaki.