Na Tiko Voli Mai Na Lekutu 23 - AI VOLA TABU（FIJ1864）

Sa via rukaki ira na Isireli ko Palami, ka sa tarova tikoga ko Jiova.

1A sa kaya vei Palaki ko Palami, Mo cakava eke vei au e vitu nai cabocabo-ni-soro, ka cokonaka vei au eke e vitu na karavau, ka vitu na sipi tagane.

2A sa kitaka ko Palaki me vaka na vosa i Palami; a sa cabora ko Palaki kei Palami, e nai cabocabo-ni-soro yadua, e dua na karavau ka dua na sipi tagane.

3A sa kaya vei Palaki ko Palami, Mo tu voleka mada ki na nomui soro kama, kaʼu na lako mada: de mai tavaki au ko Jiova: ia na ka sa vakatakila mai vei au, au na tukuna vei iko. A sa lako yani ko koya ki na tikina cecere.

4A sa mai tavaki Palami na Kalou: a sa kaya vua ko koya, Au sa cokonaka oti e vitu nai cabocabo-ni-soro, ka cabora oti e nai cabocabo-ni-soro yadua e dua na karavau ka dua na sipi tagane.

5A sa tauca na vosa ki na gusu i Palami ko Jiova, a sa kaya, Mo lesu vei Palaki, ka vosa vakaoqo.

6A sa lesu vei koya; ka, raica, sa tu voleka ki na nonai soro kama, o koya, kei ira kecega na turaga ni Moapi.

7A sa taura na nona vosa vakaibalebale, ka kaya, Sa kauti au mai Erami ko Palaki na tui Moapi, mai na veiulu-ni-vanua mai cake, ka kaya, Mo lako mai, mo rukaki ira na Jekope o na vukuqu; ia mo lako mai, mo lesavi ira na Isireli.

8Au na rukaki koya vakacava sa sega ni rukaka ko na Kalou? seʼu na lesavi koya vakacava sa sega ni lesava ko Jiova?

9Mai na dela ni uluvatu kaʼu sa raici koya, ka kunei koya mai na veivanua cecere: raica, era sa tiko vakai ira na tamata, ka sega ni wili vata kei ira na veimatanitu.

10O cei me wiliki ira rawa na Jekope sa vaka na kuvu ni soso, se okata e dua na wase ni Isireli ni sa wase va? Meʼu mate mada me vaka sa mate na tamata yalododonu, ia me vaka mada na nona na noqui otioti!

11A sa kaya vei Palami ko Palaki, A cava ko sa kitaka vei au? au a kauti iko mo rukaki ira na noqu meca; ka, raica, ko sa vosavakalougatataki ira walega.

12A sa vosa ko koya, ka kaya, Meʼu na sega beka ni nanuma me cavuta ga na ka sa tauca ki na gusuqu ko Jiova?

13A sa kaya vua ko Palaki, Daru lako mada ki na yasana tani, ko na raici ira maikina: ko na raici ira walega era sa tiko esau, ka sega ni raici ira kecega; ia mo rukaki ira maikea e na vukuqu.

14A sa kauti koya ki na yasana ko Sofimi, ki na dela i Pisika, ka cakava e vitu nai cabocabo-ni-soro, ka cabora e nai cabocabo-ni-soro yadua e dua na karavau ka dua na sipi tagane.

15A sa kaya ko koya vei Palaki, Mo tu mada eke voleka ki na nomui soro kama, kau na lako madani me veitavaki.

16A sa mai tavaki Palami ko Jiova, ka tauca na vosa ki na gusuna, ka kaya, Mo lesu vei Palaki, ka vosa vakaoqo.

17Ia ni sa lako mai kivei koya, raica, sa tu voleka ki na nonai soro kama, kei ira vata kaya na turaga ni Moapi. A sa kaya vua ko Palaki, A cava sa kaya ko Jiova?

18A sa taura na nona vosa vakaibalebale, ka kaya, Mo tu cake, i Palaki, ka vakarorogo; mo rogoci au, na luve i Sipori:

19Sa sega ni tamata na Kalou, me mai vosa lasu; se na luve ni tamata, me mai veivutuni: sa kaya li ko koya, ka na sega ni cakava? se sa vosa li ko koya, ka na sega ni vakayacora?

20Raica, sa soli vei au meʼu vosavakalougatataka, a sa vakalougataka ko koya; ia kaʼu sa sega ni vakadaroya rawa.

21Sa sega ni rairai na rarawa vei ira na Jekope, ia sa sega ni raici na veivakaocai vei ira na Isireli: sa tiko kei ira ko Jiova na nodra Kalou, ia sa dua na tui sa kailavaki e na nodra maliwa.

22Sa kauti ira tani mai Ijipita na Kalou; sa kaukauwa ko ira e vaka na yunikoni.

23Sa sega sara ni sauvi rawa ko ira na Jekope, ka sega ni vakayacori rawa na ca vei ira na Isireli: e na gauna o qo sa kainaki e na vukudra na Jekope kei na Isireli, A ka vakaidina sa cakava na Kalou!

24Raica, era na tu cake na tamata me vaka na laioni alewa, ka wavu tu me vaka na laioni: ena sega ni koto tale, ena kania mada na kedra sa rawa, ka gunuva na kedra dra sa vakamatei.

25A sa kaya vei Palami ko Palaki, Mo kakua sara ni rukaki ira, mo kakua sara ni vosavakalougatataki ira.

26A sa vosa ko Palami, ka kaya vei Palaki, Au a sega li ni tukuna vei iko, ka kaya, A ka kecega sa kaya ko Jiova, ko ya ga au na kitaka?

27A sa kaya vei Palami ko Palaki, Daru lako mada, au na kauti iko ki na dua na yasana tani: de na vinaka vua na Kalou mo rukaki ira e na vukuqu maikea.

28A sa kauti Palami ko Palaki ki na dela i Piori, ko koya sa qarava na Veikau.

29A sa kaya vei Palaki ko Palami, Mo cakava vei au eke e vitu nai cabocabo-ni-soro, ka cokonaka vei au eke e vitu na karavau ka vitu na sipi tagane.

30A sa kitaka ko Palaki me vaka na vosa i Palami, ka cabora e nai cabocabo-ni-soro yadua e dua na karavau ka dua na sipi tagane.