1A SA toki ko ira na luve i Isireli, ka laʼki tiko mai na cecelevu mai Moapi, e na tai kikea ni Joritani sa donui Jeriko.
2Io ko Palaki na luve i Sipori, sa kunea na ka kecega era a kitaka na Isireli vei ira na luve i Amori.
3A sa rere vakalevu ko ira na Moapi e na vukudra na tamata, ni ra sa lewe vuqa: a sa taqaya ko ira na Moapi e na vukudra na luve i Isireli.
4A sa kaya na Moapi vei ira na qase ni Mitiani, Nai vavakoso o qo ena dramica vakusakusa na ka kecega sa-voliti keda, me vaka sa dramica na co ni vanua na karavau. Ia ko Palaki, na luve i Sipori, sa tui ni luve i Moapi e na gauna ko ya.
5A sa tala ko koya e so nai talatala vei Palami na luve i Piori ki Picori, o koya sa voleka ki na uciwai ni nodra vanua na kai nona, me kacivi koya, ka kaya, Raica, sa lako mai e dua na matanitu mai Ijipita: raica, era sa ubia na dela ni vanua, a ra sa mai tiko ka donui au:
6ia o qo, mo lako mada mai, mo rukaka e na vukuqu na matanitu o qo; ni ra sa kaukauwa vei au: deʼu na gumatua, me kedaru yaviti ira, ia meʼu vakasevi ira tani mai na vanua o qo: niʼu sa vaka, ni sa kalougata ko koya ko sa vosavakalougatataka, ka sa ca ko koya ko sa rukaka.
7A ra sa lako na qase ni Moapi kei na qase ni Mitiani, ka kauta nai sau ni rairai; a ra sa lako vei Palami, ka tukuna vua na vosa i Palaki.
8A sa kaya vei ira ko koya, Dou moce mada eke e na bogi o qo, kaʼu na qai mai tukuna vei kemudou na vosa, me vaka sa kaya vei au ko Jiova: a ra sa tiko kei Palami na turaga ni Moapi.
9A sa lako mai na Kalou vei Palami, ka kaya, O cei na tamata o qo era tiko kei iko?
10A sa kaya vua na Kalou ko Palami, O Palaki na luve i Sipori, na tui Moapi, sa talaki vei au, ka kaya,
11Raica, na matanitu sa lako mai Ijipita, era ubia na dela ni vanua: mo lako mai o qo, mo mai rukaki ira e na vukuqu; deʼu na gumatua vei ira e nai valu, ka vakasevi ira.
12A sa kaya vei Palami na Kalou, Mo kakua ni lako kei ira; mo kakua ni rukaki ira na tamata; ni ra sa kalougata ga.
13A sa tu cake e na sabogibogi ko Palami, ka kaya vei ira na turaga maivei Palaki, Dou lako ga ki na nomudou vanua: ni sa bese ni soli au ko Jiova me lako kei kemudou.
14A ra sa tu cake na turaga ni Moapi, ka ra sa lako vei Palaki, ka kaya, Sa bese ni lako mai kei keitou ko Palami.
15A sa tala tale ko Palaki na turaga e lewe vuqa cake, ka lelevu cake, vei ira ka liu.
16A ra sa lako mai vei Palami, ka kaya vua, Sa vosa vakaoqo ko Palaki na luve i Sipori, Mo kakua mada ni tarovi, mo kakua kina ni lako mai vei au;
17niʼu na vakalevulevui iko sara, ka kitaka na ka kecega ko na kaya vei au: mo lako mada mai, mo rukaka e na vukuqu na matanitu o qo.
18A sa vosa ko Palami, ka kaya vei ira na tamata i Palaki, Kevaka sa na solia vei au ko Palaki na siliva kei na koula e vakasinaita na nona vale, au sa sega ni cavuta rawa na ka e lailai sobu se na ka e levu cake, na vosa ga i Jiova na noqu Kalou:
19ia o qo, koi kemudou talega, dou moce mada eke e na bogi o qo, meʼu kila na ka ena kaya tale vei au ko Jiova.
20A sa lako mai vei Palami e na bogi na Kalou, ka sa kaya vua, Kevaka era lako mai na tamata o qori me kacivi iko, mo tu cake, mo lako vata kei ira; ia na vosa ga kaʼu na kaya vei iko, ko ya ga mo kitaka.
21A sa tu cake e na sabogibogi ko Palami, ka vauca na vodovodo ki na nona asa, ka lako yani kei ira na turaga ni Moapi.
22A sa waqa mai na cudru ni Kalou e na vuku ni sa lako ko koya: a sa tu e na sala ko koya na agilose i Jiova me veivala kaya. Ia sa vodo lako e nona asa, kei iratou kaya na nona cauravou e lewe rua.
23A sa raica ko na asa, ni sa tu e na sala na agilose i Jiova, a sa ucuni tu e ligana na nonai seleiwau: a sa lako vakatikitiki tani mai na sala na asa, ka lako ki na veiwere: a sa yavita na asa ko Palami, me vagolea ki na sala.
24A sa tu na agilose i Jiova e na sala mai na veivaini, a sa dua na bai vatu vaka, ka dua na bai vatu vaka.
25Ta ni sa raica na agilose i Jiova na asa, sa utura na bai vatu, ka sa qaqia na yava i Palami ki na bai vatu: a sa yavita tale ko koya.
26A sa lako yani kiliu na agilose i Jiova, ka tu e na yasana qiqo, ka sa sega na sala me lako rawa kina ki nai matau se nai mawi.
27Ia ni sa raica na agilose i Jiova na asa, sa bale sobu e na ruku i Palami: a sa waqa mai na cudru i Palami, a sa yavita na asa e nai titoko.
28A sa cakava na asa ko Jiova me dalaga na gusuna, ka me kaya vei Palami, A cava kaʼu sa cakava vei iko, ko sa yaviti au vakatolu kina vakaoqo?
29A sa kaya ko Palami vua na asa, E na vuku ni ko a vakalialiai au: me dua mada nai seleiwau e ligaqu, au sa qai vakamatei iko.
30A sa kaya vei Palami na asa, Oi au na nomu asa se segai, ka ko sa dauvodoki au eliu e yacova na siga o qo? au a daukitaki iko vakaoqo beka? A sa kaya ko koya, E segai.
31A sa qai vakayadrata na mata i Palami ko Jiova, a sa kunea ko koya, ni sa tu e na sala na agilose i Jiova, a sa ucuni tu e ligana na nonai seleiwau: a sa cuva, ka bale vakatobocu.
32A sa kaya vua ko na agilose i Jiova, A cava ko sa yavita vakatolu vakaoqo kina na nomu asa? raica, kaʼu a lako yani me tataro, ni sa takelo na nomui valavala e mataqu:
33a sa kunei au na asa, ka vuki tani vakatolu vakaoqo vei au: kevaka sa sega ni vuki tani vei au, kaʼu sa vakamatei iko oti vakaidina, ka vakabulai koya.
34A sa kaya ko Palami vua na agilose i Jiova, Au sa valavala ca; niʼu a sega ni kila ni ko a tu e na sala me tavaki au: ia o qo, kevaka sa ca e matamu, kaʼu na lesu tale.
35A sa kaya vei Palami na agilose i Jiova, Dou lako ga kei ira na tamata: ia na vosa ga kaʼu na cavuta vei iko ko ya ga ko na vosataka. A sa lako ko Palami kei ira na turaga maivei Palaki.
36Ia ni sa rogoca ko Palaki ni sa lako tiko mai ko Palami, sa lako yani ko koya me tavaka, ki na dua na koro ni Moapi, mai nai yalayala i Arinoni, ko ya mai nai yalayala sara.
37A sa kaya vei Palami ko Palaki, Au a sega beka ni talaki matua me kacivi iko? a cava ko a sega ni lako mai kina vei au? sa sega beka ni dina niʼu vakalevulevui iko rawa?
38A sa kaya vei Palaki ko Palami, Raica, kaʼu sa lako mai kivei iko: o qo, kaʼu sa cavuta rawa vakalailai li e dua na ka? a vosa sa tauca ki na gusuqu na Kalou, ko ya ga kaʼu na cavuta.
39A sa lako kei Palaki ko Palami, a rau sa yaco ki Kiriaci-usoci.
40A sa vakamatea na karavau kei na sipi ko Palaki, ka talaki vei Palami kei ira na turaga era sa tiko kaya.
41Ia e na sabogibogi, sa kauti Palami ko Palaki, ka kauti koya cake ki na vanua cecere nei Peali, me raici ira rawa kina na tamata sa tiko esau:
Who We AreWhat We EelieveWhat We Do
2025 by iamachristian.org,Inc All rights reserved.
