1IA na tui Arati na kai Kenani, o koya ka tiko ki na ceva, sa rogoca ni ra sa lako mai na Isireli e na sala ka ratou lako kina na rai vanua: sa qai vala kei ira na Isireli, ka bobulataki ira e so.
2Ia era cavuta na-vavakini na Isireli vei Jiova, ka kaya, Kevaka kemuni na solia dina na tamata o qo ki na ligaqu, kaʼu na qai vakarusa sara na nodra Veikoro.
3A sa rogoca na domodra na Isireli ko Jiova, ka soli ira na kai Kenani; a ra sa vakarusai ira sara kei na nodra veikoro: a sa vakatoka na yaca ni yasana ko ya ko Orima.
4A RA sa lako tani mai na ulu-ni-vanua ko Ori e na sala kivaka ki na Wasa Damudamu, me lako volita na vanua ko Itomi: a sa waicala na yalodra na tamata e na vuku ni sala.
5A sa vosacataka na Kalou, kei Mosese, ko ira na tamata, ka kaya, A cava drau sa kauti keimami cake kina mai Ijipita, me mate e na lekutu? ni sa sega na kakana, ka sa sega na wai; a sa ka vakavure lua ki na loma i keimami na kakana vakasisila o qo.
6A sa tala na veigata katakata vei ira na tamata ko Jiova, a ra sa kati ira na tamata; a sa mate na tamata e lewe vuqa maivei ira na Isireli.
7A ra sa lako mai vei Mosese na tamata, ka kaya, Keimami sa caka ca, ni keimami sa vosacataki Jiova, kei iko; mo masuti Jiova me kauta tani vei keimami na veigata. A sa masulaki ira na tamata ko Mosese.
8A sa kaya vei Mosese ko Jiova, Mo cakava vei iko e dua na gata katakata, ka vauca ki na dua na kau balavu: ia ena yaco me ra bula ko ira kecega sa laukata, ni ra sa raica.
9A sa cakava e dua na gata parasa ko Mosese, ka vauca ki na kau balavu, a sa yaco, kevaka sa katia e dua na tamata na gata, ni sa raica na gata parasa, sa bula.
10A ra sa lako na luve i Isireli, ka laʼki tiko mai Opoci.
11A ra sa lako mai Opoci, ka laʼki tiko mai Iye ni Eparimi, mai na lekutu sa donui Moapi, kivaka ki nai cadracadra ni siga.
12Era sa lako maikina, ka laʼki tiko mai na buca mai Sereti.
13Era sa lako maikina, ka laʼki tiko mai na yasana kadua ni Arinoni, ko ya mai na lekutu sa lako mai na nodrai yalayala na luve i Amori: ni sai yalayala i Moapi ko Arinoni, e na tadrua kei Moapi kei na luve i Amori.
14O koya sa tukuni kina e nai vola ni valu i Jiova, Ko Vaepa mai Sufa, kei na uciwai ko Arinoni,
15kei na soniwai ni uciwai sa lako sobu ki na yasana ko Ari, ka qarava nai yalayala i Moapi.
16Ia maikina ki Pieri: ko ya nai keli-wai ka vosa kina ko Jiova vei Mosese, Mo vakasoqoni ira vata na tamata, kaʼu na solia vei ira na wai.
17Sa qai meketaka na meke o qo ko ira na Isireli, I keli-wai, mo vure mai; mo dou meketaka:
18nai keli-wai era sa kelia na turaga, io era sa cara-maka ko ira sa lewai ira na tamata, e na nodra doko, e na vuku i koya na vu-ni-vunau.
Ia mai na lekutu ki Matana:
19ia mai Matana ki Neelieli: ia mai Neelieli ki Pamoci:
20ia mai Pamoci e na buca, mai na vanua ko Moapi, ki na dela i Pisika, ko ya sa donuya na Veikau.
21A sa tala e so nai talatala na Isireli kivei Sioni na tui ni luve i Amori, me kaya,
22Meʼu lako yani mada e loma ni nomu vanua: keimami na tawa lako ki na veiwere, se na veivaini; keimami na sega ni gunuva na wai mai nai keli-wai; e na salatu ga ni tui, keimami na lako, ka me keimami sivia mada na nomu yasana.
23Ia ka sa sega ni laiva na Isireli ko Sioni me ra lako e loma ni nona yasana: sa vakasoqoni ira vata ga na nona tamata kecega ko Sioni, ka laʼki tavaki ira na Isireli ki na lekutu: a sa yaco ki Yeasi, ka vala kei ira na Isireli:
24a sa mokuti koya ko ira na Isireli e na bati ni seleiwau, ka taukena na nona vanua, mai Arinoni ka laʼki yala ki Yapoki, io sa yacovi ira na luve i Amoni: ni sa kaukauwa na nodrai yalayala na luve i Amoni.
25A sa kabata na Veikoro kecega o qori ko ira na Isireli: a ra sa tiko na Isireli e na nodra Veikoro kecega na luve i Amori, mai Esiponi, kei na koro lalai kecega sa volita:
26ni sa koro i Sioni na tui ni luve i Amori ko Esiponi, ia ko koya ka veivala kei na tui Moapi eliu, ka kovea mai na ligana na nona vanua kecega, ka yaco ki Arinoni.
27O koya era daukaya kina ko ira era taurivaka nai bole; Dou lako mai ki Esiponi; mo tarai mada na koro i Sioni, ka cokonaki:
28ni sa lako tani na buka waqa mai Esiponi, na yameyame ni buka mai na koro i Sioni: sa kati Ari mai Moapi ko iratou na turaga ni veiyasana cecere ni Arinoni.
29Ko sa ca, i Moapi! ko sa rusa, na tamata i Kimosi: —sa solia ko koya na luvena tagane me dro bula, kei na luvena alewa me bobula vei Sioni na tui ni luve i Amori.
30Eda sa vanai ira; —sa rusa ko Esiponi ka yaco ki Tiponi; ia eda sa vakacaoa ka yacovi Nofa, ko ya sa volekati Metipa.
31A sa tiko e na nodra vanua na luve i Amori ko ira na Isireli.
32A sa talaki ko Mosese me yamata ki Yaseri, a ra sa kabata na Veikoro lalai sa volita, ka vakasevi ira na luve i Amori era tiko kina.
33A ra sa lesu, ka lako cake e na sala ki Pasani: a sa laʼki tavaki ira ko Oki na tui Pasani, ko koya, kei ira kecega na nona tamata, me kitaka nai valu mai Etirei.
34A sa kaya vei Mosese ko Jiova, Mo kakua ni rerevaki koya: niʼu sa soli koya ki na ligamu, kei na nona tamata kecega, kei na nona vanua; ia ko na kitaka vua e vaka na ka ko a kitaka vei Sioni na tui ni luve i Amori, ko koya ka tiko mai Esiponi.
35A ra sa mokuti koya, kei iratou na luvena, kei na nona tamata kecega, ka sa sega e vo bula vei koya: a ra sa taukena na nona vanua.
Who We AreWhat We EelieveWhat We Do
2025 by iamachristian.org,Inc All rights reserved.
