1ERA sa qai lako mai na luve i Isireli, io ko ira nai vavakoso taucoko, ki na lekutu ko Sini, e nai matai ni vula: a ra sa tiko mai Ketesa na tamata; a sa mate maikea ko Miriami, a sa buluti maikina.
2A sa sega na medra wai nai vavakoso: a ra sa soqoni vata me veivala kei Mosese kei Eroni.
3A ra sa veileti kei Mosese na tamata, ka vosa, ka kaya, E ca ni keimami a tawa ciba ni ra ciba e na mata i Jiova na weka i keimami!
4Ia a cava drau sa kauti ira mai kina nai vavakoso i Jiova ki na lekutu o qo, me keimami mate kina kei na neimami manumanu e yavai va?
5ia a cava drau sa kauti keimami cake kina mai Ijipita, me kauti keimami ki na vanua ca o qo? sa sega ni vanua ni sore ni kau, se ni veilolo, se ni veivaini, se ni kau tani e vua; ka sa sega talega na wai me gunuvi.
6A rau a lako yani ko Mosese kei Eroni mai na mata ni soqosoqo ki na katuba ni vale gatu ni veitata, a rau sa bale vakatobocu: a sa rairai vei rau nai ukuuku i Jiova.
7A sa vosa vei Mosese ko Jiova, ka kaya,
8Mo kauta nai titoko, ka vakasoqoni ira vata nai vavakoso, ko iko kei Eroni na tuakamu, ia drau vosa ki na Uluvatu e na matadra; ia ena solia mai na kena wai, ia ko na kauta mai vei ira na wai mai na vatu: ko na vagunuva kina nai vavakoso kei na nodra manumanu e yavai va.
9A sa kauta nai titoko ko Mosese mai na mata i Jiova, me vaka ka vakarota vua.
10A rau sa vakasoqona vata nai vavakoso ko Mosese kei Eroni ki na mata ni uluvatu, a sa kaya vei ira ko koya, Dou rogoca mada, na tamata talaidredre; keirau na kauta mai beka na memudou wai mai na vatu o qo?
11A sa dodoka na ligana ko Mosese, ka yavita vakarua na vatu e nonai titoko: a sa dave vakalevu na wai; a ra sa gunu nai vavakoso, kei na nodra manumanu e yavai va.
12A sa vosa vei Mosese kei Eroni ko Jiova, E na vuku ni drau a sega ni vakabauti au, mo vakarokorokotaki au e na matadra na luve i Isireli, drau na sega kina ni kauta nai vavakoso o qo ki na vanua kaʼu sa solia vei ira.
13O qo na wai ni Miripa; e na vuku ni ra veileti kei Jiova na luve i Isireli: ia sa vakarokorokotaki ko koya vei ira.
14A SA tala e so nai talatala ko Mosese mai Ketesa vua na tui Itomi, me kaya vua, Sa vosa vakaoqo na wekamu na Isireli, Ko sa kila na oca kecega sa vacovi keimami:
15ni ra a lako sobu ki Ijipita na neimami qase, ka keimami sa tiko vakadede mai Ijipita; a ra sa vakararawataki keimami, kei ira na neimami qase, ko ira na kai Ijipita:
16ia ni keimami a tagi vei Jiova, sa rogoca na domo i keimami ko koya, a sa tala na agilose, a sa kauti keimami tani mai Ijipita; ka, raica, keimami sa tiko e Ketesa, na koro e nai yalayala ni nomu vanua:
17mo laivi keimami mada me lako e loma ni nomu vanua: keimami na tawa lako e loma ni veiwere, so na veivaini, keimami na sega talega ni gunuva na wai mai nai keli-wai: e na salatu ga ni tui keimami na lako, keimami na sega ni lako vaka ki nai matan se nai mawi, ka me keimami sivia mada na nomu yasana.
18A sa kaya na Itomi vua, Mo kakua ga ni lako e loma ni noqu, deʼu sa laʼki tavaki iko kei nai seleiwau.
19A ra sa kaya vua na luve i Isireli, E na salatu ga keimami na lako: ia kevaka sa gunuva na memu wai koi au, se na noqu manumanu e yavai va, kaʼu na volia ga: au na lako walega e yavaqu, ka sega tale e dua na ka.
20A sa kaya ko koya, Ko na sega ga ni lako kina. A sa laʼki tavaki koya na Itomi, vata kei na tamata e lewe vuqa, e na liga kaukauwa.
21A sa bese na Itomi ni laiva na Isireli me ra lako e loma ni nona yasana: a sa lako tani vua ko ira na Isireli.
22IA ko ira na luve i Isireli, io nai vavakoso taucoko, era sa lako mai Ketesa, ka lako ki na ulu-ni-vanua ko Ori.
23A sa vosa vei Mosese kei Eroni ko Jiova mai na ulu-ni-vanua ko Ori, e nai yalayala ni vanua ko Itomi, ka kaya,
24Ko Eroni, ena kumuni vei ira na kai nona: ni na sega ni curu ki na vanua kaʼu sa solia vei ira na luve i Isireli, e na vuku ni drau a talaidredre ki na noqu vosa mai na wai ko Miripa:
25mo kauti Eroni kei Eliasari na luvena, ka kauti rau cake ki na ulu-ni-vanua ko Ori:
26ia mo luvata mai na veisulu i Eroni, ka vakasuluma kina na luvena ko Eliasari: ena qai kumuni ko Eroni, io ena mate maikea.
27Asa kitaka ko Mosese me vaka ka vunautaka ko Jiova: a ratou a cabeta na ulu-ni-vanua ko Ori, e na matadra nai vavakoso taucoko:
28a sa luvata mai na veisulu i Eroni ko Mosese, ka vakasuluma kina na luvena ko Eliasari; a sa ciba maikea ko Eroni mai na dela ni ulu-ni-vanua: a rau sa lako sobu mai na ulu-ni-vanua ko Mosese kei Eliasari.
29Ia ni ra sa raica nai vavakoso taucoko ni sa mate ko Eroni, era a tagicaki Eroni ka tolusagavulu na bogi, io ko ira kecega na mataqali i Isireli.
Who We AreWhat We EelieveWhat We Do
2025 by iamachristian.org,Inc All rights reserved.
