Na Tiko Voli Mai Na Lekutu 19 - AI VOLA TABU（FIJ1864）

A vunau e na wai ni veivakasavasavataki, 1-10, kei na vunau e na kenai valavala, 11-22.

1A SA vosa vei Mosese kei Eroni ko Jiova, ka kaya,

2Sa vakaoqo nai valavala ni vunau sa vunautaka ko Jiova, ka vaka, Mo vosa vei ira na luve i Isireli, me ra kauta mai vei iko e dua na karavau alewa e damudamu, sa tawa ca, sa sega kina e dua na ca, sa sega ni toka kina nai vua:

3ia dou qai solia kivei Eliasari na bete, me kauta ki nai bili ni koro, me qai vakamatei e matana:

4me qai kauta e so na kena dra e na nonai qaqalo ko Eliasari na bete, ka kureitaka vakavitu e so na kena dra me donuya na mata ni vale gatu ni veitata:

5me qai vakamai na karavau e matana; io me vakamai na kulina, kei na lewena, kei na kena dra, kei na dena:

6me qai kauta na kau sitari na bete, kei na isopi, kei na ka damudamu, ka biuta ki loma ni buka sa kama kina na karavau:

7me qai savata nona veisulu na bete, ka vakasilima na yagona e na wai, ka sa oti ena qai lako ki loma ni koro, ia ena tawa savasava na bete ka yacova na yakavi:

8kei koya sa vakamai koya, ena savata nona veisulu e na wai, ka vakasilima na yagona e na wai, ena qai tawa savasava ka yacova na yakavi.

9Ia me qai dua na tamata e savasava me kumuna vata na dravusa ni karavau alewa, ka maroroya e na tikina savasava mai nai bili ni koro, ia ena maroroi me nodra nai vavakoso ni luve i Isireli me wai sa savai koya sa tawase: o qori sa dua nai sava ni valavala ca.

10Ia ko koya sa kumuna na dravusa ni karavau alewa me savata nona veisulu, ia ena tawa savasava ka yacova na yakavi. Ia ena ka vakaroti me tawa mudu vei ira na luve i Isireli, kei na kai tani sa tiko vulagi kei ira.

11O koya sa tara na yago ni tamata sa mate ena tawa savasava ka bogi vitu:

12me na savai koya kina e nai katolu ni siga, ia e nai kavitu ni siga ena savasava ko koya: ia kevaka sa sega ni savai koya e nai katolu ni siga, ena sega ni savasava e nai kavitu ni siga.

130 koya sa tara na yago mate ni tamata sa mate, ka sa sega ni vakasavasavataki koya, sa vakadukadukalitaka na vale-tikotiko i Jiova; ia na tamata ko ya ena muduki tani maivei ira na Isireli: e na vuku ni sa sega ni kureitaki vua na wai sa savai koya sa tawase, sa tawa savasava ko koya; sa tiko ga vua na nona tawa savasava.

14O qo na vunau, ni sa mate e na vale na tamata: o ira kecega sa curuma na vale, kei ira kecega era tiko e vale, ena tawa savasava ka bogi vitu:

15kei na bilo kecega sa dola tu, sa sega ni vauci kina nai ubi, ena tawa savasava:

16kei ira kecega era tara e dua sa vakamatei e nai seleiwau e na vanua, se dua sa mate wale, se na sui ni tamata, se nai bulubulu, ena tawa savasava ka bogi vitu.

17Ia e na vukuna sa tawa savasava, me ra kauta e so na dravusa ni ka sa vakamai mei sava ni valavala ca, ka sova kina na wai drodro ki na dua na bilo:

18mo qai dua na tamata savasava me kauta na isopi, ka tonia e na wai, ka kureitaka ki na vale, kei nai yaya kecega, kei na tamata era tiko maikina, kei koya sa tara na sui, se koya sa vakamatei, se koya sa mate wale, se nai bulubulu:

19ia ko koya sa savasava me kureitaka vua sa tawa savasava e nai katolu ni siga, kei nai kavitu ni siga: ia e nai kavitu ni siga me vakasavasavataki koya, ka savata nona veisulu, ka sili e na wai, ena qai savasava e na yakavi.

20Ia na tamata sa tawa savasava, ka sa sega ni vakasavasavataki koya, ena muduki tani maivei ira nai vavakoso, e na vuku ni sa vakadukadukalitaka na vale tabu i Jiova: sa sega ni kureitaki vua na wai sa savai koya sa tawase; sa tawa savasava ko koya.

21Ia ena ka vakaroti me tawa mudu vei ira, me savata nona veisulu ko koya sa kureitaka na wai sa savai koya sa tawase, ena tawa savasava talega ka yacova na yakavi ko koya sa tara na wai sa savai koya sa tawase.

22Kei na ka kecega sa tara ko koya sa tawa savasava, ena tawa savasava ga; kei koya sa tara ena tawa savasava ka yacova na yakavi.