Na Tiko Voli Mai Na Lekutu 18 - AI VOLA TABU（FIJ1864）

A nodra cakacaka na bete kei na luve i Levi, 1-7. A nodrai votavota na bete, 8-19: na nodra na luve i Levi, 20-24; kei nai votavota me ra solia vei ira na bete, 25-32.

1A SA vosa vei Eroni ko Jiova, O iko kei ira na luvemu kei na mataqali ni nomu qase vata kei iko, kemudou na tarogi e na vuku ni cala kecega sa caka e na ka ni vale tabu: ia ko iko kei ira na luvemu vata kei iko, kemudou na tarogi e na vuku ni cala sa caka e na nomudou cakacaka vakabete.

2Ia na wekamu talega e na yavusa i Levi, a yavusa ni nomu qase, mo kauta vata kei iko, me ra vauci vei iko, ka qaravi iko; ia ko iko kei ira na luvemu vata kei iko, dou na qarava e na mata ni vale gatu ni vunau.

3Ia me ra qarava na ka ko sa lesia, kei na cakacaka e na Vale gatu taucoko: ia me ra kakua ga ni torova nai yaya ni tikina tabu kei nai cabocabo-ni-soro, me ra kakua ni mate kina, kei kemudou talega.

4Ia era na vauci kei iko, ka qarava na cakacaka ni vale gatu ni veitata, e na cakacaka kecega ni Vale gatu: ia me na kakua ni torovi kemudou na tamata tani.

5Ia dou na qarava na cakacaka ni tikina tabu, kei na cakacaka ni cabocabo-ni-soro: me kakua tale na cudru vei ira na luve i Isireli.

6Ia koi au, raica, au sa kauti ira na wekamudou na luve i Levi, maivei ira na luve i Isireli: era sa soli vei kemudou mei solisoli, me nei Jiova, me kitaka na cakacaka ni vale gatu ni veitata.

7Ia ko iko kei ira na luvemu vata kei iko, kemudou na kitaka na nomudou cakacaka vakabete e na ka kecega ni cabocabo-ni-soro, kei na ka mai loma ni lati; ia dou na qarava: au sa solia vei kemudou na cakacaka vakabete me cakacaka sa soli: ia na tamata tani sa torova ena vakamatei.

8Sa vosa talega vei Eroni ko Jiova, Raica, au sa solia talega vei iko na cakacaka ni noqui soro sa lavelaveti e na ka kecega era vakatabuya na luve i Isireli; au sa solia vei iko mei votavota, vei ira talega na luvemu, me ka sa lesi me tawa mudu.

9A ka o qo sa maroroi mai na buka waqa ena nomu e na veika sa tabu sara: a ka kecega era cabora, na nodrai madrali kecega e laukana, kei na nodrai soro kecega ni valavala ca, kei na nodrai soro kecega ni caka cala, a ya era na solia vei au, ena tabu sara me nomu kei ira na luvemu.

10Mo kania ga e na tikina tabu sara; ena kania na tagane kecega; sa tabu ga me nomu.

11Ia na ka o qo sa nomu; a nodrai soro sa lavelaveti sai solisoli, kei nai soro kecega ni luve i Isireli sa lavelaveti: au sa solia vei iko, kei ira vata kei iko na luvemu tagane, kei na luvemu alewa, e na ka sa lesi me tawa mudu: ko ira kecega e na nomu vale sa savasava ena kania.

12A waiwai kecega e vinaka sara, kece talega na waini kei na witi e vinaka sara, na kedrai sevu era sa cabora vei Jiova, au sa solia vei iko.

13Na vua kecega sa taumada e na nodra vanua, era sa kauta vei Jiova, ena nomu; ko ira kecega e na nomu vale sa savasava ena kania.

14A ka kecega era sa vakatabuya na Isireli e na vosa vavakini, ena nomu.

15A ulumatua ni ka kecega, era sa kauta vei Jiova, se tamata se manumanu e yavai va, ena nomu: ia na ulumatua ni tamata mo volia sara ga, ka volia talega na ulumatua ni manumanu e yavai va sa tawa savasava.

16Ia na ka me voli, ni sa vula e dua mo volia, me vaka na ka ko sa lewa, me lima na sikeli siliva, me vaka na sikeli ni tikina tabu, o koya sa ruasagavulu na kera.

17Ia na ulumatua ni karavau, se na ulumatua ni sipi, se na ulumatua ni koti, mo kakua ni volia; era sa tabu: mo kureitaka ga na kedra dra ki nai cabocabo-ni-soro, ka vakama na kedra uro me ka sa cabori e na buka waqa, me ka boi vinaka vei Jiova.

18Ia ena kemu ga na lewedra; me vaka na serena sa yalovaki, kei na tabana i matau, ena kemu.

19Ai soro kecega sa lavelaveti e na veika tabu, era sa cabora vei Jiova na luve i Isireli, au sa solia vei iko, kei ira vata kei iko na luvemu tagane, kei na luvemu alewa, e na ka sa lesi me tawa mudu: o qo na veiyalayalati sa caka e na masima me tawa mudu e na mata i Jiova, vei iko kei na nomu kawa vata kei iko.

20Sa vosa talega vei Eroni ko Jiova, Ena sega na nomui votavota e na nodra vanua, ia ena sega na nomu tikina e na kedra maliwa: oi au na nomu tikina kei na nomui votavota e na kedra maliwa na luve i Isireli.

21Ka, raica, kaʼu sa solia vei ira na luve i Levi nai katini ni nodra ka kecega na Isireli mei votavota, mei sau ni nodra cakacaka era kitaka, io na cakacaka ni vale gatu ni veitata.

22Me ra kakua talega ni toro tale ki na vale gatu ni veitata ko ira na luve i Isireli, de ra cudruvi e nai valavala ca, ka mate.

23Ia ko ira na luve i Levi, era na kitaka na cakacaka ni vale gatu ni veitata, ka ra na tarogi ni ra caka cala: ena ka vakaroti me tawa mudu e na nomudou veitabatamata, me kakua na nodrai votavota e na kedra maliwa na luve i Isireli.

24Ia nai katini ni nodra ka na luve i Isireli, a ya era cabora mei soro e lavelaveti vei Jiova, au sa solia vei ira na luve i Levi mei votavota: o koya kaʼu sa kaya kina vei ira, Me kakua na nodrai votavota e na kedra maliwa na luve i Isireli.

25A sa vosa vei Mosese ko Jiova, ka kaya,

26Ia mo vosa vei ira na luve i Levi, ka kaya vei ira, Ni dou sa kauta nai katini ni nodra ka na luve i Isireli, ko koya kaʼu sa solia vei kemudou maivei ira me nomudoui votavota, dou na qai cabora e so vei Jiova mei soro e lavelaveti, io nai katini ni kenai katini.

27Ia na nomudoui soro e lavelaveti ena nanumi vei kemudou, me vaka sa sila mai na rara ni buturaki sila, kei na ka sa sinai kina nai keli-waini.

28Sa vakaoqo dou na cabora kina, koi kemudou talega, vei Jiova nai soro e lavelaveti, mai na nomudoui katini kecega ni nodra ka na luve i Isireli, a ya kemudou sa rawata maivei ira; ia kemudou na solia maikina vei Eroni na bete nai soro e lavelaveti vei Jiova.

29Mai na ka kecega sa soli vei kemudou, dou na cabora maikina nai soro kecega e lavelaveti vei Jiova, io mai na kena kecega e vinaka sara, na kena tikina sa tabu.

30Mo kaya talega vei ira, Ni dou sa cabora na kena e vinaka sara, ena qai nanumi vei ira na luve i Levi, me vaka sa vua e na rara ni buturaki sila kei na vua e na keli-waini.

31Ia dou na kania e na tikina kecega, oi kemudou kei ira na nomudou lewe-ni-vale: ni sai sau ni nomudou cakacaka e na vale gatu ni veitata.

32Ia dou na sega ni cudruvi kina e nai valavala ca, ni dou sa cabora na kena e vinaka sara: dou na sega talega ni vakata-wasavasavataka kina na nodra ka tabu na luve i Isireli, de dou mate.